Middle East War Update: અમેરિકા-ઈઝરાયેલ અને ઈરાન વચ્ચે ચાલી રહેલા ભયાનક જંગનો આજે 12મો દિવસ છે અને હવે આ યુદ્ધની આંચ ખાડી દેશો સુધી પહોંચી ગઈ છે. બુધવારે દુબઈ ઇન્ટરનેશનલ એરપોર્ટ (DXB) નજીક બે ઈરાની ડ્રોન પડતા સમગ્ર વિસ્તારમાં ખળભળાટ મચી ગયો હતો. આ હુમલામાં ચાર લોકો ઘાયલ થયા હોવાની સત્તાવાર પુષ્ટિ થઈ છે, જેમાં એક ભારતીય નાગરિકનો પણ સમાવેશ થાય છે. આ ઘટના બાદ દુબઈમાં સુરક્ષા વ્યવસ્થા અત્યંત કડક કરી દેવામાં આવી છે. જોકે, રાહતની વાત એ છે કે, એર ટ્રાફિક પર તેની કોઈ મોટી અસર પડી નથી અને વિમાનોની અવરજવર સામાન્ય રહી છે.
બીજી તરફ, ઈરાને હવે આર્થિક યુદ્ધ છેડવાની ધમકી આપી છે. ઈરાને દાવો કર્યો છે કે, તે અમેરિકા અને ઈઝરાયેલ સાથે જોડાયેલી બેંકો અને ડેટા સેન્ટર્સ પર હુમલો કરી શકે છે. ચિંતાજનક વાત એ છે કે, ઈરાની મીડિયાના રિપોર્ટ્સ મુજબ, ગૂગલ, એમેઝોન અને માઈક્રોસોફ્ટ જેવી મોટી ટેક કંપનીઓની ઓફિસો પણ ઈરાનના સંભવિત ટાર્ગેટ લિસ્ટમાં છે. આ દરમિયાન અમેરિકાને પણ મોટું સૈન્ય નુકસાન થયું છે, જેમાં અત્યાર સુધીમાં 140 અમેરિકી સૈનિકો ઘાયલ થયા હોવાના અહેવાલ છે. વૈશ્વિક સ્તરે ચીને આ હુમલાઓની નિંદા કરી છે, જ્યારે કતારે હાલના તબક્કે મધ્યસ્થી કરવાનો ઇનકાર કરી દીધો છે.
દુબઈ એરપોર્ટ પર ડ્રોન એટેક: ભારતીય નાગરિક ઈજાગ્રસ્ત
દુબઈ મીડિયા ઓફિસે સોશિયલ મીડિયા પર પુષ્ટિ કરી છે કે, એરપોર્ટ નજીક બે ડ્રોન તોડી પાડવામાં આવ્યા હતા. આ ઘટનાના કાટમાળને કારણે એક ભારતીય, બે ઘાનાના અને એક બાંગ્લાદેશી નાગરિકને હળવી ઈજાઓ પહોંચી છે. સુરક્ષા એજન્સીઓએ તાત્કાલિક પ્રોટોકોલ લાગુ કરી પરિસ્થિતિ પર કાબૂ મેળવ્યો હતો. ઈરાને આ હુમલા દ્વારા સંકેત આપ્યો છે કે જો તેના પર હુમલા ચાલુ રહેશે તો તે સંયુક્ત આરબ અમીરાત (UAE) અને કતાર જેવા દેશોના ઈન્ફ્રાસ્ટ્રક્ચરને નિશાન બનાવતું રહેશે.
ઈરાનના નિશાના પર ટેક જાયન્ટ્સ: ગૂગલ અને એમેઝોન પર ખતરો
ઈરાની મીડિયા દ્વારા જાહેર કરવામાં આવેલી માહિતી મુજબ, તેહરાન હવે ઈઝરાયેલ અને મિડલ ઈસ્ટમાં આવેલી અમેરિકી ટેક કંપનીઓને નિશાન બનાવવાની યોજના બનાવી રહ્યું છે. આ યાદીમાં ગૂગલ, એમેઝોન, માઈક્રોસોફ્ટ, એનવીડિયા અને આઈબીએમ જેવી કંપનીઓના નામ સામેલ છે. દુબઈ અને અબુ ધાબીમાં આવેલા આ કંપનીઓના ડેટા સેન્ટર્સ પર બેલિસ્ટિક મિસાઈલ હુમલાની આશંકા વ્યક્ત કરવામાં આવી છે. ઈરાને લોકોને બેંકો અને આર્થિક કેન્દ્રોથી 1 કિલોમીટર દૂર રહેવા ચેતવણી આપી છે.
લેબનનમાં ઈઝરાયેલનો કહેર: એક જ પરિવારના 10ના મોત
જંગના મેદાનમાં ઈઝરાયેલ પણ આક્રમક છે. લેબનનના પૂર્વી બાલબેક જિલ્લામાં ઈઝરાયેલના હવાઈ હુમલામાં એક આખી ઈમારત ધરાશાયી થઈ ગઈ છે. આ હુમલામાં સીરિયાના એક જ પરિવારના 10 સભ્યોના મોત થયા છે. ઈઝરાયેલનું કહેવું છે કે તે હિઝબુલ્લાહના ઠેકાણાઓને નષ્ટ કરી રહ્યું છે, પરંતુ આ હુમલાઓમાં નિર્દોષ નાગરિકો પણ ભોગ બની રહ્યા છે, જેના પર ચીને સખત વાંધો ઉઠાવ્યો છે.
અમેરિકી સેનાને ફટકો: 140 સૈનિકો ઘાયલ, 7ના મોત
આ યુદ્ધ માત્ર મિડલ ઈસ્ટ પૂરતું સીમિત નથી રહ્યું, અમેરિકી સેના પણ તેમાં સીધી રીતે ફસાઈ છે. લેટેસ્ટ રિપોર્ટ્સ મુજબ, અત્યાર સુધીમાં વિવિધ હુમલાઓમાં 140 અમેરિકી સૈનિકો ઘાયલ થયા છે અને 7 સૈનિકોએ જીવ ગુમાવ્યા છે. ઈરાને પડોશી દેશોના મુસ્લિમોને અપીલ કરી છે કે તેઓ અમેરિકી અને ઈઝરાયેલી સૈનિકોના ગુપ્ત ઠેકાણાઓની માહિતી ઈરાની સેનાને આપે જેથી 'ચોકસાઈપૂર્વક' હુમલા કરી શકાય.
