ભારતીય EV માર્કેટમાં ફેબ્રુઆરીમાં 44%નો ઉછાળો : ટાટા મોટર્સ મોખરે, મહિન્દ્રા અને કિયાના વેચાણમાં અનેકગણી વૃદ્ધિ

ફેબ્રુઆરી 2026 નો મહિનો ભારતીય ઇલેક્ટ્રિક કાર બજાર માટે ખૂબ જ પ્રોત્સાહક સાબિત થયો છે. વાર્ષિક ધોરણે EV ના વેચાણમાં 44% નો વધારો નોંધાયો છે, જે દર્શાવે છે કે ભારતીય ગ્રાહકો હવે પરંપરાગત ઈંધણવાળા વાહનોને બદલે ઇલેક્ટ્રિક વાહનો તરફ વધુ આકર્ષાઈ રહ્યા છે. ગત મહિને કુલ 13,669 ઇલેક્ટ્રિક કારનું વેચાણ થયું હતું, જે ફેબ્રુઆરી 2025 માં માત્ર 9,479 યુનિટ હતું. ટાટા મોટર્સે આ સેગમેન્ટમાં પોતાનું વર્ચસ્વ જાળવી રાખ્યું છે, જ્યારે મહિન્દ્રા અને કિયા જેવી કંપનીઓએ વૃદ્ધિના તમામ રેકોર્ડ તોડી નાખ્યા છે.

ટાટા મોટર્સ અને મહિન્દ્રાનો દબદબો

દેશની સૌથી મોટી EV ઉત્પાદક કંપની ટાટા મોટર્સે ફેબ્રુઆરીમાં 5,558 ઇલેક્ટ્રિક કાર વેચીને 39% ની વાર્ષિક વૃદ્ધિ નોંધાવી છે. Nexon EV અને Punch EV જેવી લોકપ્રિય મોડલ્સને કારણે ટાટા હજુ પણ નંબર-1 ના સ્થાને છે. બીજી તરફ, મહિન્દ્રા એન્ડ મહિન્દ્રાએ 2,913 યુનિટના વેચાણ સાથે 473% નો તોતિંગ ઉછાળો નોંધાવ્યો છે. મહિન્દ્રાની નવી રજૂ થયેલી XEV 9e અને BE 6 જેવી ઇલેક્ટ્રિક કારોને ગ્રાહકો તરફથી ખૂબ સારો પ્રતિસાદ મળી રહ્યો છે.

કિયા ઇન્ડિયાની 1,241% ની ઐતિહાસિક વૃદ્ધિ

ગયા મહિને સૌથી આશ્ચર્યજનક આંકડા કિયા ઇન્ડિયા તરફથી આવ્યા છે. કંપનીએ ફેબ્રુઆરીમાં 295 ઇલેક્ટ્રિક કાર વેચી છે, જે ગયા વર્ષના સમાન ગાળાના માત્ર 22 યુનિટ સામે 1,241% ની વૃદ્ધિ દર્શાવે છે. નવી રજૂ થયેલી Carens Clavis EV એ કિયા માટે ગેમ-ચેન્જર સાબિત થઈ રહી છે. વિયેતનામની કંપની વિનફાસ્ટ (VinFast) એ પણ ટૂંકા ગાળામાં ટોપ-5 માં સ્થાન બનાવીને હ્યુન્ડાઈ અને કિયા જેવી કંપનીઓને પાછળ છોડી દીધી છે. વિનફાસ્ટે ફેબ્રુઆરીમાં 384 ઇલેક્ટ્રિક કારનું વેચાણ કર્યું છે.

મારુતિ સુઝુકીની EV માર્કેટમાં એન્ટ્રી

ભારતની સૌથી મોટી કાર કંપની મારુતિ સુઝુકીએ પણ હવે ઇલેક્ટ્રિક સેગમેન્ટમાં પોતાનું ખાતું ખોલાવ્યું છે. તાજેતરમાં લોન્ચ થયેલી મારુતિની પ્રથમ ઇલેક્ટ્રિક SUV e-Vitara ના 214 યુનિટ્સ ફેબ્રુઆરીમાં વેચાયા છે. જોકે, હ્યુન્ડાઈ મોટર ઇન્ડિયાના વેચાણમાં 61% નો ઘટાડો જોવા મળ્યો છે. લક્ઝરી સેગમેન્ટમાં BMW એ 245 યુનિટ વેચીને 3% ની વૃદ્ધિ નોંધાવી છે, જ્યારે મર્સિડીઝ બેન્ઝ અને ટેસ્લા જેવી કંપનીઓએ પણ માર્કેટમાં પોતાની હાજરી જાળવી રાખી છે.

ફેબ્રુઆરી 2026 ના ટોપ EV બ્રાન્ડ્સનું વેચાણ