મધ્યપ્રદેશની રાજધાની ભોપાલમાં ટ્વિશા શર્માના મોતનો કેસ હવે માત્ર આત્મહત્યા કે કુટુંબ વિવાદનો મુદ્દો રહ્યો નથી. આ કેસે પોલીસ, ન્યાયવ્યવસ્થા અને સમગ્ર પ્રશાસનને ઝંઝોળી નાખ્યું છે. એક મોડેલ, કોર્પોરેટ પ્રોફેશનલ અને નવા સપનાઓ સાથે લગ્નજીવન શરૂ કરનાર યુવતીનું રહસ્યમય મોત હવે દેશભરમાં ચર્ચાનો વિષય બન્યું છે. બીજી તરફ, આરોપો એવા લોકો પર છે જેમનું કાનૂની અને પ્રશાસનિક પ્રભાવશાળી બેકગ્રાઉન્ડ છે. હવે આ કેસ CBI સુધી પહોંચતા વધુ ગંભીર બની ગયો છે.
કોણ હતી ટ્વિશા શર્મા?
33 વર્ષની ટ્વિશા શર્મા મૂળ નોઈડાની રહેવાસી હતી. તેઓ MBA ગ્રેજ્યુએટ, મોડેલ, યોગા ટ્રેનર અને પૂર્વ “Miss Pune” સ્પર્ધક રહી ચૂકી હતી. તેમણે માર્કેટિંગ અને એક્ટિંગ ક્ષેત્રમાં પણ કામ કર્યું હતું. સોશિયલ મીડિયા અને મોડેલિંગ સર્કલમાં ટ્વિશાની ઓળખ સક્રિય અને આત્મવિશ્વાસી યુવતી તરીકે હતી.
ટ્વિશાની મુલાકાત ડેટિંગ એપ દ્વારા ભોપાલના વકીલ સમર્થ સિંહ સાથે થઈ હતી. મિત્રતા પ્રેમમાં બદલાઈ અને ડિસેમ્બર 2025માં બંનેએ લવ મેરેજ કર્યા. લગ્ન બાદ ટ્વિશા ભોપાલના કટારા હિલ્સ વિસ્તારમાં સસરાના ઘરે રહેવા આવી હતી.
સમર્થ સિંહ મધ્યપ્રદેશ સરકારમાં પૂર્વ લીગલ એડવાઇઝર રહી ચૂક્યો છે, જ્યારે તેની માતા ગિરિબાલા સિંહ નિવૃત્ત જજ છે અને હાલમાં ભોપાલ કન્ઝ્યુમર કમિશનની અધ્યક્ષ રહી ચૂકી છે. આ કારણે કેસને હાઈપ્રોફાઇલ માનવામાં આવી રહ્યો છે.
ટ્વિશા કેવી રીતે મળી મૃત હાલતમાં?
ઘટનાની શરૂઆત ત્યારે થઈ જ્યારે ભોપાલના કટારા હિલ્સ સ્થિત ઘરે ટ્વિશા શર્મા ફાંસી પર લટકતી હાલતમાં મળી આવી. સસરા પક્ષે આને આત્મહત્યા ગણાવી, જ્યારે ટ્વિશાના પરિવારજનોએ સીધો દહેજ માટે હત્યાનો આરોપ લગાવ્યો.
ટ્વિશાના પિતા નવનીધિ શર્માએ આરોપ મૂક્યો કે લગ્ન પછીથી જ તેમની દીકરીને માનસિક અને આર્થિક રીતે હેરાન કરવામાં આવતી હતી. પરિવારનું કહેવું છે કે ટ્વિશા પર દહેજ માટે સતત દબાણ કરવામાં આવતું હતું.
બીજી તરફ, સસરા પક્ષે દાવો કર્યો કે ટ્વિશા ડ્રગ્સની આદત ધરાવતી હતી અને માનસિક રીતે પરેશાન હતી. જોકે ટ્વિશાના પરિવારજનોએ આ આરોપોને સંપૂર્ણપણે નકારી કાઢ્યા.
10 દિવસમાં કેસે લીધા મોટા વળાંકો
આ કેસ છેલ્લા 10 દિવસમાં ઝડપથી બદલાતી પરિસ્થિતિઓને કારણે દેશભરમાં ચર્ચામાં આવ્યો છે.
1. FIR અને દહેજ હત્યાના આરોપ
ટ્વિશાના પરિવારની ફરિયાદ બાદ પોલીસએ દહેજ પ્રથા અને શંકાસ્પદ મોત સંબંધિત કલમો હેઠળ FIR નોંધાવી. તેમાં પતિ સમર્થ સિંહ, તેની માતા ગિરિબાલા સિંહ અને અન્ય પરિવારજનોના નામ સામેલ કરવામાં આવ્યા.
2. પતિ સમર્થ સિંહ ફરાર
FIR બાદ સમર્થ સિંહ ગાયબ થઈ ગયો હતો. પોલીસે તેની માહિતી આપનાર માટે 30 હજાર રૂપિયાનું ઇનામ જાહેર કર્યું હતું. તેની સામે લુકઆઉટ નોટિસ જેવી કાર્યવાહી પણ શરૂ થઈ હતી.
3. પાસપોર્ટ રદ કરવાની કાર્યવાહી
પોલીસને આશંકા હતી કે સમર્થ દેશ છોડવાનો પ્રયાસ કરી શકે છે. તેથી તેની પાસપોર્ટ રદ કરવાની પ્રક્રિયા માટે કોર્ટનો સંપર્ક કરવામાં આવ્યો.
4. રિટાયર્ડ જજ માતાને જામીન
સમર્થ સિંહની માતા અને નિવૃત્ત જજ ગિરિબાલા સિંહને ભોપાલ કોર્ટ દ્વારા જામીન આપવામાં આવ્યા. આ નિર્ણય બાદ કેસ વધુ રાજકીય અને કાનૂની ચર્ચામાં આવ્યો.
5. હાઈકોર્ટમાંથી એન્ટિસિપેટરી બેલ અરજી પરત
સમર્થ સિંહે હાઈકોર્ટમાં આગોતરા જામીન માટે અરજી કરી હતી, પરંતુ બાદમાં તે અરજી પાછી ખેંચી લીધી.
6. જબલપુર કોર્ટમાં સરેન્ડરનો પ્રયાસ
શુક્રવારે સમર્થ સિંહ જબલપુર જિલ્લા કોર્ટમાં સરેન્ડર કરવા પહોંચ્યો હોવાનું તેના વકીલે જણાવ્યું. જોકે ટ્વિશાના પરિવારના વકીલે આનો વિરોધ કર્યો અને કહ્યું કે સમર્થને ભોપાલ કોર્ટ અથવા તપાસ અધિકારી સમક્ષ જ આત્મસમર્પણ કરવું જોઈએ.
બાર કાઉન્સિલનો મોટો નિર્ણય
કેસ ગંભીર બનતા બાર કાઉન્સિલ ઓફ ઇન્ડિયાએ પણ કાર્યવાહી કરી છે. સમર્થ સિંહનું વકીલાત લાયસન્સ સસ્પેન્ડ કરવામાં આવ્યું છે. હવે તે કોર્ટમાં પ્રેક્ટિસ કરી શકશે નહીં અને કોઈ વકલાતનામું પણ દાખલ કરી શકશે નહીં.
આ નિર્ણયને કાનૂની ક્ષેત્રમાં મહત્વપૂર્ણ માનવામાં આવી રહ્યો છે કારણ કે આ પ્રકારની કાર્યવાહી સામાન્ય રીતે ગંભીર આરોપો અને વ્યવસાયિક આચરણના મુદ્દાઓમાં જ લેવામાં આવે છે.
સરકાર દ્વારા CBI તપાસની ભલામણ
કેસને લઈને વધતા દબાણ અને જનઆક્રોશ વચ્ચે મધ્યપ્રદેશ સરકારે મામલો CBIને સોંપવાની ભલામણ કેન્દ્ર સરકારને મોકલી છે. ટ્વિશાના પરિવારજનોએ શરૂઆતથી જ નિષ્પક્ષ તપાસની માંગ કરી હતી.
પરિવારનું માનવું છે કે આરોપી પક્ષ પ્રભાવશાળી હોવાથી સ્થાનિક તપાસ પર વિશ્વાસ રાખવો મુશ્કેલ છે. હવે CBI તપાસથી કેસમાં નવા ખુલાસા થવાની શક્યતા વધી છે.
