ICCએ પાકિસ્તાની ટીમને ફટકાર્યો દંડ : ODI સિરીઝમાં આ એક ભૂલ કરવી પડી મોંઘી

પાકિસ્તાન ટીમની મુસીબતો ઓછી થવાના કોઈ સંકેત દેખાઈ રહ્યા નથી. ચેમ્પિયન્સ ટ્રોફી 2025માં શરમજનક પ્રદર્શન પછી પાકિસ્તાની ટીમ મર્યાદિત ઓવરોની શ્રેણી રમવા માટે ન્યુઝીલેન્ડના પ્રવાસે છે, જ્યાં તેને T20 શ્રેણીમાં એકતરફી હારનો સામનો કરવો પડ્યો હતો અને ત્રણ મેચની ODI શ્રેણીની પ્રથમ 2 મેચ હારી હતી. હવે પાકિસ્તાનની ટીમને પણ ICC દ્વારા ન્યૂઝીલેન્ડ સામેની બીજી વનડે મેચ બાદ સજા કરવામાં આવી છે, જેમાં સ્લો ઓવર રેટ માટે ટીમના તમામ ખેલાડીઓની મેચ ફી પર દંડ લગાવવામાં આવ્યો છે.

પાકિસ્તાનની ટીમે બીજી વનડેમાં નિર્ધારિત સમયમાં એક ઓવર ઓછી ફેંકી હતી.
ન્યૂઝીલેન્ડ અને પાકિસ્તાન વચ્ચે રમાઈ રહેલી ત્રણ મેચની વનડે સીરીઝની બીજી મેચ હેમિલ્ટનના સ્ટેડિયમમાં રમાઈ હતી. આ મેચમાં પાકિસ્તાની ટીમને 84 રનથી એકતરફી હારનો સામનો કરવો પડ્યો હતો. પ્રથમ બેટિંગ કરતા કિવી ટીમે 50 ઓવરમાં 292 રન બનાવ્યા હતા, જ્યારે પાકિસ્તાની ટીમે નિર્ધારિત સમયમાં એક ઓવર ઓછી ફેંકી હતી, જેના કારણે મેચ પછી મેચ રેફરી જેફ ક્રોએ પાકિસ્તાની ટીમના ખેલાડીઓ પર મેચ ફીના 5 ટકાનો દંડ લગાવ્યો હતો. પાકિસ્તાન ટીમના કેપ્ટન મોહમ્મદ રિઝવાને પણ આ ભૂલ સ્વીકારી લીધી છે. ICCના નિયમો અનુસાર, જો કોઈ ટીમ નિર્ધારિત સમયમાં પોતાની ઓવર પૂરી ન કરી શકે તો દરેક ઓવર ઓછી ફેંકવા પર તેના ખેલાડીઓની મેચ ફી પર પાંચ ટકાનો દંડ લગાવવામાં આવે છે.

પાકિસ્તાની ટીમને છેલ્લી ચારમાંથી ત્રણ મેચમાં દંડ ફટકારવામાં આવ્યો 
પાકિસ્તાની ટીમને છેલ્લી ચાર વનડે મેચોમાંથી ત્રણમાં ધીમી ઓવર રેટ માટે ICC તરફથી દંડનો સામનો કરવો પડ્યો છે. આમાં, તેમની ત્રણેય મેચ કિવી ટીમ સામે હતી, જેમાં પ્રથમ મેચ ચેમ્પિયન્સ ટ્રોફી 2025માં રમાઈ હતી, જ્યારે આ ODI શ્રેણીની બંને મેચો અત્યાર સુધી રમાઈ હતી.