Harmanpreet Kaur Becomes Most Successful Captain In Womens T20I Cricket: ભારતીય મહિલા ક્રિકેટ ટીમની કેપ્ટન હરમનપ્રીત કૌરે ઇતિહાસ રચ્યો છે. તે મહિલા T20 ઇન્ટરનેશનલ ક્રિકેટમાં કેપ્ટન તરીકે સૌથી વધુ જીત મેળવનારી વિશ્વની પ્રથમ ખેલાડી બની છે. આ ખાસ રેકોર્ડમાં હરમનપ્રીત કૌરે ઓસ્ટ્રેલિયાની પૂર્વ મહિલા કેપ્ટન મેગ લેનિન્ગને પાછળ છોડી દીધી છે. મેગ લેનિન્ગે ઓસ્ટ્રેલિયન મહિલા ક્રિકેટ ટીમને 76 મેચમાં જીત આપવી હતી. પરંતુ ગઈકાલે (26 ડિસેમ્બર, 2025), હરમનપ્રીત કૌરે તિરુવનંતપુરમમાં શ્રીલંકાની મહિલા ટીમ સામે ત્રીજી T20 મેચ જીતીને મેગ લેનિન્ગને પાછળ છોડી દીધી હતી. અત્યારસુધી, હરમનપ્રીત કૌરે 130 મેચમાં ભારતીય મહિલા ક્રિકેટ ટીમનું નેતૃત્વ કર્યું છે, જેમાં ટીમે 77 મેચમાં સફળતા મેળવી છે.
આ સ્ટાર્સનો પણ ટોપના 4 માં સમાવેશ
હરમનપ્રીત કૌર પ્રથમ સ્થાને પહોંચ્યા બાદ મેગ લેનિન્ગ બીજા સ્થાને પહોંચી ગઈ છે. ઇંગ્લેન્ડ મહિલા ક્રિકેટની હીથર નાઈટ મહિલા T20 ઇન્ટરનેશનલ ક્રિકેટમાં ત્રીજા ક્રમે સૌથી વધુ મેચ જીતનાર કેપ્ટન છે. હીથર નાઈટની કેપ્ટનશીપ હેઠળ 72 જીત છે. ચાર્લોટ એડવર્ડ્સ ચોથા ક્રમે છે, જેને ઇંગ્લેન્ડ મહિલા ક્રિકેટને 68 T20 ઇન્ટરનેશનલ મેચોમાં સફળતા અપાવી છે.
મહિલા T20 ઇન્ટરનેશનલ ક્રિકેટમાં કેપ્ટન તરીકે સૌથી વધુ જીત
77 - હરમનપ્રીત કૌર (ભારત) - 130 મેચ
76 - મેગ લેનિન્ગ (ઓસ્ટ્રેલિયા) - 100 મેચ
72 - હીથર નાઈટ (ઇંગ્લેન્ડ) - 96 મેચ
68 - ચાર્લોટ એડવર્ડ્સ (ઇંગ્લેન્ડ) - 93 મેચ
હરમનપ્રીત કૌરની T20I ક્રિકેટ કારકિર્દી
હરમનપ્રીત કૌરે અત્યારસુધી ભારતીય મહિલા ક્રિકેટ ટીમ માટે કુલ 185 મેચ રમી છે. તેને 165 ઇનિંગ્સમાં 28.90 ની એવરેજથી 3700 રન બનાવ્યા છે. ક્રિકેટના સૌથી ટૂંકા ફોર્મેટમાં હરમનપ્રીત કૌરે 1 સેન્ચુરી અને 14 હાફ-સેન્ચુરી ફટકારી છે. હરમનપ્રીત કૌરે 62 ઇનિંગ્સમાં 32 વિકેટ પણ લીધી છે.
