બિહારના પટનામાં જાણીતા શિક્ષક અને યુટ્યુબર ખાન સર એક નવા વિવાદમાં ઘેરાતા જોવા મળી રહ્યા છે. તેમના કોચિંગ સંસ્થાન બહાર થયેલી ફાયરિંગની ઘટનામાં હવે તેમના વિરુદ્ધ પણ પોલીસ કેસ નોંધાયો છે. આ મામલે અગાઉ તેમના બે સુરક્ષાકર્મીઓની ધરપકડ થઈ ચૂકી છે, જ્યારે હવે પોલીસ ફરિયાદમાં સુરક્ષાકર્મીઓ દ્વારા કરવામાં આવેલા નિવેદનોને આધારે ખાન સરની મુશ્કેલીઓ વધતી દેખાઈ રહી છે.
મળતી માહિતી અનુસાર 2 જૂન, 2026ની રાત્રે પટનાના કદમકુઆં વિસ્તારમાં આવેલી ખાન સરની કોચિંગ સંસ્થાન બહાર હંગામો અને ગોળીબારની ઘટના બની હતી. આ ઘટનાએ સ્થાનિક સ્તરે ભારે ચર્ચા જગાવી હતી. હવે તપાસ દરમિયાન સામે આવેલા દાવાઓને કારણે સમગ્ર મામલો વધુ ગંભીર બન્યો છે.
સુરક્ષાકર્મીઓના નિવેદનથી વિવાદ વધુ ઘેરાયો
પટના પોલીસ દ્વારા નોંધાયેલી ફરિયાદમાં સુરક્ષાકર્મીઓના નિવેદનોનો ઉલ્લેખ કરવામાં આવ્યો છે. પોલીસના જણાવ્યા અનુસાર પૂછપરછ દરમિયાન સુરક્ષાકર્મીઓએ સ્વીકાર્યું હતું કે ઘટનાના સમયે કોચિંગ સંસ્થાન બહાર મોટી સંખ્યામાં લોકો ભેગા થયા હતા અને સ્થિતિ તંગ બની ગઈ હતી. ફરિયાદ મુજબ કેટલાક લોકો ઉગ્ર બનીને કોચિંગના મુખ્ય ગેટ સુધી પહોંચી ગયા હતા. આ દરમિયાન સુરક્ષા ગાર્ડ સાથે મારામારી કરવામાં આવી હતી અને સંસ્થાનના બેનરોને પણ નુકસાન પહોંચાડવામાં આવ્યું હોવાનું જણાવાયું છે.
સુરક્ષાકર્મીઓએ પોલીસ સમક્ષ એવો દાવો કર્યો હોવાનું કહેવાય છે કે તેઓ હથિયાર લઈને બહાર આવ્યા ત્યારે કોચિંગ સંસ્થાન બહાર મોટી ભીડ એકત્રિત હતી. આ સમયે ખાન સર અને તેમના કેટલાક સહયોગીઓ દ્વારા ભીડ પર ફાયરિંગ કરવા માટે કહેવામાં આવ્યું હોવાનું સુરક્ષાકર્મીઓએ પોતાના નિવેદનમાં જણાવ્યું હોવાનું પોલીસ સૂત્રોનો દાવો છે.
પોલીસ તપાસમાં ઝડપ
ઘટના બાદ પટના પોલીસે મામલાની ગંભીરતાથી તપાસ શરૂ કરી છે. સુરક્ષાકર્મીઓની ધરપકડ બાદ હવે કેસની દિશા બદલાતી જોવા મળી રહી છે. પોલીસ અધિકારીઓ સમગ્ર ઘટનાક્રમ, હાજર લોકોના નિવેદનો અને અન્ય પુરાવાઓના આધારે આગળની કાર્યવાહી કરી રહ્યા છે. સૂત્રોના જણાવ્યા મુજબ પટના રેન્જના ઉચ્ચ પોલીસ અધિકારીઓ દ્વારા આ મામલે વિશેષ બેઠક યોજવામાં આવી હતી. બેઠકમાં કેસની તપાસ, કાયદાકીય પ્રક્રિયા અને આગામી પગલાં અંગે ચર્ચા કરવામાં આવી હોવાનું જાણવા મળ્યું છે.
આ પણ વાંચો: ધારાસભ્યો બાદ હવે સાંસદો બગાવતની તૈયારીમાં! : શું સંસદમાં તૂટી જશે મમતાની TMC? સમજો નંબરોની આખી રમત
કાનૂની સલાહ લઈ રહી છે ખાન સરની ટીમ
બીજી તરફ ખાન સરની કાનૂની ટીમ પણ સક્રિય બની ગઈ છે. અહેવાલો અનુસાર તેઓ પોતાના વકીલો સાથે સતત ચર્ચા કરી રહ્યા છે અને આગામી કાનૂની વિકલ્પો પર વિચારણા કરી રહ્યા છે. ખાસ કરીને આગોતરા જામીન (Anticipatory Bail) સહિતની કાનૂની પ્રક્રિયા અંગે સલાહ લેવામાં આવી રહી હોવાનું જણાવવામાં આવે છે. હાલ સુધી ખાન સર અથવા તેમની ટીમ તરફથી આક્ષેપો અંગે કોઈ વિગતવાર સત્તાવાર પ્રતિક્રિયા જાહેર કરવામાં આવી નથી. તેથી સમગ્ર મામલે પોલીસ તપાસના પરિણામો પર સૌની નજર ટકેલી છે.
આ પણ વાંચો: આખરે પવન ખેડાની 'તપસ્યા' રંગ લાવી : કોંગ્રેસે રાજ્યસભા માટે જાહેર કરી દિગ્ગજોની યાદી, જુઓ સંપૂર્ણ લિસ્ટ
વિદ્યાર્થીઓને પોલીસની અપીલ
આ સમગ્ર ઘટનાક્રમ વચ્ચે પટના પોલીસે વિદ્યાર્થીઓને ખાસ અપીલ પણ કરી છે. પોલીસનું કહેવું છે કે કોઈપણ પ્રકારની અફવા કે ઉશ્કેરણીજનક વાતોમાં આવીને કાયદો હાથમાં ન લેવો જોઈએ. પોલીસે જણાવ્યું છે કે વિવિધ કોચિંગ સંસ્થાઓ વચ્ચેની સ્પર્ધાના કારણે ઉભી થતી પરિસ્થિતિમાં વિદ્યાર્થીઓએ સાવચેતી રાખવી જોઈએ અને કોઈના પ્રભાવ હેઠળ આવીને કાયદો અને વ્યવસ્થા ખોરવાય તેવા પગલાં ન ભરવા જોઈએ.
ચર્ચાના કેન્દ્રમાં ખાન સર
ખાન સર દેશભરમાં પોતાના અનોખા શિક્ષણ શૈલી અને સ્પર્ધાત્મક પરીક્ષાઓની તૈયારી માટે જાણીતા છે. સોશિયલ મીડિયા અને યુટ્યુબ પર તેમના લાખો અનુયાયીઓ છે. આવી સ્થિતિમાં તેમના નામ સાથે જોડાયેલા આ વિવાદે દેશભરમાં ચર્ચા જગાવી છે.
