West Bengal Politics: પશ્ચિમ બંગાળની રાજનીતિનું કેન્દ્ર હાલમાં દિલ્હી બન્યું છે. એક તરફ INDIA ગઠબંધનની મહત્વપૂર્ણ બેઠક માટે તૃણમૂલ કોંગ્રેસ (TMC) સુપ્રીમો મમતા બેનર્જી અને અભિષેક બેનર્જી દિલ્હીમાં હાજર છે, તો બીજી તરફ પાર્ટીના કેટલાક સાંસદોને લઈને મોટા રાજકીય ફેરફારોની અટકળોએ જોર પકડ્યું છે. સૂત્રોના દાવા મુજબ, TMCના કેટલાક લોકસભા સાંસદોએ દિલ્હીમાં ભાજપના વરિષ્ઠ નેતા અને કેન્દ્રીય મંત્રી ભુપેન્દ્ર યાદવના નિવાસસ્થાને પશ્ચિમ બંગાળના વિપક્ષના નેતા શુભેન્દુ અધિકારી સાથે મુલાકાત કરી હતી. આ ઘટનાક્રમે પશ્ચિમ બંગાળની રાજનીતિમાં નવા સમીકરણોની ચર્ચા શરૂ કરી છે. ખાસ કરીને ત્યારે, જ્યારે TMCના વરિષ્ઠ નેતા અને રાજ્યસભાના સાંસદ સુખેન્દુ શેખર રોયે પક્ષ અને રાજ્યસભા બંનેમાંથી રાજીનામું આપ્યાની માહિતી સામે આવી છે.
ભુપેન્દ્ર યાદવના નિવાસસ્થાને બેઠકની ચર્ચા
સૂત્રોના જણાવ્યા અનુસાર, સોમવારના રોજ કેટલાક TMC સાંસદો કેન્દ્રીય મંત્રી ભુપેન્દ્ર યાદવના નિવાસસ્થાને પહોંચ્યા હતા. ત્યારબાદ પશ્ચિમ બંગાળના વિપક્ષના નેતા શુભેન્દુ અધિકારી પણ ત્યાં પહોંચ્યા હતા. રાજકીય વર્તુળોમાં એવી ચર્ચા છે કે, આ બેઠકમાં TMCના કુલ 14 લોકસભા સાંસદો હાજર રહ્યા હતા. જો કે, આ બેઠક અંગે કોઈ સત્તાવાર નિવેદન બહાર આવ્યું નથી, પરંતુ રાજકીય સૂત્રો આ મુલાકાતને મહત્વપૂર્ણ ગણાવી રહ્યા છે. બેઠકમાં ભાજપના નેતા અને ત્રિપુરાના પૂર્વ મુખ્યમંત્રી બિપ્લબ દેવ પણ હાજર હોવાનું કહેવાઈ રહ્યું છે.
સુખેન્દુ શેખર રોયના રાજીનામા બાદ વધ્યું રાજકીય તાપમાન
આ સમગ્ર ઘટનાક્રમ પહેલાં TMCમાંથી રાજીનામું આપનાર સુખેન્દુ શેખર રોય સાથે પણ કેટલાક સાંસદોએ મુલાકાત કરી હતી. મીડિયા અહેવાલો મુજબ, બર્દમાન પૂર્વની સાંસદ શર્મિલા સરકાર, હાવડાના સાંસદ પ્રસૂન બેનર્જી, કૂચબિહારના જગદીશ બસુનિયા, ઝારગ્રામના કાલિપદ સોરેન અને બાંકુરાના અરુપ ચક્રવર્તી સહિતના નેતાઓ તેમની મુલાકાતે પહોંચ્યા હતા. સુખેન્દુ શેખર રોય છેલ્લા એક દાયકાથી વધુ સમયથી TMCનું રાજ્યસભામાં પ્રતિનિધિત્વ કરતા હતા. તેમના રાજીનામાને કારણે પાર્ટીમાં આંતરિક અસંતોષની ચર્ચાઓ વધુ તેજ બની છે.
મમતા-સોનિયાની મુલાકાત વચ્ચે વધેલી અટકળો
દિલ્હીમાં એક તરફ INDIA ગઠબંધનની બેઠક ચાલી રહી છે, ત્યારે મમતા બેનર્જી અને કોંગ્રેસ નેતા સોનિયા ગાંધી વચ્ચે પણ મુલાકાત થઈ હતી. બંને નેતાઓની મુલાકાતના ફોટા અને વીડિયો સામે આવ્યા બાદ ગઠબંધનની એકતા અંગે ચર્ચા થઈ રહી છે. પરંતુ બીજી તરફ TMCના કેટલાક સાંસદોને લઈને ઉભી થયેલી અટકળોએ રાજકીય ચર્ચાનો વિષય બદલી નાખ્યો છે. જો આ દાવાઓમાં તથ્ય હશે તો પશ્ચિમ બંગાળની રાજનીતિમાં તેની મોટી અસર જોવા મળી શકે છે.
શું TMCમાં વધી રહ્યો છે આંતરિક અસંતોષ?
રાજકીય નિરીક્ષકોનું માનવું છે કે છેલ્લા કેટલાક સમયથી TMCમાં આંતરિક અસંતોષ અંગે ચર્ચાઓ ચાલી રહી છે. અગાઉ કેટલાક ધારાસભ્યો અને નેતાઓ દ્વારા પણ અસંતોષ વ્યક્ત કરવામાં આવ્યો હતો. હવે સાંસદોના સ્તરે આવી ચર્ચાઓ સામે આવતાં રાજકીય સમીકરણો બદલાઈ શકે છે. જો કે, હજુ સુધી TMC અથવા ભાજપ તરફથી આ બેઠક અને બળવાખોરીના દાવાઓ અંગે કોઈ સત્તાવાર સ્પષ્ટતા કરવામાં આવી નથી. આગામી દિવસોમાં આ સમગ્ર મામલે વધુ વિગતો સામે આવે તેવી શક્યતા છે.
