T20 World Cup 2026 : ICC T20 વર્લ્ડ કપ 2026 ના શરૂઆતમાં હવે થોડાક જ દિવસો બાકી રહ્યા છે. 7 ફેબ્રુઆરીથી શરૂ થનારા આ મેગા ટુર્નામેન્ટમાં કુલ 20 ટીમો વિશ્વ વિજેતા બનવા માટે મેદાને ઉતરશે. ભારત અને શ્રીલંકા દ્વારા સંયુક્ત રીતે યોજાનાર આ વર્લ્ડ કપ માટે તમામ ટીમોએ પોતાના સ્ક્વોડ અને કેપ્ટનોની જાહેરાત કરી દીધી છે. ટીમ ઈન્ડિયાએ સૌથી પહેલા 20 ડિસેમ્બરે પોતાની ટીમ જાહેર કરી હતી, જ્યારે શ્રીલંકાએ સૌથી છેલ્લે 2 ફેબ્રુઆરીએ પોતાની ટીમની જાહેરાત કરી છે.
ગ્રુપ A
ભારતની કમાન આ વખતે 35 વર્ષીય સૂર્યકુમાર યાદવના હાથમાં છે. રોહિત શર્માના રિટાયરમેન્ટ પછી સૂર્યા પર ખિતાબ બચાવવાની મોટી જવાબદારી છે. પાકિસ્તાનની ટીમનું નેતૃત્વ 32 વર્ષીય સલમાન અલી આગા કરશે. આ સિવાય ગ્રુપ A માં નામિબિયાના ગેરહાર્ડ ઈરાસ્મસ (30 વર્ષ), નેધરલેન્ડના સ્કોટ એડવર્ડ્સ (29 વર્ષ) અને યુએસએના મોનાંક પટેલ (32 વર્ષ) પોતાની ટીમોની આગેવાની કરશે. ખાસ વાત એ છે કે, મોનાંક પટેલ મૂળ ગુજરાતનો ખેલાડી છે.
ગ્રુપ B
ગ્રુપ B માં ઓસ્ટ્રેલિયાની ટીમ મિચેલ માર્શ (34 વર્ષ) ની કેપ્ટનશીપમાં રમશે. આયર્લેન્ડના અનુભવી ખેલાડી પોલ સ્ટર્લિંગ (35 વર્ષ) ટીમનું નેતૃત્વ કરશે. ઓમાન માટે જતિન્દર સિંહ (36 વર્ષ), શ્રીલંકા માટે દાસુન શનાકા (36 વર્ષ) અને ઝિમ્બાબ્વે માટે સ્ટાર ઓલરાઉન્ડર સિકંદર રઝા (39 વર્ષ) કેપ્ટન તરીકેની ભૂમિકા ભજવશે.
ગ્રુપ C
આ ગ્રુપ ખૂબ જ રસપ્રદ છે કારણ કે, અહીં અનુભવ અને યુવાનીનો સંગમ જોવા મળશે. ઈટાલીના વેઈન મેડસેન (42 વર્ષ) આ વર્લ્ડકપના સૌથી મોટી ઉંમરના કેપ્ટન છે. જ્યારે નેપાળના રોહિત પૌડેલ (23 વર્ષ) સૌથી યુવા કેપ્ટનોમાંના એક છે. ઈંગ્લેન્ડની કમાન હેરી બ્રુક પાસે હશે, વેસ્ટ ઈન્ડિઝનું નેતૃત્વ શાઈ હોપ કરશે અને સ્કોટલેન્ડની જવાબદારી રિચી બેરિંગ્ટન પર રહેશે.
ગ્રુપ D
અફઘાનિસ્તાનની ટીમ સ્ટાર સ્પિનર રાશિદ ખાન (27 વર્ષ) ની આગેવાનીમાં મેદાનમાં ઉતરશે. કેનેડાની ટીમનું નેતૃત્વ પંજાબમાં જન્મેલા 23 વર્ષીય દિલપ્રીત બાજવા કરશે. ન્યુઝીલેન્ડ માટે મિચેલ સેન્ટનર, સાઉથ આફ્રિકા માટે એડન માર્કરામ અને યુએઈ માટે મુહમ્મદ વસિમ કેપ્ટનશીપ કરતા જોવા મળશે.
ખાસ રેકોર્ડ્સ પર એક નજર
આ વર્લ્ડ કપમાં વયના તફાવતની વાત કરીએ તો ઈટાલીના કેપ્ટન વેઈન મેડસેન (42 વર્ષ) સૌથી અનુભવી છે, જ્યારે નેપાળના રોહિત પૌડેલ અને કેનેડાના દિલપ્રીત બાજવા (બંને 23 વર્ષ) સૌથી યુવા સુકાનીઓ છે. ભારત માટે સૂર્યકુમાર યાદવની આ પ્રથમ મોટી ટૂર્નામેન્ટ હશે જેમાં તે કેપ્ટન તરીકે જોવા મળશે.
