કેતન અગ્રવાલ હત્યા કેસમાં સિયા-ચેતનનો લાઇ ડિટેક્ટર ટેસ્ટ થશે
પુણેના ચર્ચિત કેતન અગ્રવાલ હત્યા કેસમાં તપાસ વધુ તેજ બની છે. પોલીસે મુખ્ય આરોપી સિયા ગોયલ (20) અને તેના કથિત પ્રેમી ચેતન ચૌધરી (22)નો લાઇ ડિટેક્ટર (પોલીગ્રાફ) ટેસ્ટ કરાવવા માટે કાનૂની પ્રક્રિયા શરૂ કરી છે. પોલીસનું માનવું છે કે આ ટેસ્ટથી કેસના ઘણા મહત્વના પ્રશ્નોના જવાબ મળી શકે છે.
પોલીસ બંનેના નિવેદનોની કરશે તપાસ
પોલીસના જણાવ્યા અનુસાર, લાઇ ડિટેક્ટર ટેસ્ટ બાદ બંને આરોપીઓના નિવેદનોની સરખામણી કરવામાં આવશે. તપાસ અધિકારીઓનું કહેવું છે કે આ પ્રક્રિયાથી હત્યાના સમગ્ર કાવતરાને સમજવામાં મદદ મળી શકે છે.
હાલ સિયા ગોયલ અને ચેતન ચૌધરી 3 July સુધી પોલીસ કસ્ટડીમાં છે અને તપાસ સતત ચાલુ છે.
મંગેતર કેતનનો મોબાઇલ પણ તપાસ હેઠળ
તપાસ દરમિયાન સામે આવ્યું છે કે કેતન અગ્રવાલના મોત બાદ તેનો મોબાઇલ ફોન થોડા સમય સુધી સિયા ગોયલ પાસે હતો. બાદમાં તેણે આ ફોન કેતનના પરિવારને પરત આપ્યો હતો. હવે પોલીસ તપાસ કરી રહી છે કે ફોન સિયા પાસે હતો ત્યારે તેમાં રહેલો કોઈ મહત્વનો ડેટા ડિલીટ કરવામાં આવ્યો હતો કે તેની સાથે કોઈ છેડછાડ કરવામાં આવી હતી.
ઘટનાસ્થળ પર કરાયું ક્રાઇમ સીન રિક્રિએશન
પોલીસે તાજેતરમાં ચેતન ચૌધરીને લોહગઢ કિલ્લા પર લઈ જઈ સમગ્ર ઘટનાનું પુનઃનિર્માણ કર્યું હતું. આ પહેલાં સિયા ગોયલ સાથે પણ ક્રાઇમ સીન રિક્રિએશન કરવામાં આવ્યું હતું, જેમાં ડમીનો ઉપયોગ કરીને ઘટનાક્રમ ફરીથી દર્શાવવામાં આવ્યો હતો. પોલીસનું કહેવું છે કે આ કાર્યવાહીનો હેતુ આરોપીઓના નિવેદનો અને ઘટનાસ્થળ પરથી મળેલા પુરાવાની ચકાસણી કરવાનો છે.
