'સમાધાન કરો, નહીં તો બોમ્બ વિસ્ફોટ થશે' : ટ્રમ્પની ઈરાનને ન્યુક્લિયર ડીલને લઈને ખુલ્લેઆમ ધમકી

અમેરિકા અને ઈરાન વચ્ચે ફરી એકવાર તણાવ વધતો જોવા મળી રહ્યો છે. અમેરિકાના રાષ્ટ્રપતિ ડોનાલ્ડ ટ્રમ્પે ઈરાનને કડક ચેતવણી આપી છે. ટ્રમ્પે કહ્યું હતું કે જો ઈરાન તેના પરમાણુ કાર્યક્રમ પર કોઈ સમજૂતી પર પહોંચવાનો ઇનકાર કરશે તો તેઓ બોમ્બમારો કરવાનું વિચારશે. આ ઉપરાંત તેને કડક આર્થિક પ્રતિબંધોનો સામનો કરવો પડશે.

'જો સમાધાન નહીં થાય તો બોમ્બ ધડાકા થશે'
મળતી માહિતી અનુસાર, એક ટેલિફોન ઇન્ટરવ્યુમાં ટ્રમ્પે કહ્યું, 'અમેરિકા અને ઈરાન વચ્ચે વાટાઘાટો ચાલી રહી છે. પરંતુ જો તેઓ સમજૂતી પર નહીં પહોંચે તો બોમ્બ વિસ્ફોટ થશે. આ એવો બોમ્બ ધડાકો હશે જેવો તેઓએ પહેલાં ક્યારેય જોયો નથી.' ટ્રમ્પે એમ પણ કહ્યું હતું કે જો ઈરાન સમાધાન નહીં કરે તો હું તેના પર ફરીથી સેકન્ડરી ટેરિફ લાદીશ, જેમ કે મેં ચાર વર્ષ પહેલા કર્યું હતું.

ઈરાને વાટાઘાટો કરવાનો ઇનકાર કર્યો હતો
આ પહેલા રવિવારે રાષ્ટ્રપતિ ટ્રમ્પનો પત્ર મળ્યા બાદ ઈરાને અમેરિકા સાથે સીધી વાતચીત કરવાનો ઈન્કાર કરી દીધો હતો. રાષ્ટ્રપતિ મસૂદ પેઝેશ્કિયાને કહ્યું કે દેશ તેના પરમાણુ કાર્યક્રમને લઈને અમેરિકા સાથે સીધી વાટાઘાટ કરશે નહીં. રાષ્ટ્રપતિ ટ્રમ્પ દ્વારા ઈરાનના સર્વોચ્ચ નેતાને મોકલવામાં આવેલા પત્ર પર ઈરાનની આ પ્રથમ પ્રતિક્રિયા હતી. જ્યારે રાષ્ટ્રપતિ પેઝેશ્કિયાને ઓમાન દ્વારા તેમના પ્રતિભાવમાં સીધી વાટાઘાટોને નકારી કાઢી હતી,.તેમણે યુએસ સાથે પરોક્ષ વાટાઘાટોની શક્યતાને નકારી ન હતી. "અમે વાટાઘાટો ટાળી રહ્યા નથી. પરંતુ વચનોના ઉલ્લંઘનને કારણે અમારી પાસે કેટલીક સમસ્યાઓ છે," પેજેશકિયાને કેબિનેટ બેઠક દરમિયાન જણાવ્યું હતું. તેઓએ (અમેરિકા) સાબિત કરવું પડશે કે તેઓ વિશ્વાસ પુનઃસ્થાપિત કરી શકે છે.' તમને જણાવી દઈએ કે રાષ્ટ્રપતિ ડોનાલ્ડ ટ્રમ્પે હાલમાં જ ઈરાનના સુપ્રીમ લીડર અયાતુલ્લાહ અલી ખમેનીને એક પત્ર મોકલીને તેહરાનના ઝડપથી વિસ્તરતા પરમાણુ કાર્યક્રમ પર ચિંતા વ્યક્ત કરી હતી.

ટ્રમ્પે તેમના પ્રથમ કાર્યકાળમાં કડક નિયંત્રણો લાદ્યા હતા
તેમના પ્રથમ કાર્યકાળમાં ડોનાલ્ડ ટ્રમ્પે ઈરાન અને વિશ્વ શક્તિઓ વચ્ચેના 2018 ઈરાન પરમાણુ કરારમાંથી યુએસને પાછું ખેંચ્યું હતું. આ સમજૂતીમાં આર્થિક પ્રતિબંધો હળવા કરવાના બદલામાં ઈરાનના પરમાણુ કાર્યક્રમ પર કડક નિયંત્રણો લાદવામાં આવ્યા હતા. સમજૂતીમાંથી ખસી ગયા બાદ ટ્રમ્પે ફરીથી ઈરાન પર કડક પ્રતિબંધો લાદ્યા હતા. 2018 થી બંને દેશો વચ્ચે તણાવ વધ્યો. આમાં ગાઝામાં ઈઝરાયેલ-હમાસ સંઘર્ષમાં ઈરાન સમર્થિત જૂથોના નેતાઓ પર હુમલાનો સમાવેશ થાય છે. યુ.એસ. હાલમાં યમનમાં હુથી બળવાખોરો સામે હવાઈ હુમલાઓ કરી રહ્યું છે અને ઈરાનના પરમાણુ કાર્યક્રમ સામે સંભવિત લશ્કરી કાર્યવાહી અંગે ચિંતા રહે છે.