તેહરાન: પશ્ચિમ એશિયામાં વધી રહેલા તણાવ વચ્ચે શુક્રવારે ઈરાનના પ્રાદેશિક જળક્ષેત્રમાં એક LPG ટેન્કર પર હુમલો થવાની ઘટના સામે આવી છે. આ ટેન્કર પર કુલ 28 ભારતીય ક્રૂ સભ્યો સવાર હતા. જોકે રાહતની વાત એ છે કે હુમલા બાદ તમામ ભારતીય નાવિકો સંપૂર્ણપણે સુરક્ષિત હોવાનું તેહરાન સ્થિત ભારતીય દૂતાવાસે સત્તાવાર રીતે પુષ્ટિ કરી છે. ભારતીય દૂતાવાસે સોશિયલ મીડિયા પ્લેટફોર્મ 'X' પર જણાવ્યું કે મોઝામ્બિકના ધ્વજવાળું LPG ટેન્કર 'DISHA' પર દિવસ દરમિયાન હુમલો થયો હતો. ઘટનાની જાણ થતાં જ દૂતાવાસે સ્થાનિક સત્તાવાળાઓ અને સંબંધિત એજન્સીઓ સાથે તાત્કાલિક સંપર્ક સાધ્યો હતો. દૂતાવાસે સ્પષ્ટ કર્યું કે ટેન્કરમાં રહેલા તમામ 28 ભારતીય ક્રૂ સભ્યો સુરક્ષિત છે અને તેમની સ્થિતિ પર સતત નજર રાખવામાં આવી રહી છે.
ભારતીય દૂતાવાસ સતત સંપર્કમાં
ભારતીય દૂતાવાસે જણાવ્યું કે હુમલા બાદ સંબંધિત ઈરાની અધિકારીઓ સાથે સતત સંકલન જાળવવામાં આવી રહ્યું છે. ક્રૂ સભ્યોની સુરક્ષા સુનિશ્ચિત કરવા માટે તમામ જરૂરી પગલાં લેવામાં આવી રહ્યા છે. દૂતાવાસે વધુમાં જણાવ્યું કે પરિસ્થિતિ પર નજીકથી નજર રાખવામાં આવી રહી છે અને જો જરૂર પડશે તો ભારતીય નાગરિકોને જરૂરી મદદ પણ પૂરી પાડવામાં આવશે. અધિકૃત નિવેદન અનુસાર, હાલમાં કોઈ ભારતીય નાગરિકને ઈજા થઈ હોવાના અહેવાલ નથી. જોકે હુમલાના કારણો અને તેના માટે જવાબદાર કોણ છે તે અંગે સત્તાવાર રીતે હજુ કોઈ માહિતી જાહેર કરવામાં આવી નથી.
પશ્ચિમ એશિયામાં વધી રહેલા તણાવ વચ્ચે ઘટના
આ ઘટના એવા સમયે બની છે જ્યારે અમેરિકા અને ઈરાન વચ્ચેનો તણાવ ફરી એકવાર વધી રહ્યો છે. છેલ્લા કેટલાક સમયથી પશ્ચિમ એશિયાના સમુદ્રી માર્ગોમાં સુરક્ષાને લઈને ચિંતા વધી છે અને અનેક દેશોએ પોતાના વેપારી જહાજોને સાવચેતી રાખવા સૂચના આપી છે. હોર્મુઝની ખાડી અને આસપાસના સમુદ્રી માર્ગો વૈશ્વિક ઊર્જા પુરવઠા માટે અત્યંત મહત્વપૂર્ણ માનવામાં આવે છે. વિશ્વના મોટા પ્રમાણમાં ક્રૂડ ઓઈલ અને LPGના જહાજો આ માર્ગેથી પસાર થાય છે. આવી સ્થિતિમાં વેપારી જહાજો પર થતી કોઈપણ ઘટના આંતરરાષ્ટ્રીય સ્તરે ગંભીરતાથી જોવામાં આવે છે.
DISHA ટેન્કર અંગે શું જાણકારી?
હુમલાનો ભોગ બનેલું 'DISHA' LPG ટેન્કર મોઝામ્બિકના ધ્વજ હેઠળ સંચાલિત થાય છે. ટેન્કર પર વિવિધ દેશોના નાવિકો ફરજ બજાવતા હોવાની માહિતી છે, જેમાં 28 ભારતીય ક્રૂ સભ્યોનો સમાવેશ થાય છે. હુમલા બાદ જહાજને કેટલું નુકસાન થયું છે અથવા તેની કામગીરી પર શું અસર પડી છે તે અંગે હજુ સુધી સત્તાવાર માહિતી જાહેર કરવામાં આવી નથી. સૂત્રોના જણાવ્યા મુજબ, દરિયાઈ સુરક્ષા એજન્સીઓ પણ સમગ્ર ઘટનાની તપાસ કરી રહી છે અને હુમલાની પરિસ્થિતિ અંગે માહિતી એકત્રિત કરવામાં આવી રહી છે.
આ પણ વાંચો: બ્રિટનનું RAF ફેરફોર્ડ એરબેઝ પણ ઈરાનના નિશાને? : 4,500 કિ.મી દૂર હુમલો શક્ય કે માત્ર માનસિક દબાણની રણનીતિ?
ભારત સરકાર પરિસ્થિતિ પર રાખી રહી છે નજર
ભારત સરકાર અને વિદેશ મંત્રાલય સમગ્ર ઘટનાને લઈને સતત સતર્ક છે. ભારતીય દૂતાવાસ દ્વારા તમામ ક્રૂ સભ્યો સાથે સંપર્ક જાળવી રાખવામાં આવ્યો છે અને તેમના પરિવારજનો સુધી જરૂરી માહિતી પહોંચાડવાના પ્રયાસો પણ કરવામાં આવી રહ્યા છે. વિદેશ મંત્રાલય તરફથી હાલ કોઈ વધારાની સલાહ અથવા ટ્રાવેલ એડવાઈઝરી જાહેર કરવામાં આવી નથી. જોકે, પરિસ્થિતિને ધ્યાનમાં રાખીને પશ્ચિમ એશિયાના સમુદ્રી માર્ગોમાં સંચાલિત ભારતીય જહાજો અને નાવિકોની સુરક્ષા પર વિશેષ ધ્યાન આપવામાં આવી રહ્યું છે.
