Manu Bhaker: ઓલિમ્પિક શૂટર મનુ ભાકર પર દુ:ખનો પહાડ તૂટી પડ્યો છે. કારણ કે શૂટર મનુ ભાકરની નાની અને મામાનું માર્ગ અકસ્માતમાં મોત થયું છે. આ અકસ્માત હરિયાણાના મહેન્દ્રગઢ જિલ્લામાં બાયપાસ રોડ પર થયો હતો. બન્ને સ્કૂટર પર સવારી કરી રહ્યા હતા, પરંતુ એક બ્રેઝા કારે તેમના સ્કૂટરને ટક્કર મારી હતી. આ અકસ્માતમાં બન્નેના ઘટનાસ્થળે જ મોત નીપજ્યા હતા.
જ્યારે આરોપી કાર ચાલક ઘટનાસ્થળે પરથી ફરાર થઈ ગયો હતો. અકસ્માતની માહિતી મળતા જ શહેર પોલીસ સ્ટેશનના ઇન્ચાર્જ ઘટનાસ્થળે પહોંચ્યા અને મૃતદેહોને કબજે કરીને પોસ્ટમોર્ટમ માટે મોકલ્યા છે. પોલીસે આરોપીઓની શોધખોળ હાથ ધરી છે. જ્યારે અકસ્માતના સમાચાર મનુ ભાકરના ઘરે પહોંચ્યા ત્યારે શૂટરને ખેલ રત્ન મળવાની ખુશી શોકમાં ફેરવાઈ ગઈ છે. મનુનો પરિવાર મહેન્દ્રગઢ જવા રવાના થઈ ગયો છે.
માતાને ભાઈના ઘરે છોડવા જઈ રહ્યો હતો મૃતક
મળતી માહિતી અનુસાર મૃતકોની ઓળખ યુદ્ધવીર અને તેની માતા સાવિત્રી દેવી તરીકે થઈ છે. તેમનું ઘર મહેન્દ્રગઢના બાયપાસ રોડ પર છે. શનિવારે સવારે બન્ને સ્કૂટર પર નીકળ્યા હતા. યુદ્ધવીર તેમની માતા સાવિત્રી દેવીને લોહારુ ચોક ખાતે તેના નાના ભાઈના ઘરે મૂકવા જઈ રહ્યો હતો. માતાને છોડીને તેને ફરજ પર જવાનું હતું, પણ રસ્તામાં તેનો અકસ્માત થયો.
Charkhi Dadri, Haryana: In a tragic incident on Mahendragarh Bypass Road, international shooter Manu Bhaker’s grandmother and uncle lost their lives when their scooter collided with a Brezza car. The car driver fled the scene. Police have taken the bodies for post-mortem and are… pic.twitter.com/x5HRzPTlSx
— IANS (@ians_india) January 19, 2025
જ્યારે તે મહેન્દ્રગઢ રોડ પર કાલિયાણા વળાંક પર પહોંચ્યો ત્યારે રોંગ સાઈડમાંથી આવતી એક કારે તેના સ્કૂટરને ટક્કર મારી હતી. કારની ટક્કર એટલી જોરદાર હતી કે માતા અને પુત્ર બન્ને રસ્તા પર પડી ગયા હતા. બન્નેના માથા રસ્તા પર અથડાયા અને વધુ પડતા રક્તસ્ત્રાવને કારણે બન્નેનું ઘટનાસ્થળે જ મોત નીપજ્યું હતું. સ્કૂટરને ટક્કર માર્યા બાદ ચાલક કાર લઈને ફરાર થઈ ગયો હતો.
મનુ ભાકરના નાની રાષ્ટ્રીય ચંદ્રક વિજેતા હતા
મળતી માહિતી અનુસાર મનુના મામા 50 વર્ષના હતા અને નાની લગભગ 70 વર્ષના હતા. મનુની નાની સાવિત્રી પણ રાષ્ટ્રીય ખેલાડી રહી છે. તેણીએ રાષ્ટ્રીય સ્તરે ઘણા મેડલ જીત્યા હતા. યુદ્ધવીર સિંહ મૂળ દાદરીના કલાલી ગામનો રહેવાસી હરિયાણા રોડવેઝના દાદરી ડેપોમાં ડ્રાઇવર હતો.
