છેલ્લા એક અઠવાડિયા દરમિયાન ચીનની રાજધાની બેઇજિંગમાં મુશળધાર વરસાદને કારણે આવેલા પૂરને કારણે અત્યાર સુધીમાં 44 લોકોનાં મોત થયા છે અને 9 લોકો ગુમ છે. સ્થાનિક અધિકારીઓએ ગુરુવારે આ અંગે માહિતી આપી હતી. અધિકારીઓ છેલ્લા ચાર દિવસથી બેઇજિંગમાં આપત્તિ રાહત અને બચાવ કામગીરી ચલાવી રહ્યા છે, જ્યારે ફરીથી ભારે વરસાદને કારણે રસ્તાઓ નુકસાન પામ્યા છે. વીજ પુરવઠો ખોરવાઈ ગયો છે અને લોકોને મોટા પાયે સુરક્ષિત સ્થળોએ ખસેડવામાં આવ્યા છે.
રાષ્ટ્રપતિ શીએ રાહત અને બચાવ માટે આદેશો આપ્યા
રાજ્ય સમાચાર એજન્સી 'સિન્હુઆ' એ સ્થાનિક અધિકારીઓને ટાંકીને જણાવ્યું છે કે વરસાદ સંબંધિત ઘટનાઓમાં 44 લોકોનાં મોત થયા છે અને 9 અન્ય ગુમ છે. સ્થાનિક અધિકારીઓના જણાવ્યા અનુસાર, બેઇજિંગના ઉત્તરીય પર્વતીય જિલ્લાઓ મિયુન અને યાનકિંગમાંથી મુશળધાર વરસાદ અને પૂરને કારણે લોકોના મોત થયાના અહેવાલો મળ્યા છે. શનિવારથી ભારે વરસાદ શરૂ થયો હતો. અગાઉ સોમવારે રાષ્ટ્રપતિ શી જિનપિંગે પૂર અને ભૂસ્તરશાસ્ત્રીય આફતોનો સામનો કરવા અને લોકોના જીવન અને સંપત્તિની સલામતી સુનિશ્ચિત કરવા માટે તમામ પ્રયાસો કરવાનો આદેશ આપ્યો હતો.
ચીનના કેટલાક ભાગો હાલમાં ભારે વરસાદને કારણે થતી પૂર અને ભૂસ્તરશાસ્ત્રીય આફતોથી પ્રભાવિત છે. અનેક સત્તાવાર મીડિયા અહેવાલો અનુસાર, ફક્ત બેઇજિંગમાં જ 80,000 થી વધુ લોકોને સ્થળાંતરિત કરવામાં આવ્યા છે. જ્યારે મુશળધાર વરસાદથી 31 રસ્તાઓને નુકસાન થયું છે અને 136 ગામોમાં વીજ પુરવઠો ખોરવાઈ ગયો છે.
ચીનના નાણા મંત્રાલય અને કટોકટી વ્યવસ્થાપન મંત્રાલયે મંગળવારે પૂરથી પ્રભાવિત બેઇજિંગ સહિત નવ પ્રાંતીય-સ્તરના પ્રદેશો માટે કેન્દ્ર સરકારના આપત્તિ રાહત ભંડોળમાં 350 મિલિયન યુઆન (48.9 મિલિયન યુએસ ડોલર) ફાળવ્યા છે. મંગળવારે, ચીનના રાષ્ટ્રીય વિકાસ અને સુધારણા પંચે જણાવ્યું હતું કે તેણે બેઇજિંગમાં આપત્તિ રાહત પ્રયાસો માટે 200 મિલિયન યુઆન (28 મિલિયન યુએસ ડોલર) ફાળવ્યા છે.
