Iran Israel Conflict: અમેરિકા, ઇઝરાયલ અને ઇરાન વચ્ચે ચાલી રહેલા ભીષણ યુદ્ધના આજે 12મા દિવસે સ્થિતિ અત્યંત ગંભીર બની ગઈ છે. ઇરાન પર થયેલા સતત હુમલાઓએ ત્યાં ભારે માનવીય સંકટ સર્જ્યું છે, જેમાં અત્યાર સુધીમાં 1300થી વધુ લોકોએ જીવ ગુમાવ્યા હોવાના અહેવાલ છે. આ યુદ્ધમાં માત્ર સૈન્ય મથકો જ નહીં, પરંતુ રહેણાંક વિસ્તારો પણ નિશાન બન્યા છે. ઇરાનના જણાવ્યા અનુસાર, દેશમાં લગભગ 8000 જેટલા ઘરો સંપૂર્ણ કે આંશિક રીતે નષ્ટ પામ્યા છે, જ્યારે હોસ્પિટલો, શાળાઓ અને બજારો જેવા 9600 નાગરિક વિસ્તારો પર બોમ્બમારો કરવામાં આવ્યો છે. આ ભીષણ જંગમાં અમેરિકી સૈન્યને પણ મોટું નુકસાન વેઠવું પડ્યું છે, જેમાં અત્યાર સુધીમાં અંદાજે 140 સૈનિકો ઘાયલ થયા હોવાની પુષ્ટિ પેન્ટાગોન દ્વારા કરવામાં આવી છે.
બીજી તરફ, આ યુદ્ધમાં ટેકનોલોજી અને સેટેલાઇટ ટ્રેકિંગનો પણ મોટો ખેલ જોવા મળી રહ્યો છે. અમેરિકી હુમલાઓ શરૂ થયા તે પહેલાં ચીની સેટેલાઇટ દ્વારા અમેરિકી સૈન્ય ગતિવિધિઓની તસવીરો ટ્રેક કરવામાં આવી હોવાના અહેવાલો છે. પશ્ચિમ એશિયામાં વધી રહેલા આ તણાવની સીધી અસર હવે વૈશ્વિક સ્તરે ઉર્જા સંકટ અને મોંઘવારીના રૂપમાં જોવા મળી રહી છે. ભારત જેવા દેશો માટે હોર્મુઝ સ્ટ્રેટ (Hormuz Strait) બંધ થવાને કારણે ઇંધણ સપ્લાય ખોરવાઈ શકે છે, જેની અસર આગામી દિવસોમાં અર્થતંત્ર પર પડી શકે છે.
ઈરાનનો ઈઝરાયલ પર પલટવાર: તેલ અવીવ અને હાઈફા પર મિસાઈલ હુમલા
ઇરાનની 'ઇસ્લામિક રિવોલ્યુશનરી ગાર્ડ કોર્પ્સ' (IRGC) એ દાવો કર્યો છે કે તેમણે ઇઝરાયલના મહત્વના શહેરો જેવા કે તેલ અવીવ, હાઇફા અને યેરુશલમ પર બેલેસ્ટિક મિસાઇલો વડે હુમલો કર્યો છે. ઈરાને તેની અત્યંત શક્તિશાળી અને લાંબા અંતરની 'ખોરમશહર' મિસાઈલોનો ઉપયોગ કર્યો હોવાનું જણાવ્યું છે. આ હુમલાઓમાં ઇઝરાયલના મિલિટરી કમાન્ડ સેન્ટર્સ અને અમેરિકી ઠેકાણાઓને નિશાન બનાવવામાં આવ્યા છે. ઈરાને ચેતવણી આપી છે કે જ્યાં સુધી દુશ્મન હાર નહીં માને ત્યાં સુધી આ મિસાઈલ હુમલાઓ ચાલુ રહેશે.
કુવૈતમાં અમેરિકી સૈન્ય બેઝ પર હુમલો અને સૈનિકોની ઈજા
યુદ્ધની આગ હવે પડોશી દેશો સુધી પણ પહોંચી છે. ઈરાને કુવૈતમાં આવેલા અમેરિકી સૈન્ય બેઝ 'કેમ્પ આરિફજાન' પર ચાર મિસાઈલો છોડી હતી. આ બેઝ અમેરિકા માટે લોજિસ્ટિકનું મુખ્ય કેન્દ્ર છે. પેન્ટાગોનના અહેવાલ મુજબ, આ યુદ્ધમાં અત્યાર સુધીમાં 140 અમેરિકી સૈનિકો ઘાયલ થયા છે, જેમાંથી 8 સૈનિકોની હાલત અત્યંત ગંભીર છે. આ ઉપરાંત, સાઉદી અરેબિયા અને કુવૈતમાં થયેલા હુમલામાં અત્યાર સુધીમાં 7 અમેરિકી જવાનોએ જીવ ગુમાવ્યા છે.
ભારત સહિત એશિયાઈ દેશો પર ઉર્જા સંકટનું જોખમ
આ યુદ્ધને કારણે સૌથી મોટું નુકસાન ઉર્જા ક્ષેત્રે થઈ રહ્યું છે. ભારત તેની જરૂરિયાતનું 59% LNG કતાર અને UAE પાસેથી ખરીદે છે, જે હોર્મુઝ સ્ટ્રેટ થઈને આવે છે. જો આ માર્ગ બંધ થાય તો ભારતમાં મોંઘવારી આસમાને પહોંચી શકે છે.
પાકિસ્તાન: શાળાઓ બે અઠવાડિયા માટે બંધ કરી દેવામાં આવી છે અને ઉર્જા બચાવવા 'વર્ક ફ્રોમ હોમ' લાગુ કરાયું છે.
ઈજિપ્ત: ઇંધણના ભાવમાં સીધો 30 ટકાનો વધારો ઝીંકાયો છે.
ભારત: ખાડી દેશોમાં ફસાયેલા લગભગ 52,000 ભારતીયો અત્યાર સુધી વતન પરત ફર્યા છે.
અમેરિકાનું 'ઓપરેશન એપિક ફ્યુરી': બે દિવસમાં 46 હજાર કરોડનો ખર્ચ
અમેરિકા આ યુદ્ધમાં અત્યંત આધુનિક અને મોંઘા હથિયારોનો ઉપયોગ કરી રહ્યું છે. રિપોર્ટ અનુસાર, યુદ્ધના પ્રથમ બે દિવસમાં જ અમેરિકાએ 5.6 અબજ ડોલર (અંદાજે 46 હજાર કરોડ રૂપિયા) ખર્ચ્યા છે. વ્હાઇટ હાઉસે જણાવ્યું છે કે તેમનું લક્ષ્ય ઈરાનના મિસાઈલ પ્રોડક્શન ઈન્ફ્રાસ્ટ્રક્ચરને સંપૂર્ણપણે નષ્ટ કરવાનું છે. અત્યાર સુધીમાં અમેરિકાએ ઈરાની નેવીના 50થી વધુ જહાજો અને એક મોટું ડ્રોન કેરિયર નષ્ટ કર્યાનો દાવો કર્યો છે.
ઇઝરાયલનું સ્પેશિયલ બજેટ અને નેતન્યાહુની અપીલ
ઇઝરાયલના વડાપ્રધાન બેન્જામિન નેતન્યાહુએ જાહેરાત કરી છે કે, ઈરાન સાથેના લાંબા યુદ્ધને પહોંચી વળવા માટે સરકાર અબજો શેકેલનું ખાસ બજેટ બનાવશે. નેતન્યાહુએ ઈરાનની જનતાને અપીલ કરી છે કે તેઓ અલી ખામેનીના શાસનને ઉથલાવી દેવાની આ તક ઝડપી લે. ઇઝરાયલે સ્પષ્ટ કર્યું છે કે તેઓ હિઝબુલ્લાહ અને ઈરાની ધમકીઓને મૂળમાંથી ખતમ ન કરે ત્યાં સુધી પાછા નહીં હટે.
પુતિન અને ટ્રમ્પ વચ્ચેની વાતચીત અને શાંતિની અપીલ
રશિયાના રાષ્ટ્રપતિ વ્લાદિમીર પુતિને ઈરાનના રાષ્ટ્રપતિ સાથે વાત કરીને તણાવ ઓછો કરવા અને રાજકીય ઉકેલ શોધવા પર ભાર મૂક્યો છે. બીજી તરફ, ડોનાલ્ડ ટ્રમ્પે પણ પુતિન સાથે આ મુદ્દે ચર્ચા કરી છે. ટ્રમ્પે ઈરાનને ચેતવણી આપી છે કે તેઓ હોર્મુઝ સ્ટ્રેટમાં સમુદ્રી સુરંગો (Mines) ન લગાવે, નહીં તો અમેરિકા અત્યાર સુધીનો સૌથી ભયાનક વળતો હુમલો કરશે.
