Yusuf Pathan In-laws Arrested: પૂર્વ ક્રિકેટર અને તૃણમૂલ કોંગ્રેસના સાંસદ યુસુફ પઠાણના સાસરી પક્ષના લોકો એક વિવાદમાં ફસાયા છે. મુંબઈના ભાયખલા વિસ્તારમાં માત્ર કારથી કાદવ ઉડવા જેવી મામૂલી વાત પર યુસુફ પઠાણના સસરા અને સાળા પર એક પરિવાર પર હુમલો કરવાનો આરોપ લાગ્યો છે. પોલીસે આ મામલે કડક કાર્યવાહી કરતા પઠાણના સસરા ખાલીદ પઠાણ અને સાળા શોએબ ખાન સહિત ત્રણ લોકોની ધરપકડ કરી જેલમાં મોકલી દીધા છે.
કાદવ ઉડ્યો તો કરી મારામારી
આ સમગ્ર ઘટના શનિવાર રાત્રિની છે, જ્યારે ભાયખલાના એક રોડ પર ભરાયેલા પાણીમાંથી પસાર થતી વખતે એક કાર દ્વારા આરોપીઓ પર કાદવના છાંટા ઉડ્યા હતા. બસ, આટલી નાની વાત પર વિવાદ એટલો વધી ગયો કે આરોપીઓએ પોતાનો પિત્તો ગુમાવ્યો હતો. અકસ્માતે જે કારમાંથી પાણી ઉડ્યું હતું, તેના ડ્રાઈવરનું નામ પણ 'યુસુફ પઠાણ' જ હતું. પીડિતના ભાઈ સલમાનના જણાવ્યા અનુસાર, "અમે ડિનર કરીને પરત ફરી રહ્યા હતા, ત્યારે ભૂલથી શોએબ નામના વ્યક્તિ પર કાદવ ઉડ્યો હતો. અમે તરત જ ગાડી રોકીને માફી પણ માંગી હતી, પરંતુ તે સાંભળવા તૈયાર નહોતો." એવો આરોપ છે કે શોએબ ખાને પહેલા વાંસના લાકડાથી કારનો કાચ તોડી નાખ્યો અને પછી પોતાના સાથીદારોને બોલાવી લીધા.
આ પણ વાંચો: IPL માં આ ખેલાડીનો ફેન બન્યો શ્રેયસ ઐયર! : કહ્યું..., આ ભવિષ્યમાં સુપરસ્ટાર બનશે
બેઝબોલ બેટ અને લાકડા વડે હુમલો
જ્યારે પીડિત પરિવાર પોલીસ સ્ટેશન જવા માટે નીકળ્યો, ત્યારે આરોપીઓએ 8-9 લોકો સાથે મળીને તેમના પર હુમલો કરી દીધો હતો. આ વખતે તેમના હાથમાં વાંસના લાકડા અને બેઝબોલ બેટ હતા. આ હુમલામાં સલમાનનો હાથ ફેક્ચર થઈ ગયો છે. હાલ પીડિત પરિવારની જે.જે. હોસ્પિટલમાં સારવાર ચાલી રહી છે.
આ પણ વાંચો: વૈભવ સૂર્યવંશી કરતાં પણ આગળ છે આ બેટ્સમેન! : દરેક બોલ પર ચોગ્ગા-છગ્ગાની જ વાત
CCTVમાં કેદ થઈ ઘટના
આ સમગ્ર ઘટના ત્યાં લાગેલા સીસીટીવી કેમેરામાં કેદ થઈ ગઈ છે. પોલીસે સલમાનની ફરિયાદના આધારે ખાલીદ પઠાણ, શોએબ ખાન અને ઉમરશાદ ખાનની ધરપકડ કરી છે, જ્યારે શહેબાઝ પઠાણ નામનો એક આરોપી હજુ પણ ફરાર છે. કોર્ટે આરોપીઓને 2 મે સુધી ન્યાયિક કસ્ટડીમાં મોકલી દીધા છે. જોકે, પોતાનો બચાવ કરવા માટે આરોપીઓ તરફથી પણ એક ક્રોસ એફઆઈઆર (FIR) દાખલ કરવામાં આવી છે.
