કોરોનાનો ખતરો મંડરાયો : હવે ઈરાની નાગરિકો માસ્ક પહેરીને ફરશે, સરકારે નવો જારી કર્યો આદેશ

ઈરાનમાં ફરી એકવાર કોરોનાનો ખતરો મંડરાઈ રહ્યો છે. દેશમાં કોવિડ-૧૯ના કેસોમાં ઝડપથી વધારો થવાથી સરકાર અને આરોગ્ય નિષ્ણાતોની ચિંતા વધી ગઈ છે. આને ધ્યાનમાં રાખીને સરકારે જાહેર સ્થળોએ માસ્ક પહેરવાનું ફરજિયાત બનાવ્યું છે. ખાસ કરીને ભીડવાળા વિસ્તારો અને બંધ સ્થળોએ લોકોને માસ્ક પહેરીને ફરવાની સલાહ આપવામાં આવી છે.

રાજ્ય સંચાલિત ઇસ્લામિક રિપબ્લિક ન્યૂઝ એજન્સી (IRNA) અનુસાર દેશભરની હોસ્પિટલોમાં દર્દીઓની વધતી સંખ્યા એ સંકેત આપે છે કે વાયરસ ફરી એકવાર ફેલાઈ રહ્યો છે. જોકે અત્યાર સુધી કોવિડ કેસ અંગે કોઈ સ્પષ્ટ ડેટા જાહેર કરવામાં આવ્યો નથી પરંતુ આરોગ્ય વિભાગ માને છે કે આ ઓમિક્રોન વેરિઅન્ટની નવી અસર છે.

ચેપી રોગના નિષ્ણાતએ જણાવ્યું હતું કે વૃદ્ધ નાગરિકો સગર્ભા સ્ત્રીઓ હૃદયરોગના દર્દીઓ અને નબળી રોગપ્રતિકારક શક્તિ ધરાવતા લોકોએ પહેલાની જેમ જ સતર્ક રહેવાની જરૂર છે. તેમણે સૂચન કર્યું કે આવા લોકોએ ઘરની બહાર નીકળતી વખતે માસ્ક પહેરવું જોઈએ અને બિનજરૂરી મુસાફરી ટાળવી જોઈએ.

ઈરાનના નાયબ આરોગ્ય પ્રધાન અલીરેઝા રાયસીએ તાજેતરમાં દેશભરના યુનિવર્સિટી આરોગ્ય એકમોને એક પત્ર લખીને ચેતવણી આપી હતી કે કોરોના અને ફ્લૂ જેવા શ્વસન રોગો પ્રત્યે સાવધાની રાખવાની જરૂર છે. તેમણે ખાસ કરીને જાહેર કચેરીઓ હોસ્પિટલો અને બંધ વાતાવરણમાં માસ્ક પહેરવા અંગે કડક સૂચનાઓ આપી છે.