શિકાગોમાં કાર અકસ્માતમાં તેલંગાણાની 25 વર્ષીય નવ્યાનું મોત: મિનીવાનમાં સીટના બદલે કેરીના બોક્સ પર બેઠા હતા 5 મુસાફરો, 6 ઘાયલ
અમેરિકાના શિકાગો નજીક એક ખૂબ જ હૃદયદ્રાવક માર્ગ અકસ્માત સામે આવ્યો છે. આ અકસ્માતમાં MS (માસ્ટર ઓફ સાયન્સ)નો અભ્યાસ કરતી 25 વર્ષીય ભારતીય વિદ્યાર્થીની નવ્યા ગાડુસુ (Navya Gadusu) નું મોત નીપજ્યું છે, જ્યારે અન્ય 6 લોકો ગંભીર રીતે ઘાયલ થયા છે. મૃતક નવ્યા મૂળ ભારતની તેલંગાણાના નાલગોંડા જિલ્લાની રહેવાસી હતી અને તે 2 વર્ષ પહેલા જ ઉચ્ચ અભ્યાસ માટે અમેરિકા ગઈ હતી.
કેરીના બોક્સ પર બેઠા હતા મુસાફરો
સ્થાનિક પોલીસના જણાવ્યા અનુસાર, આ અકસ્માત શનિવારે મોડી રાત્રે અંદાજે 11:15 વાગ્યે ઇન્ડિયાના સ્ટેટના ક્રાઉન પોઇન્ટ નજીક હાઇવે Interstate 65 પર થયો હતો. તપાસમાં સામે આવ્યું છે કે જે મિનીવાનમાં આ વિદ્યાર્થીઓ મુસાફરી કરી રહ્યા હતા, તેમાં માત્ર આગળની 2 સીટો જ હતી. બાકીના 5 મુસાફરો પાછળ સીટ બેલ્ટ વગર કેરીના બોક્સ (Mango Boxes) પર બેઠા હતા.
ધીમી ગતિએ ચાલતી વાન સાથે પાછળથી કાર અથડાઈ
પોલીસ અહેવાલ મુજબ, લાલ રંગની આ મિનીવાનમાં કુલ 7 લોકો સવાર હતા. મિનીવાનની આગળ જઈ રહેલા એક અન્ય વાહનમાં કોઈ યાંત્રિક ખામી સર્જાઈ હતી, જેના કારણે મિનીવાન માત્ર 10 થી 15 mph (માઇલ પ્રતિ કલાક)ની ખૂબ જ ધીમી ઝડપે ચાલી રહી હતી. આ દરમિયાન પાછળથી આવી રહેલી એક ઝડપી કારના ચાલકને વાનની ધીમી ગતિનો ખ્યાલ ન આવ્યો. તેણે અકસ્માત ટાળવા માટે ડાબી બાજુ ગાડી વાળવાનો પ્રયત્ન કર્યો, પરંતુ કાર મિનીવાનની ડાબી બાજુએ જોરદાર રીતે અથડાઈ હતી. ટક્કર એટલી ભયાનક હતી કે મિનીવાન રોડ પરથી નીચે ઉતરીને સીધી ખાડામાં ખાબકી હતી.
રવિવારે વહેલી સવારે મોતની જાહેરાત કરાઈ
અકસ્માત બાદ લેક કાઉન્ટી કોરોનર ઓફિસ દ્વારા રવિવારે વહેલી સવારે 12:16 વાગ્યે નવ્યા ગાડુસુને મૃત જાહેર કરવામાં આવી હતી. અકસ્માતમાં ગંભીર ઇજાઓ થવાના કારણે તેનું મોત નીપજ્યું હતું. અન્ય 6 ઘાયલોને તાત્કાલિક સ્થાનિક હોસ્પિટલમાં ખસેડવામાં આવ્યા હતા અને બાદમાં વધુ સારવાર માટે શિકાગોની હોસ્પિટલમાં રીફર કરવામાં આવ્યા છે. પરિવારજનોના જણાવ્યા મુજબ, નવ્યા પોતાની પાર્ટ-ટાઇમ જોબ પૂરી કરીને ઘરે પરત ફરી રહી હતી ત્યારે આ દુર્ઘટના ઘટી હતી.
ભારતીય દૂતાવાસે શોક વ્યક્ત કર્યો
શિકાગોમાં સ્થિત ભારતીય દૂતાવાસે (Consulate General of India) આ ઘટના અંગે ઊંડો શોક વ્યક્ત કર્યો છે. દૂતાવાસે સોશિયલ મીડિયા પ્લેટફોર્મ X પર પોસ્ટ કરીને જણાવ્યું કે, "અમે શિકાગો નજીક માર્ગ અકસ્માતમાં ભારતીય વિદ્યાર્થીની નવ્યા ગાડુસુના આકસ્મિક અવસાનથી અત્યંત દુઃખી છીએ. આ મુશ્કેલ સમયમાં અમારી સંવેદનાઓ તેના પરિવાર અને મિત્રો સાથે છે." દૂતાવાસે ઉમેર્યું કે તેઓ મૃતકના પરિવાર અને સ્થાનિક ભારતીય સમુદાયના સતત સંપર્કમાં છે તેમજ ઘાયલોને તમામ શક્ય મદદ પૂરી પાડી રહ્યા છે
