કલકત્તા હાઈકોર્ટ : બકરી ઈદ પર ગાયની કુરબાની અનિવાર્ય નથી

બકરી ઈદ પર ગાયની કુરબાની ઇસ્લામનો અનિવાર્ય ભાગ નથી: કલકત્તા હાઈકોર્ટ

બકરી ઈદ ના તહેવાર પહેલા પશ્ચિમ બંગાળમાં પશુવધ સંબંધિત સરકારી ગાઈડલાઈન પર રોક લગાવવાનો કલકત્તા હાઈકોર્ટે સ્પષ્ટ ઇનકાર કરી દીધો છે. ચીફ જસ્ટિસ સુજય પોલ અને જસ્ટિસ પાર્થ સારથીની બેન્ચે સુપ્રીમ કોર્ટના જૂના ચુકાદાનો હવાલો આપતા જણાવ્યું કે, ઈદ-ઉલ-જુહા (બકરી ઈદ) પર ગાયની કુરબાની આપવી એ ઇસ્લામ ધર્મનો અનિવાર્ય ભાગ નથી. કોર્ટે સ્પષ્ટ કર્યું છે કે યોગ્ય 'ફિટનેસ સર્ટિફિકેટ' વિના ગાય, ભેંસ, બળદ કે વાછરડાનો વધ કરી શકાશે નહીં અને જાહેર સ્થળો પર પશુવધ સંપૂર્ણપણે પ્રતિબંધિત રહેશે.

બીજી તરફ, પૂર્વ તૃણમૂલ નેતા અને ધારાસભ્ય હુમાયુ કબીરે આ સરકારી ગાઈડલાઈનનો વિરોધ કરીને કોઈપણ ભોગે કુરબાની આપવાની ધમકી આપી છે, જેની સામે ભાજપે પણ આક્રમક વલણ અપનાવતા કહ્યું છે કે ગેરકાયદેસર કતલખાના ચાલવા દેવામાં આવશે નહીં.

પશુવધ માટે કડક નિયમો અને દંડની જોગવાઈ

પશ્ચિમ બંગાળ સરકારે 13 મેના રોજ ગૌહત્યા પર પ્રતિબંધ અને પશુવધ નિયંત્રણ અંગેની નોટિસ જાહેર કરી હતી. આ નિયમો હેઠળ:

• પશુની ઉંમર 14 વર્ષથી વધુ હોય, તે પ્રજનન માટે અસમર્થ હોય કે અસાધ્ય રોગથી પીડાતું હોય, ત્યારે જ સરકારી પશુચિકિત્સક અને સ્થાનિક પંચાયત/નગરપાલિકાના પ્રમુખની મંજૂરીથી 'ફિટનેસ સર્ટિફિકેટ' મળશે.

• પશુવધ માત્ર સરકાર માન્ય કતલખાના (Slaughterhouse)માં જ કરી શકાશે. જાહેર સ્થળો પર પ્રતિબંધ રહેશે.

• નિયમોનું ઉલ્લંઘન કરનારને 6 મહિના સુધીની જેલ, 1000 રૂપિયા સુધીનો દંડ અથવા બંને સજા થઈ શકે છે.

પશ્ચિમ બંગાળના આજના 5 મોટા સમાચાર

1. તમામ મદરેસાઓમાં 'વંદે માતરમ' ફરજિયાત

પશ્ચિમ બંગાળ સરકારે મોટો નિર્ણય લેતા રાજ્યની તમામ સરકારી, સહાયિત અને બિન-સહાયિત મદરેસાઓમાં સવારની પ્રાર્થના દરમિયાન 'વંદે માતરમ' ગાવું ફરજિયાત બનાવ્યું છે. આ નિયમ તાત્કાલિક અસરથી લાગુ કરવામાં આવ્યો છે.

2. મંજૂરી વિના મીડિયાને માહિતી આપવા પર પ્રતિબંધ

રાજ્યના સરકારી કર્મચારીઓ હવે ઉચ્ચ અધિકારીઓની પૂર્વ મંજૂરી વિના મીડિયા સાથે કોઈ પણ સરકારી માહિતી સીધી કે આડકતરી રીતે શેર કરી શકશે નહીં. સરકાર દ્વારા આ અંગે કડક આદેશ જારી કરાયા છે.

3. રથ હત્યાકાંડમાં વધુ એક આરોપી ઝડપાયો

શુભેન્દુ અધિકારીના પૂર્વ પર્સનલ આસિસ્ટન્ટ ચંદ્રનાથ રથની હત્યાના કેસમાં CBIએ મોટી કાર્યવાહી કરી છે. આ કેસના વધુ એક આરોપી નવીન કુમાર સિંહ (35 વર્ષ)ની ઉત્તર પ્રદેશના બલિયામાંથી ધરપકડ કરવામાં આવી છે.

4. ફાલતા બેઠક પર રીપોલિંગમાં 88.13% ભારે મતદાન

પશ્ચિમ બંગાળની ફાલતા વિધાનસભા બેઠક પર ગુરુવારે ફરીથી મતદાન પ્રક્રિયા હાથ ધરવામાં આવી હતી. આ રિપોલિંગમાં મતદારોનો ભારે ઉત્સાહ જોવા મળ્યો હતો અને રાત્રે 10:30 વાગ્યા સુધીમાં રેકોર્ડબ્રેક 88.13% મતદાન નોંધાયું હતું.

5. આરજીકર મેડિકલ કેસમાં CBIની નવી SIT તપાસ કરશે

કલકત્તા હાઈકોર્ટે આરજીકર મેડિકલ કોલેજ રેપ-મર્ડર કેસને દબાવવાના લાગેલા આરોપો પર કડક વલણ અપનાવ્યું છે. કોર્ટે CBIના પૂર્વીય ક્ષેત્રના જોઈન્ટ ડાયરેક્ટરના નેતૃત્વમાં 3 સભ્યોની નવી SIT (સ્પેશિયલ ઇન્વેસ્ટિગેશન ટીમ)ની રચના કરીને 25 જૂન સુધીમાં અહેવાલ સોંપવા આદેશ કર્યો છે.