Rajkot News: શહેરમાં ગુનાખોરી અને માફિયાગીરીને જડમૂળથી ઉખાડી ફેંકવા માટે રાજકોટ પોલીસ અને ક્રાઈમ બ્રાન્ચ એક્શન મોડમાં આવી ગઈ છે. સંગઠિત ગુનાખોરી આચરતી ટોળકીઓ સામે પોલીસે વધુ એક વખત કડક કાનૂની શસ્ત્ર ઉગામ્યું છે. શહેરમાં આતંક મચાવતી કુખ્યાત રામદેવ ડાંગરની ટોળકી વિરુદ્ધ ગુજરાત કંટ્રોલ ઓફ ટેરરિઝમ એન્ડ ઓર્ગેનાઈઝ્ડ ક્રાઈમ (GUJCTOC-ગુજસીટોક) હેઠળ ગુનો દાખલ કરવામાં આવ્યો છે. આ ગેંગના કુલ 5 આરોપીઓ સામે કાયદાનો સકંજો કસાયો છે.
5માંથી 3 આરોપીઓની ધરપકડ, અન્યની શોધખોળ શરૂ
રાજકોટ ક્રાઈમ બ્રાન્ચે આ મામલે ત્વરિત અને કડક કાર્યવાહી હાથ ધરીને ગેંગના 5 સભ્યોમાંથી 3 આરોપીઓની ધરપકડ કરી લીધી છે અને તેમને જેલ હવાલે કરી દીધા છે. જ્યારે ટોળકીના બાકીના નાસતા ફરતા આરોપીઓને ઝડપી પાડવા માટે પોલીસે ચક્રો ગતિમાન કર્યા છે.
ગેંગનો હિસ્ટ્રીશીટ ટ્રેક રેકોર્ડ: કુલ 52 ગુનાઓ નોંધાયેલા છે
પોલીસ તપાસમાં સામે આવેલી વિગતો મુજબ, રામદેવ ડાંગરની ટોળકી લાંબા સમયથી રાજકોટ અને આસપાસના વિસ્તારોમાં કાયદો અને વ્યવસ્થા માટે મોટો પડકાર બની હતી. આ ગેંગના સભ્યો હત્યા, હત્યાની કોશિશ, તેમજ આર્મ્સ એક્ટ (ગેરકાયદેસર હથિયાર રાખવા) જેવા અનેક ગંભીર ગુનાઓમાં સંડોવાયેલા છે. પોલીસ રેકોર્ડ અનુસાર, આ ટોળકી વિરુદ્ધ અત્યાર સુધીમાં કુલ 52 જેટલા ગુનાઓ નોંધાઈ ચૂક્યા છે. સંગઠિત થઈને ગુના આચરતી આ ગેંગના આર્થિક અને ગુનાહિત નેટવર્કને તોડી પાડવા માટે ગુજસીટોકનું આ પગલું ખૂબ જ મહત્વપૂર્ણ સાબિત થશે તેમ પોલીસ માની રહી છે.
એક વર્ષમાં 8 ગેંગ પર ત્રાટકી પોલીસ: 90થી વધુ ગુનેગારો જેલમાં
રાજકોટ પોલીસ કમિશનરેટ અને ક્રાઈમ બ્રાન્ચ દ્વારા છેલ્લા એક વર્ષથી સંગઠિત ગુનાખોરી સામે એક વિશેષ અભિયાન ચલાવવામાં આવી રહ્યું છે. આ ઝુંબેશ હેઠળ પોલીસને મોટી સફળતા મળી છે. ગુજસીટોક હેઠળ લેવાયેલી ગેંગ 08 ગેંગ, જેલભેગા કરાયેલા કુલ આરોપીઓ 90થી વધુ..
પોલીસનો સ્પષ્ટ સંદેશ: ગુનેગારોમાં ભય અને નાગરિકોમાં સુરક્ષાની ભાવના જરૂરી
પોલીસ અધિકારીઓના જણાવ્યા અનુસાર, શહેરમાં શાંતિ, સલામતી અને કાયદો-વ્યવસ્થા જાળવી રાખવા માટે આગામી દિવસોમાં પણ ગુનેગારો સામે આવી જ કડક કાર્યવાહી ચાલુ રહેશે. સામાન્ય નાગરિકો કોઈપણ ડર વગર સુરક્ષિત વાતાવરણમાં જીવી શકે અને ગુનેગારોમાં કાયદાનો ખોફ પેદા થાય તે માટે પોલીસ સંપૂર્ણપણે પ્રતિબદ્ધ છે.
