નાણાકીય વર્ષ 2024-25માં ભારતનું સંરક્ષણ ઉત્પાદન ₹1,50,590 કરોડના સર્વકાલીન ઉચ્ચ સ્તરે પહોંચ્યું છે, જે ગયા વર્ષના ₹1.27 લાખ કરોડની સરખામણીમાં 18% વૃદ્ધિ દર્શાવે છે. સંરક્ષણ પ્રધાન રાજનાથ સિંહે શનિવારે આ માહિતી આપી હતી અને 2019-20ના ₹79,071 કરોડની સરખામણીમાં 90%નો ઉછાળો નોંધાયો હોવાનું જણાવ્યું.
રાજનાથ સિંહે સફળતાનો શ્રેય સંરક્ષણ ઉત્પાદન વિભાગ, સરકારી અને ખાનગી કંપનીઓને આપ્યો અને આ સિદ્ધિને ‘ઐતિહાસિક’ ગણાવી.
‘ઓપરેશન સિંદૂર’ની સફળતા
સાથે જ, DRDO વડા સમીર કામતે ‘ઓપરેશન સિંદૂર’ની પ્રશંસા કરી. આ લશ્કરી કાર્યવાહી 7 મે, 2025ના રોજ જમ્મુ-કાશ્મીરના પહેલગામમાં થયેલા આતંકવાદી હુમલાના જવાબમાં હાથ ધરાઈ હતી, જેમાં પાકિસ્તાનમાં આતંકવાદી ઠેકાણાઓને નિશાન બનાવવામાં આવ્યા હતા.
આ ઓપરેશનમાં હવાથી હવામાં પ્રહાર કરતી મિસાઇલો, બ્રહ્મોસ સુપરસોનિક ક્રુઝ મિસાઇલો અને AI આધારિત નિર્ણય સપોર્ટ સિસ્ટમ્સનો ઉપયોગ થયો, જે ભારતના સંરક્ષણ સંશોધન અને વિકાસ ઇકોસિસ્ટમ દ્વારા વિકસાવવામાં આવી છે.
