અમદાવાદ સહિત ગુજરાતના અનેક વિસ્તારોમાં વરસાદ : ગરમીથી લોકોને રાહત

ગુજરાતમાં ચોમાસાની સત્તાવાર એન્ટ્રી હજુ સુધી થઈ નથી, છતાં રાજ્યના અનેક વિસ્તારોમાં મેઘરાજાએ હાજરી નોંધાવતાં વાતાવરણમાં ઠંડક પ્રસરી ગઈ છે. અમદાવાદ, બગોદરા, ધોલેરા, અરવલ્લી, નવસારી સહિત અનેક વિસ્તારોમાં વરસાદી ઝાપટાં અને ગાજવીજ સાથે વરસાદ વરસતા લોકોને અસહ્ય ગરમી અને બફારામાંથી મોટી રાહત મળી છે. બીજી તરફ હવામાન વિભાગે રાજ્યના કેટલાક જિલ્લાઓ માટે ઓરેન્જ અને યેલો એલર્ટ જાહેર કરીને આગામી કલાકોમાં વધુ વરસાદની શક્યતા વ્યક્ત કરી છે.

ચોમાસું મોડું પડતાં ચિંતા, પરંતુ વરસાદે આપી રાહત

સામાન્ય રીતે ગુજરાતમાં ચોમાસું 15 જૂન સુધીમાં પ્રવેશી જતું હોય છે અને મહિનાના અંત સુધી સમગ્ર રાજ્યને આવરી લે છે. જોકે આ વર્ષે 15 જૂન પસાર થઈ ગયા બાદ પણ ચોમાસાની સત્તાવાર એન્ટ્રી થઈ નથી. હવામાન એજન્સી સ્કાયમેટના અંદાજ મુજબ ચોમાસું પશ્ચિમ કિનારે સ્થિર થઈ ગયું છે અને મુંબઈ પહોંચવામાં પણ હજુ 7થી 8 દિવસનો સમય લાગી શકે છે.

ચોમાસાના વિલંબ વચ્ચે રાજ્યના અનેક વિસ્તારોમાં વરસાદી માહોલ સર્જાતા ખેડૂતો અને સામાન્ય નાગરિકોમાં આશા જાગી છે. ખાસ કરીને ખેતી આધારિત વિસ્તારોમાં વરસાદને લઈને ઉત્સાહ જોવા મળી રહ્યો છે.

અમદાવાદમાં વરસાદી છાંટાંથી વાતાવરણમાં ઠંડક

અમદાવાદ શહેરમાં છેલ્લા કેટલાક દિવસોથી ભારે બફારો અને ગરમી અનુભવાઈ રહી હતી. મંગળવારે શહેરના એસ.પી. રિંગ રોડ પર વૈષ્ણોદેવી સર્કલ નજીક તેમજ ઓગણજ વિસ્તાર તરફ વરસાદી છાંટાં પડતાં વાતાવરણમાં નોંધપાત્ર ઠંડક પ્રસરી ગઈ હતી.

વરસાદના કારણે વાહનચાલકો અને રાહદારીઓને પણ ગરમીમાંથી રાહત મળી હતી. શહેરમાં વાદળછાયું વાતાવરણ સર્જાતા ચોમાસાની આતુરતાથી રાહ જોતા લોકોમાં ખુશી જોવા મળી હતી.

ધોલેરા અને બગોદરામાં મેઘમહેર

અમદાવાદ ગ્રામ્ય વિસ્તારના બગોદરામાં પવન સાથે સારો વરસાદ વરસ્યો હતો. વરસાદના કારણે કેટલાક માર્ગો પર પાણી ફરી વળ્યાં હતા. લાંબા સમયથી વરસાદની રાહ જોઈ રહેલા સ્થાનિકો માટે આ વરસાદ રાહતરૂપ સાબિત થયો હતો.

ધોલેરા પંથકમાં પણ લાંબા વિરામ બાદ વરસાદ વરસતાં સમગ્ર વિસ્તારમાં ઠંડક પ્રસરી ગઈ હતી. ખેડૂતો માટે આ વરસાદ ખૂબ મહત્વનો માનવામાં આવી રહ્યો છે કારણ કે આગામી વાવણીની તૈયારીઓ માટે ભેજ જરૂરી છે.

અરવલ્લી સહિત ઉત્તર ગુજરાતમાં ગાજવીજ સાથે વરસાદ

અરવલ્લી જિલ્લામાં ગાજવીજ સાથે વરસાદી માહોલ જામ્યો હતો. હવામાન વિભાગે અરવલ્લી, સાબરકાંઠા, મહેસાણા, ગાંધીનગર અને અમદાવાદ માટે ઓરેન્જ એલર્ટ જાહેર કર્યું હતું.

આ ઉપરાંત બનાસકાંઠા, મહિસાગર, દાહોદ, પંચમહાલ, ખેડા, આણંદ, વડોદરા, છોટાઉદેપુર, નર્મદા, ભરૂચ, સુરેન્દ્રનગર, બોટાદ અને ભાવનગર જિલ્લામાં યેલો એલર્ટ જાહેર કરવામાં આવ્યું હતું. આ વિસ્તારોમાં હળવાથી મધ્યમ વરસાદની શક્યતા વ્યક્ત કરવામાં આવી હતી.

ગીર, તાલાલા અને અન્ય ગ્રામ્ય વિસ્તારોમાં ખેડૂતોમાં ખુશી

સૌરાષ્ટ્રના ગીર પંથકમાં આવેલા તાલાલા વિસ્તારમાં લાંબા સમય બાદ ધીમીધારે વરસાદ શરૂ થયો હતો. વરસાદના કારણે ખેડૂતોમાં ખુશીની લાગણી જોવા મળી હતી. વાવણીની તૈયારીઓ કરી રહેલા ખેડૂતો માટે આ વરસાદ આશીર્વાદ સમાન માનવામાં આવી રહ્યો છે.

સાબરકાંઠાના વડાલી તાલુકાના કુબા ધરોલ ગામ સહિત આસપાસના વિસ્તારોમાં પણ ઝરમર વરસાદ વરસ્યો હતો. જ્યારે બનાસકાંઠાના થરાદ પંથકમાં વેદલા, દિદરડા અને દુધવા સહિતના ગામોમાં વરસાદી ઝાપટાં પડતાં ગરમીમાંથી રાહત મળી હતી.

નવસારીમાં પણ વરસ્યા વરસાદી ઝાપટાં

દક્ષિણ ગુજરાતના નવસારી શહેરમાં પણ વાતાવરણમાં અચાનક પલટો જોવા મળ્યો હતો. શહેરના સર્કિટ હાઉસ, ડેપો અને આસપાસના વિસ્તારોમાં પવન સાથે વરસાદી ઝાપટાં પડ્યાં હતાં. વરસાદના કારણે વાતાવરણમાં ઠંડક પ્રસરી હતી.

જોકે દક્ષિણ ગુજરાતમાં ચોમાસાની સત્તાવાર એન્ટ્રી હજુ બાકી છે, છતાં વરસાદી ઝાપટાંને કારણે ખેડૂતોમાં આશા જાગી છે કે આગામી દિવસોમાં સારો વરસાદ નોંધાઈ શકે છે.

આગામી 7 દિવસ માટે શું કહે છે હવામાન વિભાગ?

હવામાન વિભાગના ડાયરેક્ટર એ.કે. દાસના જણાવ્યા અનુસાર આગામી સાત દિવસ દરમિયાન ગુજરાત, દીવ, દમણ અને દાદરા નગર હવેલી માટે કોઈ મોટું એલર્ટ નથી. જોકે અનેક વિસ્તારોમાં હળવાથી મધ્યમ વરસાદની સંભાવના યથાવત છે.

હાલમાં રાજ્યના વિવિધ વિસ્તારોમાં સ્થાનિક વાતાવરણીય પરિસ્થિતિઓના કારણે વરસાદી ઝાપટાં પડી રહ્યા છે. આગામી દિવસોમાં પણ વાદળછાયું વાતાવરણ અને છૂટાછવાયા વરસાદની શક્યતા વ્યક્ત કરવામાં આવી છે.