ઇઝરાયલે ગાઝામાં ફરી મોટો હુમલો કર્યો : 52 લોકોના મોત; ૫૫ થી વધુ લોકો ઘાયલ

ઇઝરાયલ દ્વારા ગાઝામાં લશ્કરી કાર્યવાહી વધુ તીવ્ર બનાવવામાં આવી છે. ઇઝરાયલી સેના ગાઝામાં ભારે બોમ્બમારો કરી રહી છે. દરમિયાન સોમવારે ગાઝા પટ્ટીમાં ઇઝરાયલી હુમલામાં ઓછામાં ઓછા 52 લોકો માર્યા ગયા. મૃતકોમાં 31 લોકોએ આશ્રયસ્થાન તરીકે ઉપયોગમાં લેવાતી શાળામાં આશરો લીધો હતો. સ્થાનિક આરોગ્ય અધિકારીઓએ આ હુમલા અંગે માહિતી આપી છે.

ઇઝરાયલી સેનાએ શું કહ્યું?
અધિકારીઓએ જણાવ્યું હતું કે શાળા પર હુમલો ત્યારે થયો જ્યારે લોકો સૂતા હતા જેના કારણે તેમના સામાનમાં આગ લાગી ગઈ. ઇઝરાયલી સેનાએ કહ્યું કે તેણે એવા આતંકવાદીઓને નિશાન બનાવ્યા હતા જેઓ શાળામાંથી પોતાની પ્રવૃત્તિઓ ચલાવી રહ્યા હતા. સ્થાનિક આરોગ્ય મંત્રાલયની કટોકટી સેવાના વડા ફહમી અવદે જણાવ્યું હતું કે ઉત્તરી ગાઝામાં શાળા પર થયેલા હુમલામાં 55 થી વધુ લોકો ઘાયલ પણ થયા છે.

એક જ પરિવારના 15 સભ્યોના મોત થયા
દરમિયાન શિફા હોસ્પિટલે અહેવાલ આપ્યો છે કે સોમવારે એક ઘર પર થયેલા હુમલામાં પાંચ મહિલાઓ અને બે બાળકો સહિત એક જ પરિવારના 15 સભ્યો માર્યા ગયા છે. ઓનલાઈન ઉપલબ્ધ ફૂટેજમાં બચાવ કાર્યકરો બળી ગયેલા મૃતદેહોને દૂર કરી રહ્યા હતા અને આગ ઓલવવા માટે સંઘર્ષ કરી રહ્યા હતા.

આ રીતે યુદ્ધ શરૂ થયું
તમને અહીં એ પણ જણાવી દઈએ કે હમાસે 7 ઓક્ટોબર 2023 ના રોજ ઇઝરાયલ પર હુમલો કર્યો હતો ત્યારબાદ યુદ્ધ શરૂ થયું હતું. આ હુમલામાં આતંકવાદીઓએ લગભગ 1200 નિર્દોષ નાગરિકોની હત્યા કરી હતી અને 251 લોકોને બંધક બનાવવામાં આવ્યા હતા. આ પછી ઇઝરાયલે વળતો હુમલો શરૂ કર્યો જે આજે પણ ચાલુ છે. ગાઝાના આરોગ્ય મંત્રાલયના જણાવ્યા અનુસાર ઇઝરાયલી લશ્કરી કાર્યવાહીમાં 52000 થી વધુ લોકો માર્યા ગયા છે. ઘાયલોની સંખ્યા એક લાખને વટાવી ગઈ છે.