કેન્દ્રીય ગૃહમંત્રી અમિત શાહ આજે (12 જુલાઈ) અમદાવાદમાં રાજ્ય સરકારના માર્ગ અને મકાન વિભાગ દ્વારા પૂર્ણ કરાયેલા ચાર આધુનિક મલ્ટીસ્ટોરી સરકારી આવાસ ટાવરનું ઈ-લોકાર્પણ કરશે. કુલ રૂ. 60.68 કરોડના ખર્ચે તૈયાર કરાયેલા આ પ્રોજેક્ટ હેઠળ 188 સરકારી આવાસોનું નિર્માણ કરવામાં આવ્યું છે, જેનો સીધો લાભ રાજ્ય સરકારના વર્ગ-1, વર્ગ-2 અને વર્ગ-3ના અધિકારીઓ અને કર્મચારીઓના કુલ 188 પરિવારોને મળશે.
અમદાવાદમાં યોજાનારા વિવિધ વિકાસકાર્યોના લોકાર્પણ અને ખાતમુહૂર્ત કાર્યક્રમના ભાગરૂપે આ પ્રોજેક્ટનું ઈ-લોકાર્પણ કરવામાં આવશે. રાજ્ય સરકારના જણાવ્યા મુજબ સરકારી કર્મચારીઓને કાર્યસ્થળની નજીક ગુણવત્તાસભર, સુરક્ષિત અને આધુનિક રહેઠાણ ઉપલબ્ધ કરાવવાના હેતુથી આ પ્રોજેક્ટ તૈયાર કરવામાં આવ્યો છે.
4 આધુનિક મલ્ટીસ્ટોરી ટાવર તૈયાર
માર્ગ અને મકાન વિભાગ દ્વારા અમદાવાદના વિવિધ વિસ્તારોમાં કુલ ચાર મલ્ટીસ્ટોરી રહેણાંક ટાવરનું નિર્માણ કરવામાં આવ્યું છે. દરેક ટાવરમાં આધુનિક બાંધકામ ધોરણો, સુવ્યવસ્થિત માળખાકીય સુવિધાઓ અને રહેવાસીઓની જરૂરિયાતોને ધ્યાનમાં રાખીને આયોજન કરવામાં આવ્યું છે. રાજ્ય સરકારનું માનવું છે કે સરકારી કર્મચારીઓને ઉત્તમ રહેઠાણ ઉપલબ્ધ કરાવવાથી તેમની કાર્યક્ષમતા, સુવિધા અને જીવનધોરણમાં પણ વધારો થશે. આ આવાસોમાં સુરક્ષા, પાર્કિંગ, હરિયાળી અને રોજિંદા ઉપયોગની અન્ય મૂળભૂત સુવિધાઓને પણ મહત્વ આપવામાં આવ્યું છે.
આ પણ વાંચો: ગુજરાતમાં આજે ક્યાં જશે મેઘરાજાની સવારી? : જાણો તમારા જિલ્લામાં કેવું રહેશે હવામાન
વિવિધ કેટેગરીના કુલ 188 આવાસ
આ પ્રોજેક્ટ હેઠળ અલગ-અલગ હોદ્દા ધરાવતા અધિકારીઓ અને કર્મચારીઓ માટે વિવિધ કેટેગરીના આવાસો તૈયાર કરવામાં આવ્યા છે. તેમાં 'ઈ' (E) કેટેગરીના 40 આવાસ, 'ડી-1' (D-1) કેટેગરીના 52 આવાસ, 'સી' (C) કેટેગરીના 52 આવાસ અને 'બી' (B) કેટેગરીના 44 આવાસનો સમાવેશ થાય છે. આ તમામ રહેણાંક એકમોનું વિતરણ સરકારી સેવાના વિવિધ વર્ગોને ધ્યાનમાં રાખીને કરવામાં આવ્યું છે. તેમાં વર્ગ-1ના 40 અધિકારીઓ, વર્ગ-2ના 104 અધિકારીઓ તથા વર્ગ-3ના 44 કર્મચારીઓ સહિત કુલ 188 પરિવારોને નવા સરકારી આવાસોની સુવિધા ઉપલબ્ધ થશે.
શહેરના વિવિધ વિસ્તારોમાં બનાવાયા રહેણાંક સંકુલ
પ્રોજેક્ટ અંતર્ગત અમદાવાદના શાહીબાગ વિસ્તારમાં 'ઈ' કેટેગરીના આધુનિક રેસિડેન્સી ટાવરનું નિર્માણ કરવામાં આવ્યું છે. આ ટાવરમાં વિશાળ ડ્રોઈંગ રૂમ, ડાઈનિંગ રૂમ, આધુનિક કિચન, ઓફિસ રૂમ, આરામદાયક બેડરૂમ, માસ્ટર બેડરૂમ, વિશાળ બાલ્કની, વોશ એરિયા તેમજ હરિયાળો ગાર્ડન વિસ્તાર જેવી સુવિધાઓ ઉપલબ્ધ કરાવવામાં આવી છે. શહેરના અગ્રણી શૈક્ષણિક વિસ્તાર એલ.ડી. કોલેજ ઓફ એન્જિનિયરિંગ (LDCE) નજીક આવેલી સુંદરમ કોલોનીમાં 'ડી-1' કેટેગરીના મલ્ટીસ્ટોરી ટાવરનું નિર્માણ પૂર્ણ કરવામાં આવ્યું છે. આ ઉપરાંત શાહીબાગ પોલીસ સ્ટેડિયમ સામે સરકારી અધિકારીઓ માટે ગ્રાઉન્ડ ફ્લોર પ્લસ 13 માળ ધરાવતા 'સી' કેટેગરીના આધુનિક રહેણાંક ક્વાર્ટર્સ તૈયાર કરવામાં આવ્યા છે.
ફોટોલીથો પ્રેસ કોલોની વિસ્તારમાં સરકારી કર્મચારીઓ માટે ગ્રાઉન્ડ ફ્લોર પ્લસ 11 માળ ધરાવતા 'બી' કેટેગરીના મલ્ટીસ્ટોરી ટાવરનું નિર્માણ પણ પૂર્ણ થઈ ગયું છે. આ તમામ આવાસોમાં ગુણવત્તાસભર બાંધકામ સાથે આધુનિક રહેણાંક સુવિધાઓનો સમાવેશ કરવામાં આવ્યો છે.
આ પણ વાંચો: મંજૂરી વગર રજા પર જવાથી ગ્રેચ્યુઇટી અને પેન્શન રોકી શકાય? : જાણો ઓડિશા હાઈકોર્ટે શું આપ્યો ચુકાદો
સરકારી કર્મચારીઓના જીવનધોરણમાં સુધારો લાવવાનો પ્રયાસ
રાજ્ય સરકાર છેલ્લા કેટલાક વર્ષોથી સરકારી કર્મચારીઓ માટે રહેણાંક, કચેરીઓ અને જાહેર માળખાકીય સુવિધાઓના વિકાસ પર ભાર મૂકી રહી છે. ફરજના સ્થળની નજીક રહેઠાણ ઉપલબ્ધ થતાં કર્મચારીઓનો સમય બચી શકે છે તેમજ રોજિંદા અવરજવરમાં સરળતા રહે છે. તેના કારણે કાર્યક્ષમતામાં વધારો થવાની સાથે પરિવારને પણ વધુ સુવિધાજનક વાતાવરણ મળે છે.
નવી રહેણાંક યોજનામાં સુરક્ષા વ્યવસ્થા, ખુલ્લી જગ્યા, હરિયાળી, વાહન પાર્કિંગ અને જરૂરી નાગરિક સુવિધાઓને પણ પ્રાધાન્ય આપવામાં આવ્યું છે. જેના કારણે સરકારી કર્મચારીઓને આધુનિક શહેરી
રહેણાંકનો અનુભવ મળશે. અમિત શાહના કાર્યક્રમો.
કાર્યક્રમ-1
કાર્યક્રમ: વિવિધ વિકાસલક્ષી કામોનું ખાતમુહૂર્ત અને લોકાર્પણ
સ્થળ: સાયન્સ સિટી, સોલા, અમદાવાદ
સમય: સવારે 08:30 કલાકે
કાર્યક્રમ-2
કાર્યક્રમ: ઘાટલોડિયા વિધાનસભાના ચાંદલોડિયા વોર્ડમાં વૃક્ષારોપણ
સ્થળ: AMC પ્લોટ, નિરંજન, અમદાવાદ
સમય: સવારે 09:30 કલાકે
કાર્યક્રમ-3
કાર્યક્રમ: વેજલપુર વિધાનસભાના સરખેજ વોર્ડમાં વૃક્ષારોપણ
સ્થળ: AMC પ્લોટ, ગોપાલ, અમદાવાદ
સમય: સવારે 09:55 કલાકે
કાર્યક્રમ-4
કાર્યક્રમ: નારણપુરા વિધાનસભાના સ્ટેડિયમ વોર્ડમાં વૃક્ષારોપણ
સ્થળ: NDDB પ્લોટ, ગાંધી આશ્રમ, અમદાવાદ
સમય: સવારે 10:25 કલાકે
વિકાસકાર્યોમાં વધુ એક મહત્વપૂર્ણ ઉમેરો
અમદાવાદમાં આજે યોજાનારા કાર્યક્રમ દરમિયાન અમિત શાહ વિવિધ વિકાસકાર્યોના લોકાર્પણ અને ખાતમુહૂર્તમાં પણ ભાગ લેશે. તેમાં સરકારી આવાસોના આ પ્રોજેક્ટને મહત્વપૂર્ણ માનવામાં આવી રહ્યો છે. રાજ્ય સરકારના જણાવ્યા મુજબ આ પ્રોજેક્ટ સરકારી કર્મચારીઓ માટે સુવિધાસભર રહેણાંક વ્યવસ્થા ઊભી કરવાની દિશામાં મહત્વપૂર્ણ પગલું સાબિત થશે અને ભવિષ્યમાં પણ આવા આધુનિક આવાસ પ્રોજેક્ટને પ્રોત્સાહન આપવામાં આવશે.
