MLA Ketan Inamdar: વડોદરા જિલ્લામાં ધારાસભ્યો અને વહીવટી અધિકારીઓ વચ્ચેના તણાવમાં નવો વધારો થયો છે. સાવલી વિધાનસભા બેઠકના ભાજપ ધારાસભ્ય કેતન ઇનામદારે કલેક્ટરની અધ્યક્ષતામાં યોજાતી સંકલન બેઠકમાં હાજર ન રહેવાનો સ્પષ્ટ નિર્ણય લીધો છે. આ નિર્ણયથી રાજકીય વર્તુળોમાં ચર્ચા શરૂ થઈ ગઈ છે અને અધિકારીઓની કાર્યપદ્ધતિ પર પ્રશ્નો ઉભા થયા છે.
દર ત્રીજા શનિવારે વડોદરા જિલ્લામાં સંકલન બેઠક
દર ત્રીજા શનિવારે વડોદરા જિલ્લામાં સંકલન બેઠક યોજાય છે, જેમાં સાંસદ-ધારાસભ્યો અને વરિષ્ઠ અધિકારીઓ વિસ્તારના વિકાસ કાર્યો, લોકોના પ્રશ્નો અને લાંબા સમયથી અટકેલા મુદ્દાઓ પર ચર્ચા કરે છે. પરંતુ ધારાસભ્ય કેતન ઇનામદારના મતે બેઠકમાં ચર્ચા તો થાય છે, પરંતુ તેના નિર્ણયો જમીન પર અમલમાં આવતા નથી, જેનાથી પ્રજાના પ્રશ્નો અટકી પડ્યા છે.
મુખ્યમંત્રીને પત્ર લખીને અધિકારીઓની ભૂમિકા અંગે ફરિયાદ
આ અસંતોષ માત્ર એક ધારાસભ્ય સુધી મર્યાદિત નથી. થોડા દિવસો પહેલાં વડોદરા જિલ્લાના પાંચ ધારાસભ્યોએ (જેમાં કેતન ઇનામદાર પણ સામેલ છે) મુખ્યમંત્રીને પત્ર લખીને અધિકારીઓની ભૂમિકા અંગે ફરિયાદ કરી હતી. પત્રમાં જણાવવામાં આવ્યું હતું કે સંકલન બેઠકોમાં વારંવાર રજૂઆત છતાં વિકાસ કાર્યો અટક્યા છે અને અધિકારીઓ ધારાસભ્યોના સૂચનોને ગંભીરતાથી લેતા નથી. આ પત્ર બાદ પણ કોઈ નોંધપાત્ર કાર્યવાહી ન થતાં અસંતોષ વધુ ગાઢ બન્યો છે.
આ મામલે કોઈ સત્તાવાર પ્રતિક્રિયા આવી નથી
ધારાસભ્ય ઇનામદારનું કહેવું છે કે જો સંકલન બેઠક માત્ર ઔપચારિક રહે અને પ્રજાને વાસ્તવિક લાભ ન મળે તો તેમાં ભાગ લેવાનો કોઈ અર્થ નથી. આ નિર્ણયથી અધિકારીઓ-જનપ્રતિનિધિઓ વચ્ચેના સંબંધો અને સંકલન વ્યવસ્થાની અસરકારકતા પર નવા સવાલો ઉભા થયા છે.હાલમાં જિલ્લા તંત્ર કે રાજ્ય સરકાર તરફથી આ મામલે કોઈ સત્તાવાર પ્રતિક્રિયા આવી નથી. જો આગામી સમયમાં યોગ્ય પગલાં ન લેવાય તો અન્ય ધારાસભ્યો પણ આવું જ પગલું ભરી શકે તેવી શક્યતા વ્યક્ત થઈ રહી છે, જે વડોદરા જિલ્લાના રાજકીય માહોલને વધુ તણાવપૂર્ણ બનાવી શકે છે.
