શું ઈ-ચલણ કેન્સલ કરી શકાય? : ઘરે બેઠા કેવી રીતે રદ કરી શકાય ઈ-ચલણ? આ સરળ સ્ટેપ્સથી બચાવો દંડના રૂપિયા

How to Cancel e-Challan: રસ્તા પર મુસાફરી કરવા માટે કેટલાક નિયમો બનાવવામાં આવ્યા છે. આ નિયમોનું ઉલ્લંઘન કરનારાઓ પર દંડ લાદવામાં આવે છે. સરકાર લોકોની સુરક્ષા માટે તમામ નિયમો બનાવે છે. જેના કારણે તેઓ દંડથી ડરતા હોય તો પણ નિયમોનું પાલન કરે છે. ટ્રાફિકના નિયમોનું યોગ્ય રીતે પાલન થઈ રહ્યું છે કે નહીં તેની ખાતરી કરવા માટે પોલીસ કર્મચારીઓ વિવિધ સ્થળોએ ઊભા રહે છે. સાથે જ આ માટે ઈ-ચલણ પણ બનાવવામાં આવે છે. ઘણી વખત કોઈ પણ ભૂલ વિના ચલણ જાહેર કરવામાં આવે છે, આવા કિસ્સામાં, દંડ ભરવાને બદલે તમે તેને રદ કરાવી શકો છો. બસ આ માટે તમારે કેટલાક સ્ટેપ્સ ફોલો કરવા પડશે.

શું છે ઈ-ચલણ ?
ઈ-ચલણ એટલે કે ઈલેક્ટ્રોનિક ચલણ ટ્રાફિક નિયમોના ઉલ્લંઘન માટે ઈશ્યુ કરવામાં આવે છે. આ માટે કોઈ પોલીસકર્મીની હાજરીની જરૂર નથી, કારણ કે આ એક ઓટોમેટિક સિસ્ટમ છે, જે કેમેરાના રૂપમાં રસ્તાઓ પર લગાવવામાં આવે છે. જો કોઈ વાહન નિયમોનું ઉલ્લંઘન કરે છે, તો તે વાહનનું ચલણ તરત જ ઈશ્યુ કરવામાં આવે છે. ચલણ વિશેની માહિતી તમારા રજિસ્ટર્ડ નંબર પર મોકલવામાં આવે છે.

એવું જરૂરી નથી કે દર વખતે નિયમનો ભંગ થાય ત્યારે ચલણ જ હોવું જોઈએ. ઘણી વખત ભૂલથી પણ ચલણ ઈશ્યુ થઈ જાય છે. તમે આ પ્રકારનું ચલણ સરળતાથી રદ પણ કરી શકો છો. આ માટે તમારે ટ્રાફિક વિભાગના સત્તાવાર પોર્ટલ પર જવું પડશે.

ચલણ કેવી રીતે રદ કરવું!
જો તમે ચલણ રદ કરવા માંગો છો, તો તેના માટે તમારા રાજ્યના ટ્રાફિક વિભાગની સત્તાવાર વેબસાઇટ અથવા પોર્ટલ પર જાઓ. અહીં લોગિન કરો. આ પછી ચલણ નંબર અને વાહન નંબર દાખલ કરો, જેથી ચલનની સંપૂર્ણ વિગતો સ્પષ્ટપણે દેખાશે. આમાં તમારે એ પણ જણાવવાનું રહેશે કે તમારું ચલણ ભૂલથી કપાઈ ગયું છે. આ માટે, ‘Dispute’ વિકલ્પ દેખાશે, જેના પર તમે ફરિયાદ નોંધાવી શકો છો.

તમારું કામ અહીં પૂરું થતું નથી. ફરિયાદ પછી નોટિસ મોકલવામાં આવશે, જો ફરિયાદ સાચી હશે તો ચલણ રદ કરવામાં આવશે. ઘણી જગ્યાએ આ કાર્યવાહી ઓનલાઈન કરવાની હોય છે અને કેટલાક રાજ્યોમાં દલીલો રૂબરૂમાં કરવાની હોય છે. છેલ્લે એક પ્રમાણપત્ર અથવા નોટિસ આપવામાં આવશે, જેમાં ચલણ રદ કરવાની માહિતી આપવામાં આવશે.