આખરે ડ્રેગનને પડી જરૂર ભારતની : અમેરિકાના ટેરિફનો સામનો કરવા માગ્યો સાથ

ડોનાલ્ડ ટ્રમ્પના ટેરિફના કારણે એશિયા અને યુરોપના શેરબજારોમાં મોટો કડાકો બોલી ગયો છે. અમેરિકાની નવી સરકારે તેની અમેરિકા ફર્સ્ટ નીતિ હેઠળ ભારત અને ચીન પર કડક ટેરિફ લાદી છે. ચીન પર 34 ટકા અને ભારત પર 26 ટકા વધારાની ટેરિફ લાદવામાં આવી છે. આ દરમિયાન ચીને કહ્યું કે અમેરિકી રાષ્ટ્રપતિ ડોનાલ્ડ ટ્રમ્પના વહિવટીતંત્ર દ્વારા લાદવામાં આવેલા ટેરિફનો સામનો કરવા માટે ભારત અને ચીને એકસાથે ઊભા રહેવું જોઈએ.

'ભારત-ચીને સાથે ઊભા રહેવું જોઈએ'

ભારતમાં ચીની દૂતાવાસના પ્રવક્તા યૂ જિંગે X પર પોસ્ટ કર્યું, "ચીન-ભારતના આર્થિક અને વેપાર સંબંધો પરસ્પર લાભ પર આધારિત છે. યુએસ ટેરિફનો દુરુપયોગ કરી રહ્યું છે. વિશ્વના બે સૌથી મોટા વિકાસશીલ દેશોએ તેનો સામનો કરવા માટે એકસાથે ઊભા રહેવું જોઈએ. વેપાર અને ટેરિફ યુદ્ધમાં કોઈ વિજેતા નથી. બધા દેશોએ વ્યાપક સંરક્ષણના સિદ્ધાંતોને સમર્થન આપવું જોઈએ.

અમેરિકાની ધમકી એ મોટી ભૂલ છે- ચીન

ટ્રમ્પના ટેરિફના જવાબમાં ચીને અમેરિકા પર 34 ટકા ટેરિફ લાદ્યો હતો. ચીનની આ કાર્યવાહીને કારણે ટ્રમ્પે ચીની આયાત પર 50 ટકા ટેરિફ લાદવાની ધમકી આપી હતી. ચીનના વાણિજ્ય મંત્રાલયના પ્રવક્તાએ જણાવ્યું હતું કે જો યુએસ તેના ટેરિફ પગલાંમાં વધારો કરશે, તો ચીન તેના અધિકારો અને હિતોની સુરક્ષા માટે સખત વળતા પગલાં લેશે. તેમણે કહ્યું કે ચીન પર ટેરિફ વધારવાની અમેરિકાની ધમકી એક મોટી ભૂલ છે અને ફરી એકવાર અમેરિકાના બ્લેકમેલિંગ સ્વભાવને ઉજાગર કરે છે.

'વાતચીત સન્માન પર આધારિત હોવી જોઈએ'

ચીનના વાણિજ્ય મંત્રાલયના પ્રવક્તાએ કહ્યું, "ચીન સાથે વ્યવહાર કરવાનો સાચો રસ્તો દબાણ અને ધમકીઓનો આશરો લેવાનો નથી. ચીન યુએસને તાત્કાલિક તેની ખોટી પદ્ધતિઓ સુધારવા, ચીન સામેના તમામ એકપક્ષીય ટેરિફ પગલાં રદ કરવા, ચીનના આર્થિક અને વેપાર દમનને રોકવા અને પરસ્પર સન્માનના આધારે સમાન વાતચીત દ્વારા ચીન સાથેના મતભેદોને યોગ્ય રીતે ઉકેલવા વિનંતી કરે છે."