પર્યાવરણના રક્ષણ અને વધતા પ્રદૂષણને અંકુશમાં લેવા માટે મહારાષ્ટ્ર સરકાર દ્વારા બજેટમાં એક મોટો અને કડક નિર્ણય લેવામાં આવ્યો છે. સરકારના નવા આદેશ અનુસાર, હવે જૂના ખાનગી વાહનો પર લાગતો ગ્રીન ટેક્સ બમણો કરી દેવામાં આવ્યો છે. આ નિર્ણય પાછળનો મુખ્ય હેતુ માર્ગો પરથી પ્રદૂષણ ફેલાવતી જૂની ગાડીઓની સંખ્યા ઘટાડવાનો છે. સરકારે સ્પષ્ટ કર્યું છે કે નવી ગાડીઓની સરખામણીમાં જૂના વાહનો વધુ ધુમાડો અને હાનિકારક વાયુઓ છોડે છે, જેને કારણે આ કડક પગલું લેવું અનિવાર્ય બન્યું છે. આ સાથે જ જે લોકો પોતાની જૂની ગાડી ભંગારમાં આપીને (Scrap) નવું વાહન ખરીદશે, તેમને ટેક્સમાં આકર્ષક રાહત આપવાની પણ જાહેરાત કરવામાં આવી છે.
જૂની ગાડીઓ પર ગ્રીન ટેક્સનો ડબલ ફટકો
આગામી સમયમાં ખાસ કરીને BS-4 કે તેનાથી જૂના એન્જિન ધરાવતા વાહનોને નિશાન બનાવવામાં આવ્યા છે. સરકારી ડેટા મુજબ આવા વાહનો હવાની ગુણવત્તા બગાડવામાં મોટો ભાગ ભજવે છે. તેથી, ગ્રીન ટેક્સ વધારીને લોકોને નવા અને ઇકો-ફ્રેન્ડલી વાહનો ખરીદવા માટે પ્રોત્સાહિત કરવામાં આવી રહ્યા છે. મહારાષ્ટ્ર સરકારના આ નિર્ણયથી લાખો વાહનચાલકો પર આર્થિક બોજ વધવાની શક્યતા છે.
સ્ક્રેપેજ પોલિસી હેઠળ ટેક્સમાં મોટી છૂટ
સરકારે માત્ર ટેક્સ વધાર્યો નથી, પરંતુ જે લોકો પ્રદૂષણ ઘટાડવામાં સહયોગ આપશે તેમના માટે ફાયદાકારક યોજના પણ રજૂ કરી છે:
જો કોઈ વ્યક્તિ BS-4 કે તેનાથી નવી શ્રેણીનું જૂનું વાહન સ્ક્રેપ કરીને નવું વાહન ખરીદે છે, તો તેને ટેક્સમાં આશરે 16% સુધીની રાહત મળશે.
જ્યારે અત્યંત જૂની એટલે કે BS-3 કે તેથી જૂના મોડલની ગાડી સ્ક્રેપ કરવામાં આવશે, તો નવું વાહન લેતી વખતે ટેક્સમાં લગભગ 30% સુધીનો મોટો ફાયદો મળી શકે છે.
ઓટોમોબાઈલ સેક્ટરને મળશે વેગ
સરકારના મતે આ નિર્ણયથી પર્યાવરણની સાથે સાથે આર્થિક મોરચે પણ લાભ થશે. જૂની ગાડીઓ રસ્તા પરથી ઓછી થતા પ્રદૂષણ ઘટશે અને નવી ગાડીઓની માંગ વધવાથી ઓટોમોબાઈલ ઉદ્યોગમાં તેજી આવશે. વાહનચાલકોને આર્થિક પ્રોત્સાહન આપીને સરકાર નવી ટેકનોલોજી અને ઈલેક્ટ્રિક વાહનો તરફ લોકોને વાળવા માંગે છે.
