7000mAh બેટરી અને 50MP કેમેરા સાથે નવો ફોન માર્કેટમાં; જાણો કિંમત અને ફિચર્સ
ટેક બ્રાન્ડ મોટોરોલા (Motorola) એ ભારતીય સ્માર્ટફોન માર્કેટમાં ગ્રાહકો માટે તેના લોકપ્રિય સ્માર્ટફોન 'મોટોરોલા એજ 70 ફ્યુઝન' (Motorola Edge 70 Fusion) નું નવું વેરિઅન્ટ લોન્ચ કરી દીધું છે. કંપનીએ આ ફોનને માર્ચ મહિનામાં માર્કેટમાં ઉતાર્યો હતો, પરંતુ હવે તેનો વધુ સ્ટોરેજ ધરાવતો 12GB રેમ અને 512GB સ્ટોરેજ વાળો નવો વિકલ્પ રજૂ કરાયો છે. આ સ્માર્ટફોન 50MP સોની કેમેરા, સ્નેપડ્રેગન પ્રોસેસર, અને પાવરફુલ મિલિટરી ગ્રેડ બોડી પ્રોટેક્શન સાથે આવે છે.
કિંમતોમાં થયો ફેરફાર: જુઓ કિંમતનું નવું લિસ્ટ
મોટોરોલાએ આ નવા વેરિઅન્ટ (12GB + 512GB) ની કિંમત 36,999 રૂપિયા નક્કી કરી છે. આ સાથે જ કંપનીએ તેના જૂના મોડલ્સની કિંમતોમાં પણ થોડો વધારો કર્યો છે. આ સ્માર્ટફોન હવે ઓનલાઈન અને ઓફલાઈન સ્ટોર્સ પર 4 અલગ-અલગ વેરિઅન્ટમાં ખરીદી માટે ઉપલબ્ધ છે. ગ્રાહકો પસંદગીના બેંક કાર્ડ્સ પર 2,000 રૂપિયાનું ઇન્સ્ટન્ટ ડિસ્કાઉન્ટ મેળવી શકે છે.
આ સ્માર્ટફોનના તમામ વેરિઅન્ટ્સની કિંમતોની વાત કરીએ તો, તેના અલગ-અલગ સ્ટોરેજ મોડલ પ્રમાણે કિંમતો નક્કી કરવામાં આવી છે. જેમાં 8GB રેમ અને 128GB સ્ટોરેજ વેરિઅન્ટની નવી કિંમત 29,999 રૂપિયા (જૂની કિંમત 26,999 રૂપિયા) અને 8GB રેમ અને 256GB સ્ટોરેજ વેરિઅન્ટની નવી કિંમત 31,999 રૂપિયા (જૂની કિંમત 29,999 રૂપિયા) રાખવામાં આવી છે. આ ઉપરાંત, હેવી યુઝર્સ માટે 12GB રેમ અને 256GB સ્ટોરેજ વેરિઅન્ટની નવી કિંમત 33,999 રૂપિયા (જૂની કિંમત 32,999 રૂપિયા) નક્કી કરવામાં આવી છે, જ્યારે કંપનીએ તાજેતરમાં જ લોન્ચ કરેલા તેના તદ્દન નવા 12GB રેમ અને 512GB સ્ટોરેજ વાળા વેરિઅન્ટની કિંમત 36,999 રૂપિયા રાખવામાં આવી છે.
આ પણ વાંચો: નવો મોબાઈલ ખરીદવાની ઉતાવળ ન કરતા! | જુલાઈથી સપ્ટેમ્બરમાં લોન્ચ થશે 6 ફોન | Offbeat Stories
ડિઝાઇન: મિલિટરી ગ્રેડ બિલ્ડ અને ક્વાડ-કર્વ્ડ સ્ક્રીન
મજબૂત બિલ્ડ ક્વોલિટી: આ ફોનને MIL-STD 810H મિલિટરી ગ્રેડ સર્ટિફિકેશન મળેલું છે, જે ફોનને અચાનક હાથમાંથી પડી જવા છતાં સુરક્ષિત રાખે છે. આ ઉપરાંત તેમાં IP68 અને IP69 રેટિંગ આપવામાં આવ્યું છે, જેનાથી આ ફોન ધૂળ અને પાણીમાં પણ બિલકુલ ખરાબ થતો નથી.
પ્રીમિયમ લુક: ફ્રન્ટ ડિઝાઇનમાં ક્વાડ-કર્વ્ડ સ્ક્રીન જોવા મળે છે જેમાં બેઝલ્સ (કિનારીઓ) નહિવત્ છે. સેલ્ફી કેમેરા માટે સ્ક્રીનની મધ્યમાં નાનો પંચ-હોલ છે. આ કર્વ્ડ ડિઝાઇનના કારણે ફોન પકડવામાં ખૂબ સ્લિમ લાગે છે.
કલર ઓપ્શન્સ: આ સ્માર્ટફોન પેન્ટોન બ્લુ સર્ફ, પેન્ટોન સિલવેટ અને પેન્ટોન કન્ટ્રી એર જેવા ત્રણ આકર્ષક કલર્સમાં ઉપલબ્ધ છે.
સ્પેસિફિકેશન્સ: 1.5K AMOLED ડિસ્પ્લે અને પાવરફુલ પર્ફોર્મન્સ
ડિસ્પ્લે: ફોનમાં 6.8-ઇંચની 1.5K એક્સ્ટ્રીમ AMOLED સ્ક્રીન આપવામાં આવી છે, જે 144Hz રિફ્રેશ રેટ અને 5200 nits ની જબરદસ્ત પીક બ્રાઇટનેસને સપોર્ટ કરે છે. સ્ક્રીનની સુરક્ષા માટે કોર્નિંગ ગોરિલા ગ્લાસ 7i નો ઉપયોગ કરાયો છે. આમાં 'સ્માર્ટ વોટર ટચ' ફીચર છે, જેનાથી સ્ક્રીન અથવા હાથ ભીના હોય તો પણ ટચ પરફેક્ટ કામ કરે છે.
પ્રોસેસર અને AI: સ્પીડ અને મલ્ટિટાસ્કિંગ માટે આ ફોનમાં ક્વોલકોમનું સ્નેપડ્રેગન 7s જેન 4 (Snapdragon 7s Gen 4) પ્રોસેસર આપવામાં આવ્યું છે, જેનો AnTuTu સ્કોર 11.49 લાખથી વધુ છે. સ્માર્ટ યુઝર એક્સપિરિયન્સ માટે આ ફોન 'મોટો AI 2.0' (Moto AI 2.0) ટેક્નોલોજી સપોર્ટ સાથે આવે છે.
કેમેરા અને પાવરફુલ 7000mAh બેટરી
કેમેરા સેટઅપ: ફોટોગ્રાફી માટે રિયર પેનલ પર ટ્રિપલ કેમેરા સેટઅપ છે. તેમાં ઓપ્ટિકલ ઇમેજ સ્ટેબિલાઇઝેશન (OIS) સપોર્ટ ધરાવતો 50MP નો સોની LYT710 પ્રાઇમરી કેમેરા છે. આ સાથે 13MP નો અલ્ટ્રા-વાઇડ એંગલ લેન્સ અને એક લાઇટ સેન્સર મળે છે. સેલ્ફી માટે ફ્રન્ટમાં 32MP નો શાનદાર કેમેરા આપવામાં આવ્યો છે.
બેટરી અને ચાર્જિંગ: લાંબા બેકઅપ માટે આ સ્માર્ટફોનમાં 7000mAh ની વિશાળ બેટરી ફિટ કરવામાં આવી છે. આ બેટરીને ઝડપથી ચાર્જ કરવા માટે બોક્સની સાથે જ 68W નું ટર્બોપાવર ફાસ્ટ ચાર્જર આપવામાં આવે છે.
સોફ્ટવેર અને સિક્યોરિટી અપડેટ્સ
આ ફોન લેટેસ્ટ એન્ડ્રોઇડ 16 ઓપરેટિંગ સિસ્ટમ પર રન કરે છે. કંપનીએ ગ્રાહકોને 3 વર્ષ સુધીના મેજર OS અપગ્રેડ્સ (એન્ડ્રોઇડ 19 સુધી) અને 5 વર્ષ સુધીના સિક્યોરિટી અપડેટ્સ આપવાનું વચન આપ્યું છે. કનેક્ટિવિટી માટે Wi-Fi 6E, બ્લૂટૂથ 6.0 અને NFC જેવા આધુનિક ફિચર્સ છે, જ્યારે સુરક્ષા માટે ઇન-ડિસ્પ્લે ફિંગરપ્રિન્ટ સેન્સર પણ મળે છે.
