જો તમે પણ સોશિયલ મીડિયા પર જાપાન પ્રવાસના વીડિયો જોઈને ત્યાં જવાનું વિચારી રહ્યા છો, તો તમારા માટે એક મહત્વના સમાચાર છે. આગામી 1 જુલાઈથી જાપાનનો પ્રવાસ મોંઘો થવા જઈ રહ્યો છે. જાપાન સરકારે વિઝા ફીમાં 5 ગણો મોટો વધારો કરવાની સત્તાવાર જાહેરાત કરી છે.
1978 પછી પહેલીવાર વિઝા ફીમાં સુધારો
મીડિયા રિપોર્ટ્સ અનુસાર, જાપાન સરકારે વર્ષ 1978 પછી એટલે કે લગભગ 48 વર્ષ બાદ પહેલીવાર પોતાના વિઝા ફી માળખામાં ફેરફાર કર્યો છે. વધતી જતી મોંઘવારી અને કરન્સી (યેન)ના મૂલ્યમાં આવેલા બદલાવોને કારણે આ નિર્ણય લેવામાં આવ્યો છે. આ નવો નિયમ 1 જુલાઈથી સબમિટ થનારી તમામ વિઝા અરજીઓ પર લાગુ થશે.
નવા અને જૂના વિઝા દરની વિગતો
જાપાનના વિદેશ મંત્રાલય દ્વારા જાહેર કરાયેલા નવા દરો નીચે મુજબ છે:
સિંગલ-એન્ટ્રી વિઝા (Single-Entry Visa): અત્યાર સુધી આ વિઝા માટે 3,000 યેન ચૂકવવા પડતા હતા, જે હવે વધીને 15,000 યેન થઈ જશે. ભારતીય ચલણમાં આ રકમ આશરે Rs 8,750 જેટલી થાય છે.
મલ્ટિપલ-એન્ટ્રી વિઝા (Multiple-Entry Visa): આ વિઝાની ફી 6,000 યેનથી વધારીને સીધી 30,000 યેન કરવામાં આવી છે. ભારતીય રૂપિયામાં આ રકમ આશરે Rs 17,500 જેટલી થાય છે.
પ્રવાસન ક્ષેત્ર પર શું અસર પડશે?
જાપાનના વિદેશ મંત્રીના જણાવ્યા અનુસાર, સરકારને આશા છે કે આ નિર્ણયથી દેશમાં આવતા પ્રવાસીઓની સંખ્યા પર તાત્કાલિક કોઈ મોટી નકારાત્મક અસર નહીં પડે. જાપાન હંમેશાથી પ્રવાસીઓ માટે લોકપ્રિય ડેસ્ટિનેશન રહ્યું છે. જો કે, જે મુસાફરો મર્યાદિત બજેટમાં મુસાફરી કરવાનું આયોજન કરી રહ્યા છે, તેમણે હવે વિઝા પાછળ વધુ ખર્ચ કરવો પડશે. તેથી, જો તમે જૂની ફીના દરે પ્રવાસ કરવા માંગતા હોવ, તો 1 જુલાઈ પહેલા વિઝા અરજી પ્રક્રિયા પૂર્ણ કરી લેવી હિતાવહ છે.
