મહિલાઓ માટે સરકારી નોકરીની ઉત્તમ તક : રૂ.40,800 પગાર સાથે મુખ્ય સેવિકાની ભરતી જાહેર, જાણો ક્યાં અને કેવી રીતે કરવી અરજી

Gujarat Panchayat Bharti 2026: ગુજરાતમાં સરકારી નોકરીની તૈયારી કરી રહેલી મહિલા ઉમેદવારો માટે આનંદના સમાચાર સામે આવ્યા છે. ગુજરાત પંચાયત સેવા પસંદગી મંડળ (GPSSB) દ્વારા 'મુખ્ય સેવિકા' (વર્ગ-3) ની ખાલી પડેલી જગ્યાઓ ભરવા માટે સત્તાવાર જાહેરાત કરવામાં આવી છે. રાજ્યભરમાં કુલ 169 જગ્યાઓ માટે ઓનલાઈન અરજીઓ મંગાવવામાં આવી છે. આ ભરતી ખાસ કરીને એવી મહિલાઓ માટે શ્રેષ્ઠ અવસર છે જેઓ સામાજિક ક્ષેત્રે કામ કરવાની સાથે સરકારી ક્ષેત્રમાં સ્થિર અને પ્રતિષ્ઠિત કારકિર્દી બનાવવા ઈચ્છે છે.

આ ભરતી પ્રક્રિયા સંપૂર્ણપણે ઓનલાઈન રહેશે અને લાયક ઉમેદવારોએ OJAS પોર્ટલ પર જઈને નિયત સમયમર્યાદામાં ફોર્મ ભરવાના રહેશે. પંચાયત વિભાગ દ્વારા લાંબા સમય બાદ આ મહત્વની ભરતી બહાર પાડવામાં આવતા રાજ્યની શિક્ષિત મહિલાઓમાં ઉત્સાહ જોવા મળી રહ્યો છે. ખાસ વાત એ છે કે આ નોકરીમાં પગારધોરણ અત્યંત આકર્ષક રાખવામાં આવ્યું છે, જે મધ્યમ વર્ગની મહિલાઓ માટે આર્થિક રીતે સદ્ધર થવાની મોટી તક છે.

પગારધોરણ: શરૂઆતના 5 વર્ષ મળશે આટલો ફિક્સ પગાર

આ ભરતીની સૌથી મોટી વિશેષતા તેનું પગારધોરણ છે. પસંદગી પામનાર ઉમેદવારોને શરૂઆતના 5 વર્ષ માટે દર મહિને ₹40,800 ફિક્સ પગાર આપવામાં આવશે. પાંચ વર્ષની સંતોષકારક સેવા પૂર્ણ કર્યા બાદ, ઉમેદવારને સરકારના નિયમો મુજબ નિયમિત પગારધોરણ (Full Pay) માં સામેલ કરવામાં આવશે, જેમાં ભથ્થાઓ અને અન્ય સરકારી લાભોનો પણ સમાવેશ થશે.

જિલ્લાવાર જગ્યાઓની વિગતો

કુલ 169 જગ્યાઓનું વિતરણ વિવિધ જિલ્લાઓ મુજબ કરવામાં આવ્યું છે. જેમાં આદિવાસી અને અંતરિયાળ વિસ્તારોમાં વધુ તકો ઉપલબ્ધ છે:

• વધુ જગ્યાઓ ધરાવતા જિલ્લા: દાહોદ, કચ્છ, સુરત અને છોટાઉદેપુર.

• અન્ય જિલ્લા: બાકીના જિલ્લાઓમાં 1 થી 5 જગ્યાઓનું વિતરણ કરવામાં આવ્યું છે. ઉમેદવારો પોતાની પસંદગીના જિલ્લામાં નોકરી મેળવવા માટે ઓનલાઈન લિસ્ટ ચેક કરી શકે છે.

આ પણ વાંચો: નોકરી છોડ્યા પછી પગાર બાકી મળ્યો? : આ ભૂલ ન કરતાં નહીં તો પછતાસો

કોણ કરી શકશે અરજી? (શૈક્ષણિક લાયકાત અને ઉંમર)

મુખ્ય સેવિકાના પદ માટે ચોક્કસ શૈક્ષણિક લાયકાત નક્કી કરવામાં આવી છે:

• ડિગ્રી: માન્ય યુનિવર્સિટીમાંથી સ્નાતક (Bachelor Degree) હોવી અનિવાર્ય છે.

• વિષયો: જો ઉમેદવાર ગૃહ વિજ્ઞાન (Home Science), સમાજશાસ્ત્ર, બાળ વિકાસ, પોષણ અથવા સામાજિક કાર્યમાં સ્નાતક કે માસ્ટર ડિગ્રી ધરાવતા હોય તો તેમને વિશેષ પ્રાથમિકતા મળી શકે છે.

• અન્ય લાયકાત: કમ્પ્યુટરનું પાયાનું જ્ઞાન અને ગુજરાતી-હિન્દી ભાષા પર પ્રભુત્વ હોવું જરૂરી છે.

• વય મર્યાદા: ઉમેદવારની ઉંમર 37 વર્ષ થી વધુ ન હોવી જોઈએ. જોકે, અનામત વર્ગની મહિલાઓને સરકારના ધારાધોરણ મુજબ વય મર્યાદામાં છૂટછાટ આપવામાં આવશે.

અરજી કેવી રીતે કરવી અને છેલ્લી તારીખ?

રસ ધરાવતી મહિલા ઉમેદવારોએ નીચે મુજબની પ્રક્રિયા અનુસરવાની રહેશે:

1. સૌ પ્રથમ OJAS Gujarat ની સત્તાવાર વેબસાઇટ પર જાઓ.

2. 'Online Application' મેનૂમાં 'Apply' પર ક્લિક કરો.

3. GPSSB (Panchayat Board) પસંદ કરીને 'Mukhya Sevika' પોસ્ટ પર જઈને 'Apply Now' કરો.

4. તમામ વિગતો ભરીને ડોક્યુમેન્ટ્સ અપલોડ કરો અને અરજી ફી ભરો.

5. છેલ્લી તારીખ: અરજી કરવાની અંતિમ તારીખ 9 મે 2026 છે.