IPL rules : ઈન્ડિયન પ્રીમિયર લીગમાં હવે ખેલાડીઓની મેદાન પરની 'સ્માર્ટનેસ' નહીં ચાલે. ક્રિકેટ બોર્ડ BCCI ની એન્ટી કરપ્શન યુનિટ (ACU) એ એક મોટો નિર્ણય લેતા મેચ દરમિયાન ખેલાડીઓ અને મેચ અધિકારીઓ દ્વારા ઉપયોગમાં લેવાતા સ્માર્ટ સનગ્લાસ (ચશ્મા) પર સંપૂર્ણ પ્રતિબંધ મૂકી દીધો છે. બોર્ડ દ્વારા તમામ ટીમો માટે આ અંગે એક કડક એડવાઇઝરી પણ જારી કરવામાં આવી છે, જેનું પાલન કરવું દરેક માટે ફરજિયાત રહેશે.
નવા નિયમો અને આદેશ
BCCI દ્વારા જાહેર કરાયેલી નવી ગાઇડલાઇન અનુસાર, મેચના દિવસે ખેલાડીઓ અને સપોર્ટ સ્ટાફે મેદાનની અંદર, ડ્રેસિંગ રૂમમાં અથવા ડગઆઉટમાં જતાં પહેલા પોતાના તમામ કોમ્યુનિકેશન સાધનો જમા કરાવવા પડશે. આ સાધનોમાં મોબાઈલ ફોન, સ્માર્ટવોચ અને હવે નવા ઉમેરાયેલા સ્માર્ટ સનગ્લાસનો સમાવેશ થાય છે. આ તમામ વસ્તુઓ સિક્યોરિટી લાયઝન ઓફિસર (SLO) પાસે જમા કરવાની રહેશે. જો કોઈ ખેલાડી કે સ્ટાફ આ નિયમનો ભંગ કરશે તો તેમની સામે કડક કાયદાકીય કાર્યવાહી કરવામાં આવશે અને ભારે દંડ ફટકારવામાં આવશે.
હોટેલ અને મહેમાનો પર પ્રતિબંધ
બોર્ડે માત્ર મેદાન પર જ નહીં, પરંતુ મેદાનની બહાર પણ નિયમો કડક કર્યા છે. હવે ખેલાડીઓ મોડી રાત સુધી હોટેલની બહાર રહી શકશે નહીં. આ સિવાય, ખેલાડીઓ પોતાની ટીમ બસ, હોટેલ ફ્લોર કે ડ્રેસિંગ રૂમમાં બહારના કોઈ મહેમાનોને બોલાવી શકશે નહીં. એટલું જ નહીં, બોર્ડે ફેમિલી મેમ્બર્સ અને ગર્લફ્રેન્ડ્સના પ્રતિબંધિત વિસ્તારોમાં આવવા પર પણ કડક મનાઈ ફરમાવી દીધી છે.
એકલા હાથે ઠોકી નાખ્યા હતા અધધ રન..., વૈભવે કર્યો ખુલાસો: સૂર્યવંશીની એ ઇનિંગ વિશે સાંભળીને પીટરસન પણ ચોંકી ઉઠ્યો!
નિયમો બદલવાનું મુખ્ય કારણ
છેલ્લા કેટલાક દિવસોમાં IPL દરમિયાન આચારસંહિતા ભંગના અનેક કિસ્સાઓ સામે આવ્યા છે, જેના કારણે બોર્ડે તાત્કાલિક આ પગલું ભરવું પડ્યું છે:
10 એપ્રિલની ઘટના : ગુવાહાટીમાં રોયલ ચેલેન્જર્સ બેંગલુરુ (RCB) સામેની મેચ દરમિયાન રાજસ્થાન રોયલ્સના ટીમ મેનેજર રોમી ભિન્ડર મોબાઈલ ફોનનો ઉપયોગ કરતાં ઝડપાયા હતા. આ ભૂલ બદલ એન્ટી કરપ્શન યુનિટ દ્વારા તેમના પર 1 લાખ રૂપિયાનો મોટો દંડ કરવામાં આવ્યો હતો.
28 એપ્રિલની ઘટના : ન્યૂ ચંદીગઢમાં પંજાબ કિંગ્સ સામેની મેચ વખતે રાજસ્થાન રોયલ્સના કેપ્ટન રિયાન પરાગ ડ્રેસિંગ રૂમમાં ઈ-સિગારેટ પીતા કેમેરામાં કેદ થયા હતા. ઉલ્લેખનીય છે કે ભારતમાં વર્ષ 2019 થી જ ઈ-સિગારેટ પર સંપૂર્ણ પ્રતિબંધ છે.
સ્માર્ટ સનગ્લાસથી શું ખતરો છે?
BCCI એ સ્માર્ટ સનગ્લાસને સામાન્ય ચશ્મા નહીં પરંતુ ઓડિયો-વીડિયો રેકોર્ડિંગ અને કોમ્યુનિકેશન ડિવાઇસની કેટેગરીમાં ગણાવ્યા છે. આ મોડર્ન ચશ્મામાં બ્લૂટૂથ સ્પીકર, માઇક્રોફોન, કેમેરા અને આર્ટિફિશિયલ ઇન્ટેલિજન્સ (AI) ટેકનોલોજી હોય છે. આનાથી મોબાઈલ ડેટા કે વાઇ-ફાઇ દ્વારા લાઇવ સ્ટ્રીમિંગ, ઓડિયો-વીડિયો રેકોર્ડિંગ અને કોલિંગ સરળતાથી થઈ શકે છે. આ ડિવાઇસ દ્વારા ડ્રેસિંગ રૂમની ગુપ્ત રણનીતિ, પ્લેઇંગ-11 ની વિગતો, પિચની સ્થિતિ કે ઈજા સંબંધિત મહત્વની માહિતી કોઈ પણ વ્યક્તિ બહાર મોકલી શકે છે, જે સુરક્ષા અને રમતની પારદર્શિતા માટે મોટો ખતરો છે.
