ભારત-બાંગ્લાદેશ સરહદ પર સુરક્ષાનું 'કવચ' : સિલિગુડીમાં ફેન્સિંગ કામગીરીનો પ્રારંભ, સ્થાનિકોમાં ખુશીનો માહોલ

India-Bangladesh Border Siliguri Fencing: ભારત અને બાંગ્લાદેશ વચ્ચેની આંતરરાષ્ટ્રીય સરહદ પર સુરક્ષાને વધુ સઘન બનાવવા માટે એક મોટું અને નિર્ણાયક પગલું લેવામાં આવ્યું છે. પશ્ચિમ બંગાળના સિલિગુડી સબ-ડિવિઝનના ફાંસીદેવા વિસ્તારમાં લાંબા સમયથી અટકેલી ફેન્સિંગ (વાડ) બાંધવાની કામગીરીનો શુક્રવારથી પ્રારંભ થયો છે. પશ્ચિમ બંગાળ સરકાર દ્વારા 27 કિલોમીટર જમીન તેમજ સરહદી ચોકીઓ (BOP) અને અન્ય સુરક્ષા માળખાકીય સુવિધાઓ માટે જરૂરી વધારાની જમીન બીએસએફ (BSF) ને હસ્તાંતરિત કરવામાં આવતા આ પ્રોજેક્ટને વેગ મળ્યો છે. આ કામગીરી પૂર્ણ થતાં સરહદ પારથી થતી ઘૂસણખોરી અને ગેરકાયદેસર પ્રવૃત્તિઓ પર કાયમી ધોરણે લગામ લાગશે.

સરહદ પર વાડ બાંધવાની આ પહેલને દેશની આંતરિક સુરક્ષા માટે અત્યંત મહત્વની ગણવામાં આવી રહી છે. છેલ્લા કેટલાક સમયથી આ વિસ્તારમાં સુરક્ષાને લઈને સ્થાનિક રહીશોમાં ચિંતા હતી. જોકે, હવે આ પ્રોજેક્ટ શરૂ થતાં સરહદી વિસ્તારોમાં સુરક્ષાનું કવચ તૈયાર થશે, જેનાથી માત્ર સ્થાનિક લોકો જ નહીં, પરંતુ સમગ્ર દેશની સુરક્ષા વધુ સુદ્રઢ બનશે તેવી અપેક્ષા વ્યક્ત કરવામાં આવી રહી છે.

સ્થાનિકોએ વ્યક્ત કરી રાહત: 'હવે અમે શાંતિથી ઊંઘી શકીશું'

સિલિગુડી સરહદ પર વસતા સ્થાનિક નાગરિકોમાં આ નિર્ણયને લઈને અનેરો ઉત્સાહ અને રાહત જોવા મળી રહી છે. અનિલ ઘોષ નામના એક સ્થાનિક રહીશે જણાવ્યું હતું કે, "અગાઉ અહીંની પરિસ્થિતિ અત્યંત ભયાનક હતી. સુરક્ષાના અભાવે અમે પશુપાલન પણ કરી શકતા નહોતા. હવે નવી સરકાર અને મુખ્યમંત્રીના પ્રયાસોને કારણે અમે સુરક્ષિત અનુભવી રહ્યા છીએ." બીજી તરફ, નારાયણ સાહા નામના અન્ય એક ગ્રામીણે જણાવ્યું હતું કે વર્ષોથી અમે સરહદી વાડની માંગણી કરી રહ્યા હતા, પરંતુ અગાઉ કોઈ સાંભળનાર નહોતું. હવે જ્યારે જમીન ટ્રાન્સફર થઈ છે, ત્યારે ગામના લોકો આનંદની લાગણી અનુભવી રહ્યા છે. આ કામગીરીના કારણે સરહદ પર વસતા લોકો હવે નિર્ભય બનીને રહી શકશે.

આ પણ વાંચો: ટ્વિશા શર્મા કેસમાં મોટો વળાંક!: મધ્યપ્રદેશ સરકારે CBI તપાસ માટે કેન્દ્રને મોકલ્યો પ્રસ્તાવ

રાજકીય ગરમાવો: અગાઉની સરકાર પર આક્ષેપો

આ પ્રોજેક્ટના અમલીકરણમાં થયેલા વિલંબ અંગે પશ્ચિમ બંગાળના મુખ્યમંત્રી સુવેન્દુ અધિકારીએ અગાઉની તૃણમૂલ કોંગ્રેસ (TMC) સરકાર પર નિશાન સાધ્યું છે. તેમણે આક્ષેપ કર્યો હતો કે અગાઉની સરકાર સરહદી સુરક્ષા માટે જમીન ફાળવણી કરવામાં સહકાર આપતી નહોતી, જેના કારણે સરહદ અસુરક્ષિત રહી હતી. મુખ્યમંત્રીએ સ્પષ્ટ કર્યું કે, નવી સરકારની પહેલી કેબિનેટ બેઠકમાં જ આ અંગેનો નિર્ણય લેવામાં આવ્યો હતો અને નિર્ધારિત સમયમર્યાદામાં જમીન ગૃહ મંત્રાલયને સોંપવાની પ્રક્રિયા શરૂ કરી દેવામાં આવી છે. સરકારનો લક્ષ્યાંક છે કે આગામી 45 દિવસમાં તમામ પ્રક્રિયા પૂર્ણ કરી બીએસએફ દ્વારા ફેન્સિંગનું કામ ઝડપથી પૂર્ણ કરવામાં આવે.