કચ્છમાં ડ્રગ્સનાં પેકેટ્સ મળ્યા બાદ મળી બિનવારસી પાકિસ્તાની બોટ : સુરક્ષા એજન્સીઓનું રાઉન્ડ ધ ક્લોક પેટ્રોલિંગ

કચ્છના ક્રિક વિસ્તારમાં તાજેતરમાં ડ્રગ્સના પેકેટો મળ્યા બાદ હવે બિનવારસી પાકિસ્તાની બોટ મળી આવતા સુરક્ષા એજન્સીઓમાં ચકચાર મચી ગઈ છે. BSF દ્વારા પેટ્રોલિંગ દરમિયાન આ બોટ મળી આવી હતી જેને લઈને સમગ્ર વિસ્તારમાં સતર્કતા વધારવામાં આવી છે. પ્રાથમિક માહિતી મુજબ, બીએસએફના જવાનો નિયમિત પેટ્રોલિંગ પર હતા ત્યારે ક્રિક વિસ્તાર નજીક આ શંકાસ્પદ બોટ નજરે ચઢી હતી. તરત જ ટીમે સ્થળ પર પહોંચી તપાસ હાથ ધરી હતી. બોટમાં કોઈ વ્યક્તિ હાજર નહોતો, જેના કારણે તેને બિનવારસુ ગણાવવામાં આવી છે.

પ્રાથમિક તપાસમાં શું મળ્યું?

BSF દ્વારા કરવામાં આવેલી પ્રાથમિક તપાસમાં બોટમાંથી માછીમારી સંબંધિત સાધનો મળી આવ્યા છે. જોકે અત્યાર સુધી બોટમાંથી કોઈ શંકાસ્પદ સામગ્રી કે ગેરકાયદેસર વસ્તુ મળી આવી નથી. છતાં, તાજેતરમાં કચ્છમાં ડ્રગ્સના જથ્થા મળવાના બનાવોને ધ્યાનમાં રાખીને આ ઘટના ગંભીરતાથી લેવામાં આવી રહી છે. સુરક્ષા એજન્સીઓ આ બોટનો સ્ત્રોત અને તે અહીં સુધી કેવી રીતે પહોંચી તેની તપાસ કરી રહી છે. પાકિસ્તાન તરફથી આવતી બોટ હોવાને કારણે આંતરરાષ્ટ્રીય સીમા સુરક્ષા દ્રષ્ટિએ પણ આ મુદ્દો મહત્વપૂર્ણ બની ગયો છે.

આ પણ વાંચો: જીવરાજ બ્રિજ હત્યા કેસમાં 3 ની ધરપકડ : ગર્ભપાતના વિવાદે લીધો વેવાઈનો જીવ

સુરક્ષા વધુ કડક

આ ઘટના બાદ કચ્છના દરિયાઈ વિસ્તારમાં સુરક્ષા વ્યવસ્થા વધુ કડક બનાવવામાં આવી છે. BSF સહિતની અન્ય સુરક્ષા એજન્સીઓ દ્વારા રાઉન્ડ ધ ક્લોક પેટ્રોલિંગ શરૂ કરવામાં આવ્યું છે જેથી કોઈ પણ શંકાસ્પદ પ્રવૃત્તિ પર તાત્કાલિક કાર્યવાહી કરી શકાય. ખાસ કરીને ક્રિક વિસ્તાર સંવેદનશીલ માનવામાં આવે છે, જ્યાંથી ગેરકાયદેસર ઘૂસણખોરી અથવા ડ્રગ્સની હેરાફેરીના પ્રયાસો થઈ શકે છે. તેથી સુરક્ષા દળો વધુ સતર્ક બની ગયા છે.

આ પણ વાંચો: રિક્ષાની રાહ જોતી યુવતી પર ફિલ્મી ઢબે જીવલેણ હુમલો : ધોળા દિવસે યુવતીને પરાણે ઝેર પીવડાવી પેટમાં ચપ્પુના ઘા ઝીંક્યા

ડ્રગ્સ પછી બોટ મળતા વધતી ચિંતા

તાજેતરમાં કચ્છમાં દરિયાઈ માર્ગે ડ્રગ્સના પેકેટો મળી આવ્યા હતા, જેના કારણે પહેલેથી જ સુરક્ષા એજન્સીઓ એલર્ટ પર હતી. હવે બિનવારસુ પાકિસ્તાની બોટ મળતાં સુરક્ષા ચિંતાઓ વધુ વધી ગઈ છે. આવી ઘટનાઓ વચ્ચે કોઈ સીધી કડી છે કે નહીં તે તપાસ બાદ જ સ્પષ્ટ થશે પરંતુ સતત મળી રહેલા સંકેતોને કારણે દરિયાઈ સુરક્ષા મજબૂત બનાવવી જરૂરી બની ગઈ છે.

સુરક્ષા એજન્સીઓ દ્વારા બોટની સંપૂર્ણ તપાસ અને ફોરેન્સિક વિશ્લેષણ કરવામાં આવી રહ્યું છે. સાથે જ આસપાસના વિસ્તારોમાં પણ સઘન સર્ચ ઓપરેશન હાથ ધરવામાં આવ્યું છે. પ્રશાસને સ્થાનિક માછીમારો અને રહેવાસીઓને પણ ચેતવણી આપી છે કે કોઈપણ શંકાસ્પદ વસ્તુ અથવા પ્રવૃત્તિ અંગે તરત જ જાણ કરે. આવનારા દિવસોમાં આ મામલે વધુ વિગતો સામે આવી શકે છે.