UPI યુઝર્સ માટે મહત્વપૂર્ણ સમાચાર : બંધ કરવામાં આવી રહી છે આ ખાસ સુવિધા, જાણો તમારા પર તેની અસર

યુનિફાઇડ પેમેન્ટ્સ ઇન્ટરફેસથી સંબંધિત એક વિશેષ સુવિધા એટલે કે UPI ધીમે ધીમે બંધ કરવામાં આવી રહી છે. તાજેતરના મીડિયા અહેવાલો અનુસાર નેશનલ પેમેન્ટ્સ કોર્પોરેશન ઓફ ઈન્ડિયા એટલે કે NPCI 'કલેક્ટ પેમેન્ટ્સ' સુવિધાને મર્યાદિત કરવાની તૈયારી કરી રહ્યું છે. વાસ્તવમાં હવે આ સુવિધા ફક્ત મોટા અને વેરિફાઈડ વેપારીઓને જ મળી શકશે. ચાલો પહેલા સમજીએ કે ‘કલેક્ટ પેમેન્ટ્સ’ ફીચર શું છે?

શું છે 'કલેક્ટ પેમેન્ટ્સ' સુવિધા?
તમને જણાવી દઈએ કે ‘કલેક્ટ પેમેન્ટ્સ’ને પુલ ટ્રાન્ઝેક્શન પણ કહેવામાં આવે છે. આ ફીચરની મદદથી પૈસા મેળવનાર વ્યક્તિ UPI દ્વારા કોઈને પૈસા મોકલવાની વિનંતી મોકલી શકે છે. મોકલનાર વ્યક્તિ તેની UPI એપ પર જઈને તેને મંજૂર કરી શકે છે, ત્યારબાદ ટ્રાન્ઝેક્શન પૂર્ણ થઈ જાય છે. ઉદાહરણ તરીકે જ્યારે તમે ઓનલાઈન ખરીદી કરો છો અને 'UPI કલેક્ટ' દ્વારા ચુકવણી પસંદ કરો છો, ત્યારે તમારે તમારી UPI એપ પર જઈને ટ્રાન્ઝેક્શનને મંજૂરી આપવી પડશે.

UPI નો ઉપયોગ હશે વધુ સુરક્ષિત
રિપોર્ટ્સમાં કહેવામાં આવી રહ્યું છે કે NPCI QR કોડને પ્રમોટ કરવા અને પેમેન્ટને વધુ આગળ વધારવા માંગે છે. NPCI માને છે કે QR કોડ સ્કેન કરીને અને સીધા પૈસા મોકલવાથી ચુકવણી કરવાથી UPIનો ઉપયોગ વધુ સુરક્ષિત અને અસરકારક બનશે. NPCIના આ પગલાથી QR કોડ અને ડાયરેક્ટ ટ્રાન્સફરનો ટ્રેન્ડ વધશે. એટલું જ નહીં, તે UPI સંબંધિત છેતરપિંડી રોકવામાં પણ મદદ કરશે.

સંપૂર્ણપણે બંધ થશે નહીં ફીચર
જોકે NPCI તેને સંપૂર્ણપણે બંધ કરશે નહીં, પરંતુ આ સુવિધા માત્ર કેટલાક મોટા અને વેરિફાઈડ વેપારીઓ માટે જ ઉપલબ્ધ હશે. આ સિવાય વ્યક્તિ-થી-વ્યક્તિ એટલે કે P2P કલેક્ટ પેમેન્ટ માટેની મર્યાદા 2,000 રૂપિયા સુધી મર્યાદિત હોઈ શકે છે. એવું કહેવામાં આવી રહ્યું છે કે નાના વેપારીઓને શરૂઆતમાં કેટલીક સમસ્યાઓનો સામનો કરવો પડી શકે છે, પરંતુ તેઓ QR કોડ પેમેન્ટ સિસ્ટમ અપનાવીને આ ફેરફારને સરળતાથી સમાયોજિત કરી શકે છે.