LPG Price India: ઇઝરાયેલ અને ઈરાન વચ્ચે ચાલી રહેલા યુદ્ધને કારણે હોર્મુઝ સ્ટ્રેટ (Hormuz Strait) બંધ છે. આનાથી વૈશ્વિક સપ્લાય ચેઇન પર માઠી અસર પડી છે અને વિશ્વભરમાં ક્રૂડ ઓઈલ તેમજ LPG ગેસનું સંકટ ઊભું થયું છે. દેશમાં સરકાર દ્વારા સામાન્ય જનતાને વારંવાર ખાતરી આપવામાં આવી રહી છે કે કોઈ પણ પ્રકારનું સંકટ નથી અને સપ્લાય સંપૂર્ણપણે સામાન્ય છે. આમ છતાં, LPG ડિલિવરી માટે લાગેલી લાંબી લાઈનોના વીડિયો સોશિયલ મીડિયા પર વાયરલ થઈ રહ્યા છે. હવે ઇન્ડિયન ઓઇલ કોર્પોરેશન (IOCL) દ્વારા જારી કરાયેલા નિવેદનમાં કહેવામાં આવ્યું છે કે ભૂ-રાજકીય તણાવ હોવા છતાં દેશમાં LPGનો સપ્લાય સ્થિર છે.
ઘરેલું LPG સિલિન્ડરને પ્રાથમિકતા
ઇન્ડિયન ઓઇલ (IOCL) દ્વારા જણાવવામાં આવ્યું છે કે સરકાર દ્વારા પર્યાપ્ત સપ્લાય સુનિશ્ચિત કરવામાં આવી છે. કંપનીએ ભારપૂર્વક જણાવ્યું કે ઘરેલું LPG સિલિન્ડરને સૌથી વધુ પ્રાથમિકતા આપવામાં આવી રહી છે. ઘરો સુધી LPGનો સપ્લાય કોઈ પણ અવરોધ વિના ચાલુ છે. IOCL એ માહિતી આપી કે હાલમાં દરરોજ અંદાજે 28 લાખ LPG સિલિન્ડરની ડિલિવરી કરવામાં આવી રહી છે. આ ઉપરાંત, 87% બુકિંગ ડિજિટલ પ્લેટફોર્મ દ્વારા થઈ રહ્યું છે.
આ પણ વાંચો: એક ક્લિકથી ઘરે આવશે LPG સિલિન્ડર : લાઇનમાં ઊભા રહેવાની જરૂર નહીં! જાણો કેવી રીતે મળશે લાભ
રેકોર્ડ સ્તરે પહોંચ્યા LPGના ભાવ
ઇન્ડિયન ઓઇલના જણાવ્યા અનુસાર, 7,500 થી વધુ તપાસ કરવાની સાથે 141 LPG ડિસ્ટ્રિબ્યુટર્સ સામે કાર્યવાહી કરવામાં આવી છે, જેમાંથી 5 ડિસ્ટ્રિબ્યુટર્સને સસ્પેન્ડ કરી દેવામાં આવ્યા છે. 28 ફેબ્રુઆરીએ શરૂ થયેલા ઈરાન-ઇઝરાયેલ યુદ્ધ બાદ વિશ્વભરમાં LPG સંકટ ઘેરાયું છે. ક્રૂડ ઓઈલના ભાવ વધીને 122 ડોલર પ્રતિ બેરલના રેકોર્ડ સ્તરે પહોંચી ગયા છે. છેલ્લા કેટલાક દિવસોમાં ભારતમાં પણ LPG ક્રાઈસિસ જેવી સ્થિતિ સર્જાઈ છે.
ઘરેલું સિલિન્ડરની કિંમતમાં 60 રૂપિયાનો વધારો
LPG સંકટને પહોંચી વળવા માટે સરકારે તાજેતરમાં ઘરેલું સિલિન્ડરની કિંમતમાં 60 રૂપિયાનો વધારો કરવાની સાથે બુકિંગનો સમયગાળો 21 દિવસથી વધારીને 25 દિવસ કરી દીધો છે. કિંમતમાં વધારા બાદ રાજધાની દિલ્હીમાં ઘરેલું સિલિન્ડરના ભાવ વધીને 913 રૂપિયા પર પહોંચી ગયા હતા.
આ પણ વાંચો: LPG સિલિન્ડરની અછતને પહોંચી વળવા સરકારનો એક્શન પ્લાન! : ESMA લાગુ અને નવા 6 મોટા નિયમો જાહેર
યુદ્ધ શરૂ થયા બાદ અત્યાર સુધીમાં તેલ કંપનીઓ દ્વારા કોમર્શિયલ ગેસ સિલિન્ડરમાં બે વાર ભાવવધારો કરવામાં આવ્યો છે. 1 એપ્રિલના રોજ જ તેમાં અંદાજે 200 રૂપિયાનો વધારો કરવામાં આવ્યો હતો, જેના કારણે કોમર્શિયલ સિલિન્ડરની કિંમત 2000 રૂપિયાને પાર થઈ ગઈ છે.
