કેન્દ્રશાસિત પ્રદેશ જમ્મુ-કાશ્મીરમાં સુરક્ષા એજન્સીઓ જ્યારે હાઈ એલર્ટ પર છે, ત્યારે રવિવારે (21 ડિસેમ્બર 2025) જમ્મુના સિદરા વિસ્તારમાં એક અત્યંત શંકાસ્પદ ઘટના સામે આવી છે. જમ્મુ-કાશ્મીર પોલીસને રૂટિન સર્વેલન્સ અને ચેકિંગ દરમિયાન એક અસોલ્ટ રાઈફલમાં માઉન્ટ કરી શકાય તેવું અત્યાધુનિક ટેલિસ્કોપ મળી આવ્યું છે. ચોંકાવનારી વિગત એ છે કે આ ઉપકરણ નેશનલ ઇન્વેસ્ટિગેશન એજન્સી (NIA) ના મુખ્ય મથકની ખૂબ જ નજીકથી જપ્ત કરવામાં આવ્યું છે. પ્રાથમિક તપાસમાં જાણવા મળ્યું છે કે આ ટેલિસ્કોપ ચીની કંપની દ્વારા બનાવવામાં આવ્યું છે. આ ગંભીર સુરક્ષા ભંગની ઘટના બાદ સમગ્ર જમ્મુમાં હાઈ એલર્ટ જાહેર કરી દેવામાં આવ્યું છે.
NIA હેડક્વાર્ટર જેવા અતિ સંવેદનશીલ અને ઉચ્ચ સુરક્ષા ધરાવતા વિસ્તારમાંથી આવું ઘાતક સાધન મળી આવતા સુરક્ષા દળો એક્શનમાં આવ્યા છે. પોલીસના ઉચ્ચ અધિકારીઓએ તાત્કાલિક ઘટનાસ્થળની મુલાકાત લીધી હતી અને સમગ્ર વિસ્તારને કોર્ડન કરીને સર્ચ ઓપરેશન હાથ ધર્યું છે. આસપાસના તમામ રહેણાંક અને વ્યાવસાયિક વિસ્તારોમાં સઘન સુરક્ષા તપાસ શરૂ કરવામાં આવી છે.
મોટા આતંકી કાવતરાનો ભય
નિષ્ણાતોના મતે, આ પ્રકારના ટેલિસ્કોપનો ઉપયોગ લાંબા અંતરથી ચોક્કસ નિશાન સાધવા માટે કરવામાં આવે છે. NIA હેડક્વાર્ટર જેવી મહત્વની સંસ્થાની નજીકથી તેની રિકવરી એ સંકેત આપે છે કે આતંકવાદીઓ કોઈ મોટી ઘટનાને અંજામ આપવાની ફિરાકમાં હોઈ શકે છે. સુરક્ષા એજન્સીઓ હવે એ દિશામાં તપાસ કરી રહી છે કે આ ટેલિસ્કોપ ત્યાં કેવી રીતે પહોંચ્યું અને તેનો ઉપયોગ કરવા પાછળ કોનો હાથ છે.
તાજેતરમાં જ ઉધમપુરમાં થઈ હતી અથડામણ
નોંધનીય છે કે જમ્મુ-કાશ્મીરમાં છેલ્લા કેટલાક દિવસોથી આતંકવાદી ગતિવિધિઓમાં વધારો જોવા મળ્યો છે. ગત સોમવારે (15 ડિસેમ્બર 2025) ઉધમપુર જિલ્લાના મજાલતા વિસ્તારમાં સુરક્ષા દળો અને આતંકવાદીઓ વચ્ચે ભીષણ અથડામણ થઈ હતી. સુઆં ગામમાં થયેલા આ એન્કાઉન્ટરમાં જમ્મુ-કાશ્મીર પોલીસનો એક જવાન શહીદ થયો હતો. આ ઓપરેશનમાં સ્પેશિયલ ઓપરેશન ગ્રુપ (SOG), ભારતીય સેના અને CRPF ની સંયુક્ત ટીમે આતંકીઓનો સામનો કર્યો હતો. જમ્મુ રેન્જના આઈજીપી ભીમ સેન તુતીએ જણાવ્યું હતું કે સુરક્ષા દળો સતત આતંકીઓના નેટવર્કને તોડવા માટે કાર્યરત છે.
