હૈદરાબાદમાં ઇબોલાની આશંકા વચ્ચે એલર્ટ : બે સુદાનના નાગરિકોને આઇસોલેશનમાં રાખાયા, તપાસ રિપોર્ટની રાહ

Hyderabad Ebola Virus: વિશ્વના કેટલાક દેશોમાં ઇબોલા વાયરસને લઈને વધતી ચિંતાઓ વચ્ચે હૈદરાબાદમાં બે સુદાનના નાગરિકોને શંકાસ્પદ લક્ષણોના આધારે આઇસોલેશનમાં રાખવામાં આવ્યા છે. બંને દર્દીઓમાં ઇબોલા સંક્રમણની પુષ્ટિ થઈ નથી, પરંતુ સાવચેતીના ભાગરૂપે તેમને અલગ રાખીને તબીબી દેખરેખ હેઠળ સારવાર આપવામાં આવી રહી છે. આરોગ્ય વિભાગ અને હોસ્પિટલ પ્રશાસન સમગ્ર મામલે ઉચ્ચ સ્તરની સતર્કતા જાળવી રહ્યા છે. તેલંગાણા સરકાર દ્વારા એરપોર્ટથી લઈને હોસ્પિટલ સુધી વિશેષ મોનિટરિંગ વ્યવસ્થા ગોઠવવામાં આવી છે. ઇબોલા જેવા ગંભીર વાયરસના સંભવિત જોખમને ધ્યાનમાં રાખીને પ્રભાવિત દેશોમાંથી આવતા મુસાફરોની કડક તપાસ કરવામાં આવી રહી છે. હાલમાં બંને દર્દીઓના નમૂનાઓ લેબોરેટરી તપાસ માટે મોકલવામાં આવ્યા છે અને આરોગ્ય અધિકારીઓ રિપોર્ટની રાહ જોઈ રહ્યા છે.

20 વર્ષીય સુદાની વિદ્યાર્થીને તાવ બાદ હોસ્પિટલમાં ખસેડાયો

માહિતી અનુસાર તાજેતરનો કેસ 20 વર્ષીય સુદાની વિદ્યાર્થીનો છે. વિદ્યાર્થીને તાવ આવતાં તેને શરૂઆતમાં એક ખાનગી હોસ્પિટલમાં દાખલ કરવામાં આવ્યો હતો. જોકે, ઇબોલા જેવી ગંભીર ચેપી બીમારીની સંભાવનાને ધ્યાનમાં રાખીને તેને બાદમાં હૈદરાબાદની ગાંધી હોસ્પિટલમાં રિફર કરવામાં આવ્યો હતો. ગુરુવાર સાંજે હોસ્પિટલમાં દાખલ કરાયેલા આ વિદ્યાર્થીની સ્થિતિમાં શુક્રવાર સવાર સુધીમાં સુધારો નોંધાયો હતો. હોસ્પિટલના ડોક્ટરોના જણાવ્યા અનુસાર તે સમયે દર્દીને તાવ ન હતો અને તેની તબિયત સ્થિર હતી. તેમ છતાં સાવચેતીના ભાગરૂપે તેને આઇસોલેશન વોર્ડમાં જ રાખવામાં આવ્યો છે. તેની સાથે સંપર્કમાં આવેલા એટેન્ડન્ટને પણ હોમ આઇસોલેશનમાં રહેવાની સલાહ આપવામાં આવી છે.

એરપોર્ટ પર તાવ મળતા અન્ય મુસાફરને સીધા હોસ્પિટલ ખસેડાયો

આ પહેલાં 35 વર્ષીય અન્ય એક સુદાની નાગરિકને પણ ગાંધી હોસ્પિટલના વિશેષ આઇસોલેશન વોર્ડમાં દાખલ કરવામાં આવ્યો હતો. આ વ્યક્તિ ગુરુવારે હૈદરાબાદના એરપોર્ટ પર પહોંચ્યો હતો, જ્યાં રૂટીન થર્મલ સ્ક્રિનિંગ દરમિયાન તેને તાવ હોવાનું જાણવા મળ્યું હતું. એરપોર્ટ પર આરોગ્ય ટીમે તાત્કાલિક કાર્યવાહી કરીને મુસાફરને હોસ્પિટલમાં ખસેડ્યો હતો. હોસ્પિટલ પ્રશાસનના જણાવ્યા અનુસાર આ વ્યક્તિ ખભાની સર્જરી કરાવવા માટે ભારત આવ્યો હતો. હોસ્પિટલમાં નિરીક્ષણ દરમિયાન શુક્રવાર સવાર સુધીમાં તેમાં કોઈ ગંભીર લક્ષણો જોવા મળ્યા નહોતા અને તેને સંપૂર્ણપણે અસિમ્પ્ટોમેટિક ગણાવવામાં આવ્યો હતો.

આ પણ વાંચો: દેહરાદૂનના જંગલોમાં આગે મચાવી ભારે તબાહી!: ખેડૂતોની વર્ષોની મહેનત પળોમાં ખાખ! સમગ્ર વિસ્તારમાં હાહાકાર

ગાંધી હોસ્પિટલમાં ખાસ આઇસોલેશન વોર્ડ તૈયાર

ઇબોલા સહિતની ગંભીર ચેપી બીમારીઓના સંભવિત કેસોને ધ્યાનમાં રાખીને તેલંગાણા સરકારે ગાંધી હોસ્પિટલમાં 10 બેડનો વિશેષ આઇસોલેશન વોર્ડ તૈયાર કર્યો છે. આવા દર્દીઓને સામાન્ય દર્દીઓથી અલગ રાખીને સતત આરોગ્ય નિરીક્ષણ હેઠળ રાખવામાં આવે છે, જેથી કોઈપણ સંભવિત સંક્રમણને અટકાવી શકાય. આરોગ્ય અધિકારીઓનું કહેવું છે કે, હાલમાં બંને દર્દીઓમાં ઇબોલા સંક્રમણની સત્તાવાર પુષ્ટિ થઈ નથી. માત્ર શંકાસ્પદ લક્ષણોના આધારે તમામ જરૂરી પ્રોટોકોલનું પાલન કરવામાં આવી રહ્યું છે. તપાસ રિપોર્ટ આવ્યા બાદ જ સ્થિતિ વધુ સ્પષ્ટ બનશે.

શું છે ઇબોલા વાયરસ અને કેમ રહે છે વિશ્વભરમાં ચિંતા?

વિશ્વ આરોગ્ય સંસ્થા (WHO) અનુસાર ઇબોલા એક અત્યંત ગંભીર અને જીવલેણ વાયરલ બીમારી છે. આ વાયરસ મુખ્યત્વે સંક્રમિત જંગલી પ્રાણીઓ અથવા સંક્રમિત વ્યક્તિના શરીર પ્રવાહી સાથેના સંપર્કથી ફેલાય છે. તાવ, નબળાઈ, શરીરમાં દુખાવો અને ગંભીર સ્થિતિમાં આંતરિક તેમજ બાહ્ય રક્તસ્રાવ જેવા લક્ષણો જોવા મળી શકે છે. ભૂતકાળમાં આફ્રિકાના અનેક દેશોમાં ઇબોલાના પ્રકોપે હજારો લોકોના જીવ લીધા હતા. તેથી જ કોઈપણ દેશમાં ઇબોલા જેવા સંભવિત કેસ સામે આવતા આરોગ્ય તંત્ર તરત જ સાવચેતીના પગલાં અમલમાં મૂકે છે.

હાલ સ્થિતિ નિયંત્રણમાં, પરંતુ આરોગ્ય વિભાગ હાઈ એલર્ટ પર

હૈદરાબાદમાં સામે આવેલા બંને કેસોને લઈને આરોગ્ય વિભાગે સ્પષ્ટ કર્યું છે કે, ગભરાવાની જરૂર નથી. હાલ બંને દર્દીઓની સ્થિતિ સ્થિર છે અને કોઈપણ દર્દીમાં ઇબોલાની પુષ્ટિ થઈ નથી. તેમ છતાં તમામ સુરક્ષા અને ચેપ નિયંત્રણ સંબંધિત માર્ગદર્શિકાનું કડક પાલન કરવામાં આવી રહ્યું છે. એરપોર્ટ પર સ્ક્રિનિંગ પ્રક્રિયા વધુ સઘન બનાવવામાં આવી છે અને વિદેશથી આવતા મુસાફરો પર ખાસ નજર રાખવામાં આવી રહી છે. આરોગ્ય વિભાગના અધિકારીઓનું કહેવું છે કે દરેક શંકાસ્પદ કેસની વૈજ્ઞાનિક અને તબીબી રીતે સંપૂર્ણ તપાસ કરવામાં આવશે જેથી જાહેર આરોગ્ય સુરક્ષિત રહી શકે.