ટ્રમ્પને ભારતનો સીધો જવાબ - કાશ્મીર પર મધ્યસ્થી સ્વીકાર્ય નથી : PoK ખાલી કરે પાકિસ્તાન - વિદેશ મંત્રાલય

ભારત-પાકિસ્તાન યુદ્ધવિરામ અંગે વિદેશ મંત્રાલયે પ્રેસ કોન્ફરન્સ યોજી હતી. યુદ્ધવિરામમાં અમેરિકન રાષ્ટ્રપતિ ડોનાલ્ડ ટ્રમ્પની મધ્યસ્થી અંગે વિદેશ મંત્રાલયે કહ્યું કે અમે કાશ્મીર પર મધ્યસ્થી સ્વીકારતા નથી. પાકિસ્તાને POK ખાલી કરવું પડશે.

વિદેશ મંત્રાલયના પ્રવક્તા રણધીર જયસ્વાલે જણાવ્યું હતું કે અમારું લાંબા સમયથી રાષ્ટ્રીય વલણ રહ્યું છે કે જમ્મુ અને કાશ્મીરના કેન્દ્રશાસિત પ્રદેશને લગતા કોઈપણ મુદ્દાનો ઉકેલ ભારત અને પાકિસ્તાન દ્વારા દ્વિપક્ષીય રીતે લાવવો જોઈએ. આ નીતિમાં કોઈ ફેરફાર થયો નથી. પેન્ડિંગ મામલો પાકિસ્તાન દ્વારા ગેરકાયદેસર રીતે કબજે કરાયેલા ભારતીય પ્રદેશને ખાલી કરાવવાનો છે.

તેમણે કહ્યું કે વિદેશ સચિવ વિક્રમ મિશ્રીએ પહેલાથી જ જાણ કર્યા મુજબ, 10 મેના રોજ 3:35 વાગ્યે, બંને દેશોના DGMO એ યુદ્ધવિરામ પર ટેલિફોનિક ચર્ચા કરી હતી. પાકિસ્તાન હાઈ કમિશન દ્વારા બપોરે 12.37 વાગ્યે વિદેશ મંત્રાલયને આ વાતચીતની જાણ કરવામાં આવી. પાકિસ્તાનમાં આંતરિક ટેકનિકલ સમસ્યાઓના કારણે હોટલાઇન કનેક્ટ કરવામાં વિલંબ થયો હતો. ભારતના ડીજીએમઓની હાજરીમાં બપોરે 3.35 વાગ્યે વાતચીત થઈ.

તેમણે કહ્યું કે 10 મેની સવારે ભારતીય સેનાએ પાકિસ્તાન એરબેઝનો નાશ કર્યો. આ પછી પાકિસ્તાનનો સૂર બદલાઈ ગયો. પાકિસ્તાને ગોળીબાર બંધ કરવાનો અને લશ્કરી કાર્યવાહી બંધ કરવાનો નિર્ણય લીધો. હું સ્પષ્ટ કરવા માંગુ છું કે ભારતીય સશસ્ત્ર દળોએ પાકિસ્તાનને ગોળીબાર બંધ કરવા દબાણ કર્યું. અન્ય દેશોની જેમ, ભારતે સ્પષ્ટ સંદેશ આપ્યો છે અને જનતાને જણાવ્યું છે કે ભારતે 22 એપ્રિલના આતંકવાદી હુમલાનો જવાબ આતંકવાદી માળખાને નિશાન બનાવીને આપ્યો છે. આ પછી, જ્યારે પાકિસ્તાની સશસ્ત્ર દળોએ ગોળીબાર કર્યો, ત્યારે ભારતીય સેનાએ યોગ્ય જવાબ આપ્યો. તેમણે કહ્યું કે 7 મેના રોજ ઓપરેશન સિંદૂરની શરૂઆતથી 10 મેના રોજ ગોળીબાર અને લશ્કરી કાર્યવાહી બંધ કરવાના કરાર સુધી, ભારતીય અને અમેરિકન નેતાઓ વચ્ચે ઉભરતી લશ્કરી પરિસ્થિતિ પર ચર્ચા થઈ હતી. આમાંથી કોઈ પણ ચર્ચામાં વેપારનો મુદ્દો આવ્યો ન હતો.

તેમણે કહ્યું કે સીસીએસ (કેબિનેટ કમિટી ઓન સિક્યુરિટી) ના નિર્ણય બાદ સિંધુ જળ સંધિને મુલતવી રાખવામાં આવી હતી. સિંધુ જળ સંધિની શરૂઆત સદ્ભાવના અને મિત્રતાની ભાવનાથી થઈ હતી, જેમ કે સંધિની પ્રસ્તાવનામાં ઉલ્લેખિત છે. જોકે, પાકિસ્તાને ઘણા દાયકાઓથી સરહદ પાર આતંકવાદને પ્રોત્સાહન આપીને આ સિદ્ધાંતોનો ભંગ કર્યો છે. હવે સીસીએસના નિર્ણય મુજબ, જ્યાં સુધી પાકિસ્તાન વિશ્વસનીય અને અફર રીતે સરહદ પાર આતંકવાદને ટેકો આપવાનું બંધ ન કરે ત્યાં સુધી ભારત સંધિને સ્થગિત રાખશે. અમે પાકિસ્તાની પક્ષ દ્વારા આપવામાં આવેલું નિવેદન જોયું છે. જે દેશે ઔદ્યોગિક સ્તરે આતંકવાદને પ્રોત્સાહન આપ્યું છે, જો તે વિચારે છે કે તે તેના પરિણામોથી બચી શકશે તો તે પોતાને મૂર્ખ બનાવશે. ભારત દ્વારા નાશ કરાયેલ આતંકવાદી માળખાગત સુવિધાઓ માત્ર ભારતીયો જ નહીં પરંતુ વિશ્વભરના ઘણા નિર્દોષ લોકોના મૃત્યુ માટે જવાબદાર હતી. હવે આ New Normal છે, પાકિસ્તાન જેટલું વહેલું આ સમજશે તેટલું સારું.