Gujarat Weather News: ગુજરાતમાં ચોમાસાની ગતિ હાલમાં ધીમી દેખાઈ રહી છે, પરંતુ આગામી દિવસોમાં રાજ્યના અનેક વિસ્તારોમાં વરસાદી માહોલ જામી શકે છે. હવામાન વિભાગ (IMD)ના અનુમાન મુજબ હાલ એકસાથે ત્રણ મહત્વપૂર્ણ હવામાનીય સિસ્ટમ સક્રિય થઈ છે, જેના કારણે 2 અને 3 જુલાઈથી રાજ્યના વિવિધ વિસ્તારોમાં વરસાદની ગતિવિધિઓ તેજ બનવાની સંભાવના વ્યક્ત કરવામાં આવી છે. વેસ્ટર્ન ડિસ્ટર્બન્સ, મધ્યપ્રદેશ આસપાસ સક્રિય સાયક્લોનિક સર્ક્યુલેશન અને પંજાબથી બિહાર સુધી વિસ્તરેલો મોનસૂન ટ્રફ હાલમાં વાતાવરણને અનુકૂળ બનાવી રહ્યા છે. આ ત્રણેય સિસ્ટમના સંયુક્ત પ્રભાવને કારણે દક્ષિણ ગુજરાત, સૌરાષ્ટ્ર અને કચ્છના કેટલાક વિસ્તારોમાં સારો વરસાદ નોંધાઈ શકે છે. બીજી તરફ ભેજનું પ્રમાણ વધતા લોકોને ગરમી અને બફારાનો પણ સામનો કરવો પડી રહ્યો છે.
દક્ષિણ ગુજરાતમાં ભારે વરસાદની સંભાવના
હવામાન વિભાગની આગાહી અનુસાર આગામી દિવસોમાં દક્ષિણ ગુજરાતમાં વરસાદી માહોલ વધુ સક્રિય બનશે. સુરત, નવસારી, વલસાડ, ડાંગ અને તાપી જિલ્લામાં ભારેથી અતિભારે વરસાદ પડવાની શક્યતા વ્યક્ત કરવામાં આવી છે. જેના પગલે સ્થાનિક વહીવટી તંત્રને પણ સતર્ક રહેવા સૂચના આપવામાં આવી છે. આજે રાજ્યના અનેક જિલ્લાઓમાં છૂટાછવાયા વરસાદી ઝાપટાં પડવાની શક્યતા છે. ઉત્તર ગુજરાતના બનાસકાંઠા, સાબરકાંઠા, પાટણ અને અરવલ્લી સહિતના વિસ્તારોમાં હળવાથી મધ્યમ વરસાદની આગાહી કરવામાં આવી છે. મધ્ય ગુજરાતના પંચમહાલ, દાહોદ અને મહીસાગરમાં પણ વરસાદી માહોલ રહેવાની સંભાવના છે.
2થી 4 જુલાઈ વચ્ચે યલો એલર્ટ
હવામાન વિભાગે 2થી 4 જુલાઈ દરમિયાન દક્ષિણ ગુજરાતના નવસારી, સુરત, વલસાડ અને ડાંગ જિલ્લામાં ભારે વરસાદને લઈને યલો એલર્ટ જાહેર કર્યું છે. આ સમયગાળા દરમિયાન ગાજવીજ સાથે વરસાદ અને 40થી 50 કિલોમીટર પ્રતિ કલાકની ઝડપે પવન ફૂંકાવાની શક્યતા છે. સૌરાષ્ટ્રના રાજકોટ, અમરેલી, જૂનાગઢ, ભાવનગર, ગીર સોમનાથ અને મોરબી સહિતના જિલ્લાઓમાં પણ છૂટોછવાયો વરસાદ નોંધાઈ શકે છે. કચ્છ અને દરિયાકાંઠાના વિસ્તારોમાં પણ વરસાદી ગતિવિધિઓ વધવાની સંભાવના દર્શાવવામાં આવી છે.
આ પણ વાંચો: ભારે વરસાદથી લઈને વાવાઝોડા સુધી... : IMDએ 15 રાજ્યો માટે જાહેર કર્યું હાઈ એલર્ટ, 70 કિમીની ઝડપે ફૂંકાશે પવન
માછીમારોને દરિયો ન ખેડવાની સૂચના
રાજ્યના દરિયાકાંઠાના વિસ્તારોમાં આગામી બે દિવસ દરમિયાન દરિયામાં ભારે કરંટ અને ઊંચા મોજાં ઉછળવાની શક્યતા છે. આ પરિસ્થિતિને ધ્યાનમાં રાખીને હવામાન વિભાગે 1 અને 2 જુલાઈ દરમિયાન માછીમારોને દરિયો ન ખેડવાની ચેતવણી આપી છે. વરસાદી સિસ્ટમ સક્રિય થતાં પવનની ગતિમાં પણ વધારો થઈ શકે છે. કેટલાક વિસ્તારોમાં 40થી 60 કિલોમીટર પ્રતિ કલાકની ઝડપે પવન ફૂંકાવાની શક્યતા હોવાથી દરિયાકાંઠાના વિસ્તારોમાં ખાસ સાવચેતી રાખવા સૂચના આપવામાં આવી છે.
વરસાદ વચ્ચે ગરમી અને બફારાનો ત્રાસ યથાવત
એક તરફ રાજ્યમાં વરસાદી માહોલ જામવાની શક્યતા છે તો બીજી તરફ ભેજના પ્રમાણમાં વધારો થતાં ગરમી અને બફારાનો અનુભવ પણ વધી રહ્યો છે. આગામી દિવસોમાં રાજ્યના અનેક વિસ્તારોમાં મહત્તમ તાપમાન 38થી 40 ડિગ્રી સેલ્સિયસ આસપાસ નોંધાઈ શકે છે. અમદાવાદમાં તાપમાન 41 ડિગ્રી સુધી પહોંચવાની સંભાવના વ્યક્ત કરવામાં આવી છે. સૌરાષ્ટ્ર અને કચ્છના વિસ્તારોમાં પણ ભેજયુક્ત ગરમીના કારણે લોકોને ઉકળાટનો સામનો કરવો પડી શકે છે. આમ રાજ્યમાં આગામી દિવસોમાં એક સાથે વરસાદ અને ગરમીનો ડબલ અહેસાસ જોવા મળી શકે છે.
આગામી સપ્તાહે વરસાદની ગતિ વધશે
હવામાન વિભાગના અનુમાન મુજબ આગામી સાત દિવસ દરમિયાન દક્ષિણ ગુજરાતમાં વરસાદની તીવ્રતા વધવાની સંભાવના છે. સૌરાષ્ટ્ર અને કચ્છના વિસ્તારોમાં પણ છૂટાછવાયા વરસાદી ઝાપટાં પડી શકે છે. ચોમાસાની ગતિ હાલ ધીમી હોવા છતાં આગામી દિવસોમાં વરસાદી પ્રવૃત્તિમાં વધારો થશે અને ખેડૂતો સહિત સામાન્ય નાગરિકોને ગરમીમાંથી રાહત મળવાની આશા છે.
