શનિવારે મહારાષ્ટ્રના પાલઘર જિલ્લાના વિરારમાં એક ઓટો રિક્ષા ચાલકને માર મારવામાં આવ્યો હોવાનો વીડિયો સોશિયલ મીડિયા પર વાયરલ થયો. જે વીડિયોમાં બતાવવામાં આવ્યું છે કે શિવસેના (ઉદ્ધવ જૂથ) અને મહારાષ્ટ્ર નવનિર્માણ સેનાના કાર્યકરોએ જાહેરમાં રિક્ષા ડ્રાઇવરને માર માર્યો હતો અને મરાઠી ભાષા અને મહારાષ્ટ્ર વિરુદ્ધ કથિત 'વાંધાજનક' ટિપ્પણી કરવા બદલ માફી માંગવા દબાણ કર્યું હતું.
ભાષા વિવાદ!
થોડા દિવસો અગાઉ વિરાર સ્ટેશનના પરિસરમાં એક રિક્ષા ચાલક અને ટુ-વ્હીલર સવાર વચ્ચે મરાઠી ભાષાને લઈને ઝઘડો થયો હતો. રિક્ષા ચાલક યુવકને ધમકાવતો અને મરાઠી ભાષામાં બોલવા સામે વાંધો ઉઠાવતો જોવા મળ્યો હતો. રિક્ષા ચાલકે યુવકને ધમકાવ્યો હતો અને તેને ભોજપુરી અને હિન્દી બોલવા માટે દબાણ કર્યું હતું.
શું છે સમગ્ર મામલો?
વાયરલ વીડિયો મુજબ આ ઘટના વિરાર રેલ્વે સ્ટેશન નજીક એક વ્યસ્ત રસ્તા પર બની હતી. વિગતો મુજબ ડ્રાઇવર જે બહારથી સ્થળાંતરિત છે, તેણે મરાઠી ભાષા, મહારાષ્ટ્ર રાજ્ય અને મરાઠી આઇકોન્સ વિરુદ્ધ અપમાનજનક ટિપ્પણી કરી હતી. એવો દાવો કરવામાં આવી રહ્યો છે કે આનો એક અલગ વીડિયો સોશિયલ મીડિયા પર પહેલાથી જ વાયરલ થઈ ગયો છે, જેના કારણે સ્થાનિક રાજકીય સંગઠનો અને લોકોમાં રોષ ફેલાયો છે.
થપ્પડ મારી અને માફી મંગાવી
શનિવારે, મહિલાઓ સહિત એક જૂથે ઓટો ડ્રાઈવરને થપ્પડ મારી અને તેને એક પુરુષ અને તેની બહેનની જાહેરમાં માફી માંગવા દબાણ કર્યું, જેમની સાથે તેણે કથિત રીતે દુર્વ્યવહાર કર્યો હતો. મહારાષ્ટ્ર અને તેની સંસ્કૃતિનું 'અપમાન' કરવા બદલ તેને જાહેરમાં માફી માંગવા પણ દબાણ કરવામાં આવ્યું.
શિવસેના-UBTની પ્રતિક્રિયા
શિવસેના (યુબીટી) વિરાર શહેરના વડા ઉદય જાધવે ઘટનાની પુષ્ટિ કરતા કહ્યું, "જો કોઈ મરાઠી ભાષા, મહારાષ્ટ્ર કે મરાઠી લોકોનું અપમાન કરશે તો તેનો જવાબ શિવસેનાની રીતે આપવામાં આવશે. અમે ચૂપ નહીં બેસીએ" તેમણે કહ્યું કે, ડ્રાઇવરે મહારાષ્ટ્ર અને મરાઠી માનુષ વિરુદ્ધ બોલવાની હિંમત બતાવી હતી, તેથી તેને પાઠ શીખવવામાં આવ્યો''
પોલીસે શું કહ્યું ?
પોલીસે કહ્યું કે તેઓ આ વીડિયોથી વાકેફ છે, પરંતુ આ મામલે હજુ સુધી કોઈ ઔપચારિક ફરિયાદ મળી નથી. તેથી હજુ સુધી કોઈની વિરુદ્ધ કોઈ કેસ નોંધવામાં આવ્યો નથી.
