મહેસાણા: ગોઝારીયાની હોસ્પિટલમાં દર્દીના સગાંઓનો ઉત્પાત, ડૉક્ટર પર હુમલો કરી જાનથી મારવાની ધમકી આપી

મહેસાણા: મહેસાણાના ગોઝારીયા વિસ્તારમાં આવેલી પ્રમુખ સ્વામી સર્જીકલ હોસ્પિટલમાં તોડફોડ અને ડૉક્ટર પર હુમલો થવાની ચકચારી ઘટના સામે આવી છે. હોસ્પિટલમાં સારવાર લઈ રહેલા એક કેન્સરના દર્દી અચાનક બેભાન થઈ જતાં તેમના સગાંઓ ઉશ્કેરાઈ ગયા હતા અને હોસ્પિટલમાં ભારે ઉત્પાત મચાવ્યો હતો. આ ઉશ્કેરાયેલા શખ્સોએ હોસ્પિટલમાં તોડફોડ કરવા ઉપરાંત 71 વર્ષીય વૃદ્ધ ડૉક્ટર અને તેમના પત્ની સાથે ઝપાઝપી કરી હતી. એટલું જ નહીં, આરોપીઓએ સારવાર પેટે ચૂકવેલા ₹2 લાખ પરત મેળવવા બાબતે ડૉક્ટરને જાનથી મારી નાખવાની ધમકી પણ આપી હતી. આ સમગ્ર મામલે પોલીસે તુરંત કાર્યવાહી કરીને ચાર વ્યક્તિઓ સામે ગુનો દાખલ કરી આગળની તપાસ હાથ ધરી છે.