BJP Tamil Nadu: તમિલનાડુ ભાજપના પૂર્વ પ્રદેશ પ્રમુખ કે. અન્નામલાઈ ફરી એકવાર રાજકીય ચર્ચાના કેન્દ્રમાં આવ્યા છે. દિલ્હીમાં ભાજપના ટોચના નેતાઓ સાથે તેમની સંભવિત મુલાકાત અને પક્ષ છોડવાની અટકળોએ રાજ્યના રાજકારણમાં નવી ગરમાવો પેદા કર્યો છે. રાજકીય વર્તુળોમાં ચર્ચા ચાલી રહી છે કે અન્નામલાઈ હવે સ્વતંત્ર રાજકીય માર્ગ અપનાવવાનો નિર્ણય લઈ શકે છે. દિલ્હી પહોંચેલા અન્નામલાઈ ભાજપના વરિષ્ઠ નેતાઓ સાથે મુલાકાત કરીને પોતાના રાજકીય ભવિષ્ય અંગે મહત્વપૂર્ણ ચર્ચા કરી શકે છે. જોકે તેમણે હજુ સુધી કોઈ સત્તાવાર જાહેરાત કરી નથી, પરંતુ “આગામી થોડા દિવસોમાં બધું સ્પષ્ટ થઈ જશે” એવું નિવેદન આપીને અટકળોને વધુ વેગ આપ્યો છે. તે દરમિયાન મદુરાઈ અને કોયમ્બતુર સહિતના વિસ્તારોમાં તેમના સમર્થકો દ્વારા પોસ્ટરો લગાવવામાં આવ્યા છે, જેમાં અન્નામલાઈને તમિલનાડુને “બચાવવા માટે નવું અવતાર ધારણ” કરવાની અપીલ કરવામાં આવી છે. તેમના 4 જૂનના જન્મદિવસે કોઈ મોટી રાજકીય જાહેરાત થવાની પણ ચર્ચા ચાલી રહી છે.
AIADMK સાથેના ગઠબંધનનો વિરોધ
અન્નામલાઈ લાંબા સમયથી ભાજપ અને AIADMK વચ્ચેના ગઠબંધનના વિરોધી રહ્યા છે. 2024ની લોકસભા ચૂંટણીમાં ભાજપે તમિલનાડુમાં સ્વતંત્ર રીતે ચૂંટણી લડી હતી, પરંતુ એક પણ બેઠક જીતી શકી નહોતી. આ ચૂંટણીમાં અન્નામલાઈ પોતે પણ કોયમ્બતુર બેઠક પરથી પરાજિત થયા હતા. રાજકીય વિશ્લેષકોના મતે AIADMK સાથે ફરીથી ગઠબંધન કરવાની ભાજપની વ્યૂહરચના અન્નામલાઈને અનુકૂળ નહોતી, જેના કારણે તેમની નારાજગી વધી હતી.
પ્રદેશ પ્રમુખ પદ પરથી હટાવાયા
અન્નામલાઈ 2021થી 2025 સુધી તમિલનાડુ ભાજપના અધ્યક્ષ રહ્યા હતા. તેમના કાર્યકાળ દરમિયાન રાજ્યમાં ભાજપની હાજરી અને લોકપ્રિયતા વધારવામાં તેમણે મહત્વની ભૂમિકા ભજવી હતી. પરંતુ એપ્રિલ 2025માં ભાજપે તેમની જગ્યાએ નૈનાર નાગેન્દ્રનને પ્રદેશ પ્રમુખ બનાવ્યા હતા. અહેવાલો મુજબ AIADMK નેતૃત્વે ગઠબંધન ચર્ચા માટે અન્નામલાઈને પદ પરથી હટાવવાની શરત મૂકી હતી.
2026 વિધાનસભા ચૂંટણીમાં ઘટતી ભૂમિકા
2026ની તમિલનાડુ વિધાનસભા ચૂંટણી દરમિયાન અન્નામલાઈ પક્ષની મુખ્ય નિર્ણાયક પ્રક્રિયાઓથી દૂર રાખવામાં આવ્યા હોવાની ચર્ચા થઈ હતી. તેઓ પક્ષની ચૂંટણી વ્યૂહરચનામાં સક્રિય જોવા મળ્યા નહોતા અને તેમણે પોતે ચૂંટણી પણ લડી નહોતી. આ ઘટનાએ પક્ષની અંદર તેમની ઘટતી અસર અંગે અનેક સવાલો ઉભા કર્યા હતા.
નીતિગત મુદ્દાઓ પર મતભેદ
અન્નામલાઈએ કેટલાક રાષ્ટ્રીય મુદ્દાઓ પર પણ ખુલીને પોતાની અલગ વિચારધારા વ્યક્ત કરી હતી. ખાસ કરીને શાળાઓમાં ત્રણ ભાષા નીતિના અમલના સમયને લઈને તેમણે કેન્દ્ર સરકાર સામે સવાલ ઉઠાવ્યા હતા. તેમણે શિક્ષણ મંત્રાલયને આ અંગેની સૂચના પાછી ખેંચવાની માંગ પણ કરી હતી. આ ઘટનાએ દર્શાવ્યું હતું કે તેઓ રાજ્યના હિતના મુદ્દાઓ પર પક્ષની સત્તાવાર લાઇનથી અલગ અભિપ્રાય રાખવામાં સંકોચતા નથી.
ચૂંટણી વ્યૂહરચના અને ઉમેદવારી મુદ્દે અસંતોષ
અહેવાલો અનુસાર, અન્નામલાઈને ગઠબંધન વ્યવસ્થા, ઉમેદવારોની પસંદગી અને બેઠકોની વહેંચણી જેવા મુદ્દાઓ પર પણ પક્ષના ટોચના નેતૃત્વ સાથે મતભેદ હતા. આ મતભેદો સમય જતાં વધુ ગંભીર બન્યા હોવાનું માનવામાં આવે છે, જેના કારણે હવે તેમના ભાજપથી અલગ થવાની શક્યતાઓ અંગે ચર્ચાઓ તેજ બની છે.
હવે સૌની નજર 4 જૂન પર
અન્નામલાઈના સમર્થકો અને રાજકીય વિશ્લેષકો બંને હવે 4 જૂન પર નજર રાખી રહ્યા છે. તેમના જન્મદિવસે કોઈ મહત્વપૂર્ણ રાજકીય જાહેરાત થઈ શકે છે તેવી અટકળો ચાલી રહી છે. જો અન્નામલાઈ ખરેખર સ્વતંત્ર રાજકીય માર્ગ પસંદ કરે છે, તો તે તમિલનાડુના રાજકારણમાં એક મોટો ફેરફાર સાબિત થઈ શકે છે અને ભાજપ માટે પણ નવા પડકારો ઊભા કરી શકે છે.
