હવામાન વિભાગે રાજ્યમાં આગામી 24 કલાક માટે ભારે થી અતિભારે વરસાદની આગાહી કરી છે. ખાસ કરીને દક્ષિણ ગુજરાતના વિસ્તારોમાં વરસાદની તીવ્રતા વધુ રહેવાની શક્યતા હોવાથી ઓરેન્જ એલર્ટ જાહેર કરાયું છે.
હવામાન વિભાગ અનુસાર, નવસારી, વલસાડ અને દમણ જિલ્લામાં ભારેથી અતિભારે વરસાદની શક્યતા છે. આ વિસ્તારો માટે ઓરેન્જ એલર્ટ આપવામાં આવ્યું છે. જ્યારે ભરૂચ, સુરત, તાપી અને નર્મદા જિલ્લામાં યલો એલર્ટ જાહેર કરાયું છે. અમદાવાદ સહિત કેટલાક વિસ્તારોમાં હળવાથી મધ્યમ વરસાદ પડી શકે છે.
માછીમારોને 12થી 14 ઓગસ્ટ સુધી દરિયામાં ન જવાની સૂચના અપાઈ છે. અપર એર સાયક્લોનિક સર્ક્યુલેશન સક્રિય થતા 14 ઓગસ્ટથી શરૂ થનારા અઠવાડિયામાં રાજ્યના અનેક વિસ્તારોમાં વરસાદની તીવ્રતા વધવાની સંભાવના છે.
