કુણાલ કામરા પર આફત જ આફત : અપશબ્દો બોલ્યો હોવાનો શિવસેનાનો આરોપ

સ્ટેન્ડ-અપ કોમેડિયન કુણાલ કામરાના કેસમાં શિવસેના નેતા મનીષા કાયંદેએ દાવો કર્યો છે કે તેણે વીડિયોમાં અપશબ્દ પણ કહ્યાં હતા અને જો જરૂર પડશે તો પક્ષ તેમની વિરુદ્ધ કાનૂની કાર્યવાહી પણ કરશે. મનીષાએ આરોપ લગાવ્યો છે કે કુણાલ કામરાની પાછળ કેટલાક લોકો છે, જેમના કહેવા પર તે આ બધું કરી રહ્યો છે.

કામરાએ માફી માંગવાનો ઈનકાર કર્યો
કામરાએ એક શોમાં નામ લીધા વગર મહારાષ્ટ્રના નાયબ મુખ્યમંત્રી એકનાથ શિંદે વિરુદ્ધ ટિપ્પણી કરી હતી. શિવસેનાએ આ વીડિયો પર નારાજગી વ્યક્ત કરી છે. જે પછી તેના સ્ટુડિયોમાં પણ તોડફોડ કરવામાં આવી હતી. આ પછી એવી અટકળો ચાલી રહી હતી કે તેઓ માફી માંગીને મામલાને શાંત કરશે, પરંતુ આવું થયું નહીં. એક નિવેદન અનુસાર, કામરાએ માફી માંગવાનો ઇનકાર કર્યો છે. જોકે, તેમણે કહ્યું હતું કે તેઓ પોલીસને સહકાર આપવા તૈયાર છે.

અપમાનજનક ભાષાનો ઉપયોગ કરવાનો અધિકાર નથીઃ શિવસેના
આ અંગે પ્રતિક્રિયા આપતા શિવસેના નેતા મનીષા કાયંદેએ કહ્યું, "અમે આ મામલાને દરેક રીતે આગળ લઈ જઈશું. જો જરૂર પડશે તો અમે તેને કાયદાકીય રીતે કરીશું. જે પણ રીતની જરૂર પડશે, અમે આગળ વધીશું કારણ કે બંધારણ કોઈને પણ અપમાનજનક ભાષાનો ઉપયોગ કરવાનો અધિકાર આપતું નથી. જો તમે કુણાલ કામરાનો વીડિયો ધ્યાનથી જોશો, તો તે દર્શાવે છે કે તેણે પણ દુર્વ્યવહાર કર્યો છે. શું બંધારણ આપણને કોમેડીની આડમાં કોઈને પણ ગાળો આપવાની સત્તા આપે છે?