સદ્દામ હુસૈનથી લઈને માદુરો સુધી : જે પણ અમેરિકાની સામે પડ્યું, તેમનું શું આવ્યું પરિણામ?

વિશ્વના સૌથી શક્તિશાળી દેશ તરીકે યુનાઇટેડ સ્ટેટ્સ ઓફ અમેરિકાએ અનેકવાર યુદ્ધ, આર્થિક પ્રતિબંધો અને ગુપ્ત ઓપરેશન્સ દ્વારા વૈશ્વિક રાજકારણને નવી દિશા આપી છે. ઇતિહાસ સાક્ષી છે કે જે પણ નેતાઓએ અમેરિકી હિતોને પડકાર્યા છે અથવા જેમને વોશિંગ્ટન માટે ખતરો માનવામાં આવ્યા છે, તેમણે ગંભીર પરિણામો ભોગવવા પડ્યા છે. તાજેતરમાં વેનેઝુએલાના રાષ્ટ્રપતિ નિકોલસ માદુરોની ધરપકડ આ યાદીમાં નવું નામ છે. ચાલો જાણીએ એવા નેતાઓ વિશે જેમણે અમેરિકા સાથે દુશ્મની વહોરી હતી.

નિકોલસ માદુરો: હવાઈ હુમલા બાદ ધરપકડ

અમેરિકા લાંબા સમયથી વેનેઝુએલામાં નિકોલસ માદુરોના શાસનને સરમુખત્યારશાહી ગણાવતું આવ્યું છે. માદુરો પર માનવાધિકાર ઉલ્લંઘન અને નાર્કો-ટેરરિઝમના ગંભીર આરોપો છે. તાજેતરમાં અમેરિકાએ ‘ઓપરેશન એબ્સોલ્યુટ રિઝોલ્વ’ (Operation Absolute Resolve) હેઠળ વેનેઝુએલા પર હવાઈ હુમલા કર્યા અને ત્યારબાદ માદુરો તેમજ તેમની પત્નીની અટકાયત કરી. હાલમાં તેમને ન્યૂયોર્ક લઈ જવામાં આવ્યા છે જ્યાં તેમની પર કાયદાકીય કાર્યવાહી હાથ ધરાશે.

સદ્દામ હુસૈન: સત્તા પલટો અને ફાંસી

અમેરિકી હસ્તક્ષેપનું સૌથી મોટું ઉદાહરણ ઈરાકના પૂર્વ રાષ્ટ્રપતિ સદ્દામ હુસૈન છે. 1990 માં કુવૈત પર આક્રમણ કર્યા બાદ સદ્દામ અમેરિકાની નજરમાં ખટકાવા લાગ્યા હતા. 2003 માં અમેરિકાએ ઈરાક પાસે વિનાશક હથિયારો હોવાનો દાવો કરીને હુમલો કર્યો. ડિસેમ્બર 2003 માં સદ્દામ હુસૈન તિકરિત પાસે એક બંકરમાંથી પકડાયા હતા. માનવતા વિરુદ્ધના ગુનાઓ માટે ઈરાકી કોર્ટમાં કેસ ચાલ્યો અને 30 ડિસેમ્બર 2006 ના રોજ તેમને ફાંસી આપવામાં આવી હતી.

મેન્યુઅલ નોરીએગા: મિત્રમાંથી દુશ્મન બન્યા

પનામાના મેન્યુઅલ નોરીએગા એક સમયે અમેરિકાના સાથી અને CIA ના એજન્ટ હતા. પરંતુ ડ્રગ્સની હેરાફેરી અને ગુપ્ત માહિતી લીક કરવાના આરોપો બાદ અમેરિકાએ તેમની વિરુદ્ધ ‘ઓપરેશન જસ્ટ કોઝ’ શરૂ કર્યું. 1989 માં પનામા પર હુમલો કરીને નોરીએગાને સત્તા પરથી હટાવી દેવામાં આવ્યા. તેમણે લાંબો સમય અમેરિકી જેલોમાં વિતાવ્યો અને 2017 માં તેમનું અવસાન થયું.

જુઆન ઓર્લેન્ડો હર્નાન્ડેઝ: કાયદાકીય ગાળિયો

હોન્ડુરાસના પૂર્વ રાષ્ટ્રપતિ જુઆન ઓર્લેન્ડો હર્નાન્ડેઝ પર મોટા પાયે ડ્રગ્સની તસ્કરીના આરોપ હેઠળ 2022 માં અમેરિકાને સોંપવામાં આવ્યા હતા. જોકે ડિસેમ્બર 2025 માં તેમને તત્કાલીન રાષ્ટ્રપતિ ડોનાલ્ડ ટ્રમ્પ દ્વારા વિવાદાસ્પદ માફી મળી હતી, પરંતુ હોન્ડુરાસ સત્તાવાળાઓએ તાત્કાલિક આંતરરાષ્ટ્રીય ધરપકડ વોરંટ જારી કરીને કાયદાકીય પ્રક્રિયા ચાલુ રાખી હતી.