અમેરિકામાં જાતીય ગુનાઓના દોષિત જેફરી એપસ્ટીન સાથે જોડાયેલા કેસમાં હાલમાં જ અમેરિકી ન્યાય વિભાગે અનેક દસ્તાવેજો જાહેર કર્યા છે. આ ખુલાસા બાદ એપસ્ટીનના લક્ઝુરિયસ પ્રાઈવેટ જેટ્સ ફરી એકવાર ચર્ચામાં આવ્યા છે. ખાસ કરીને Gulfstream G550 મોડેલના વિમાનનો ઉલ્લેખ વારંવાર થઈ રહ્યો છે, જેનો ઉપયોગ એપસ્ટીન લાંબા સમય સુધી કરતા રહ્યા હતા. સામાન્ય લોકોમાં અત્યારે એ વાતની ઉત્સુકતા છે કે આવા હાઈ પ્રોફાઈલ જેટમાં સફર કરવા માટે ટિકિટના કેટલા રૂપિયા ચૂકવવા પડે અને આ સફર સામાન્ય માણસના ગજામાં છે કે નહીં.
એપસ્ટીનના કાફલાના સૌથી ચર્ચિત વિમાનો
એપસ્ટીન પાસે રહેલું Gulfstream G550 એક અલ્ટ્રા લોંગ રેન્જ પ્રાઈવેટ જેટ છે. આ વિમાન કોઈપણ સ્ટોપ વગર અમેરિકાથી યુરોપ સુધી ઉડાન ભરવાની ક્ષમતા ધરાવે છે. FAA ના રેકોર્ડ્સ મુજબ આ જેટ અંદાજે 6,750 નોટિકલ માઈલની રેન્જ આપે છે અને તેમાં એકસાથે 12 થી 16 મુસાફરો મુસાફરી કરી શકે છે. જો નવા Gulfstream G550 ની કિંમતની વાત કરીએ તો તે અંદાજે 61.5 મિલિયન ડોલર એટલે કે 500 કરોડ રૂપિયાથી વધુ થાય છે. જોકે, એપસ્ટીને આ વિમાન સેકન્ડ હેન્ડ ખરીદ્યું હતું. તેના મૃત્યુ બાદ આ જેટ 10.6 મિલિયન ડોલરમાં વેચાયું હતું. આ ઉપરાંત તેનું Boeing 727 વિમાન 'લોલિતા એક્સપ્રેસ' તરીકે પણ કુખ્યાત બન્યું હતું.
ટિકિટ સિસ્ટમ નહીં પણ આખું જેટ ભાડે રાખવું પડે
મહત્વની વાત એ છે કે એપસ્ટીનના પ્રાઈવેટ જેટ્સમાં સામાન્ય એરલાઈન્સની જેમ ટિકિટ સિસ્ટમ હોતી નથી. આમાં મુસાફરી કરવા માટે આખું વિમાન ચાર્ટર કરવું પડે છે. એવિએશન ઈન્ડસ્ટ્રીના નિષ્ણાતોના જણાવ્યા અનુસાર, Gulfstream G550 જેવા પ્રાઈવેટ જેટને ચાર્ટર કરવાનો પ્રતિ કલાકનો ખર્ચ અંદાજે 10 હજારથી 15 હજાર ડોલરની વચ્ચે હોય છે. ભારતીય ચલણમાં આ રકમ અંદાજે 8 લાખથી 12 લાખ રૂપિયા પ્રતિ કલાક જેટલી થાય છે.
એક સફર માટે કેટલા કરોડનો ખર્ચ?
જો કોઈ વ્યક્તિ ટૂંકા અંતરની મુસાફરી પણ કરવા માંગતી હોય, તો ફ્યુઅલ, ક્રૂ ફી, એરપોર્ટ ચાર્જ અને મેન્ટેનન્સ ગણીને કુલ ખર્ચ 20 થી 30 લાખ રૂપિયા સુધી પહોંચી શકે છે. આંતરરાષ્ટ્રીય ઉડાન જેમ કે અમેરિકાથી યુરોપ જવા માટે આ ખર્ચ 1 કરોડ રૂપિયાથી પણ વધી જાય છે. આ જ કારણ છે કે આવા લક્ઝુરિયસ જેટ્સમાં મુસાફરી કરવાનું માત્ર અબજોપતિઓ અને હાઈ પ્રોફાઈલ લોકો પૂરતું જ સીમિત હોય છે. એપસ્ટીન સાથે સફર કરનારા મોટાભાગના લોકો વીઆઈપી હતા, જેમના માટે આ જંગી રકમ ખર્ચવી કોઈ મોટી વાત નહોતી.
