સુરેન્દ્રનગરમાં મોટી રેડ: સાયલાના ચિત્રલેખા ગામેથી ગેરકાયદે કોલસાની ખાણો ઝડપાઈ, ₹૨૩.૩૦ લાખનો મુદ્દામાલ જપ્ત

સાયલા તાલુકાના ચિત્રલેખા ગામે સરકારી જમીનમાં ચાલી રહેલી ગેરકાયદેસર કાર્બોસિલ (કોલસા)ની ચોરી પર રાજકોટ રેન્જ આઈ.જી. સ્ક્વોડે લાલઆંખ કરી છે. બાતમીના આધારે ત્રાટકેલી પોલીસે કરોડો રૂપિયાના આ કૌભાંડનો પર્દાફાશ કરી સ્થળ પરથી નવા બનાવેલા ૧૧ કુવાઓ (ખાણો) શોધી કાઢ્યા છે. પોલીસે સ્થળ પરથી ૩૭૦ ટન કોલસો, ૯ સૂંઢ કેસ, ૩ કમ્પ્રેસર, ૩ ટ્રેક્ટર, ૧ જનરેટર અને ૩ મોટરસાયકલ સહિત કુલ ₹૨૩.૩૦ લાખનો મુદ્દામાલ જપ્ત કર્યો છે. આ દરોડા અંગે સાયલા પોલીસ અને ખાણ-ખનીજ વિભાગને જાણ કરવામાં આવી છે. જો કે, સ્થાનિક પોલીસને ઊંઘતી રાખીને રાજકોટ રેન્જ આઈ.જી. સ્ક્વોડે પાડેલી આ રેડને પગલે સ્થાનિક પોલીસની કામગીરી અને મિલિભગત પર પણ મોટા સવાલો ઊભા થયા છે. હાલ પોલીસે વાહનોના નંબરના આધારે ફરાર આરોપીઓની શોધખોળ હાથ ધરી છે.

સુરતના મોટા વરાછામાં ખુલ્લી ગટર બની જીવલેણ, પહેલા જ વરસાદે તંત્રની પોલ ખોલી

સુરતના મોટા વરાછા વિસ્તારમાં આવેલા A.R. મોલ બહાર સ્માર્ટ સિટીની ભયાનક બેદરકારી સામે આવી છે. ધોધમાર વરસાદને કારણે રોડ પર પાણી ભરાઈ જતાં રસ્તો અને ગટર એક થઈ ગયા છે, જેમાં ખુલ્લી ગટર જીવલેણ સાબિત થઈ રહી છે. ગટર ન દેખાવાને કારણે આજે ૪ લોકો તેમાં ખાબકતા-ખાબકતા માંડ બચ્યા હતા. આ સિવાય, રસ્તા પર નદી જેવા વહેણમાં અનેક વાહનો તણાતા જોવા મળ્યા હતા. પહેલા જ વરસાદે સુરત મહાનગરપાલિકાની પ્રી-મોન્સૂન ડ્રેનેજ વ્યવસ્થાના ધજાગરા ઉડાવી દીધા છે. અકસ્માતના આ મોટા ખતરાને પગલે સ્થાનિકોમાં વહીવટી તંત્ર સામે ભારે રોષ ફાટી નીકળ્યો છે અને જવાબદારો સામે કડક કાર્યવાહીની માંગ ઉઠી છે. લોકો સવાલ પૂછી રહ્યા છે કે આ ભયંકર બેદરકારીમાં જો કોઈનો જીવ જશે, તો તેની જવાબદારી કોણ લેશે?

સુરત: મોટા વરાછામાં ચોમાસાની શરૂઆતમાં જ બેદરકારી, A.R. મોલ બહાર ખુલ્લી ગટર જીવલેણ બની

સુરતના મોટા વરાછા વિસ્તારમાં આવેલા A.R. મોલ પાસે આજે પહેલા જ વરસાદે મનપાના ડ્રેનેજ વ્યવસ્થાના દાવાઓની પોલ ખોલી નાખી છે. વરસાદી પાણી ભરાઈ જવાથી રસ્તો અને ગટર એક થઈ ગયા હતા, જેના કારણે એક ખુલ્લી ગટર જીવલેણ સાબિત થઈ રહી છે. સ્થાનિકોના જણાવ્યા અનુસાર, અત્યાર સુધીમાં 4 જેટલા લોકો આ ખુલ્લી ગટરમાં પડતા-પડતા સહેજ માટે બચી ગયા છે. પાણી ભરાવાને કારણે અનેક વાહનો પણ પાણીના પ્રવાહમાં તણાતા જોવા મળ્યા હતા, જેને લઈને વાહનચાલકો અને રાહદારીઓમાં ભારે ફફડાટ વ્યાપી ગયો છે. આ દુર્ઘટનાને પગલે સ્થાનિક રહીશોમાં ભારે રોષ જોવા મળી રહ્યો છે અને લોકોએ જવાબદાર અધિકારીઓ સામે કડક કાર્યવાહીની માંગ કરી છે. "આ બેદરકારીની જવાબદારી કોણ લેશે?" તેવા સવાલો સાથે લોકો તંત્રની કામગીરી સામે આક્રોશ વ્યક્ત કરી રહ્યા છે.

સુરેન્દ્રનગર: મુળીના વગડીયા ગામે સસ્તા અનાજની દુકાનમાં કૌભાંડનો પર્દાફાશ, 50 કટ્ટા અનાજની વધઘટ પકડાતા ચકચાર

સુરેન્દ્રનગર જિલ્લાના મુળી તાલુકાના વગડીયા ગામે ગરીબોના હકના અનાજમાં મોટા પાયે ગેરરીતિ થતી હોવાનું સામે આવ્યું છે. ચોટીલાના પ્રાંત અધિકારીની ટીમ દ્વારા વગડીયા સ્થિત સરકાર માન્ય સસ્તા અનાજની દુકાન પર આકસ્મિક તપાસ હાથ ધરવામાં આવી હતી. તપાસ દરમિયાન દુકાનમાંથી અનાજના 50 કટ્ટાની વધઘટ મળી આવી હતી, જે ગંભીર ગેરરીતિ સૂચવે છે. પ્રાંત અધિકારીએ આ અંગે તપાસ પૂર્ણ કરીને લાયસન્સ ધારક વિરુદ્ધ કાયદેસરની કાર્યવાહી હાથ ધરી છે. ચોટીલા પ્રાંત અધિકારી દ્વારા કરવામાં આવી રહેલી સતત ચેકિંગની કામગીરીને પગલે ગરીબોનું અનાજ ઓળવી જનારા અને ભ્રષ્ટાચાર આચરનારા દુકાનદારોમાં ફફડાટ વ્યાપી ગયો છે. ગરીબોના હકનું અનાજ યોગ્ય લાભાર્થીઓ સુધી પહોંચે તે માટે તંત્ર દ્વારા કડક વલણ અપનાવવામાં આવ્યું છે.

વડોદરાને મળશે નવી ઓળખ: કમાટીબાગમાં ₹૧૧.૨૫ કરોડના ખર્ચે બનશે આઇકોનિક ‘ક્રોકોડાઇલ બ્રિજ’

સંસ્કારી નગરી વડોદરાના પ્રવાસન ક્ષેત્રે ટૂંક સમયમાં એક નવું નજરાણું ઉમેરાવા જઈ રહ્યું છે. વાઈબ્રન્ટ ગુજરાત રિજિયોનલ સમિટમાં વડોદરા મહાનગરપાલિકા દ્વારા કમાટીબાગ ખાતે વિશ્વામિત્રી નદી પર આબેહૂબ મગરના આકારનો અનોખો ‘ક્રોકોડાઇલ બ્રિજ’ બનાવવાનો અદભૂત પ્રોજેક્ટ રજૂ કરાયો છે. આ બ્રિજની ડિઝાઇન એવી હશે કે મુલાકાતીઓને મગરના ખુલ્લા મોંમાંથી પસાર થવાનો રોમાંચક અનુભવ મળશે. ₹૧૧.૨૫ કરોડના અંદાજિત ખર્ચે સાકાર થનારો આ બ્રિજ ૫૭ મીટર લાંબો અને ૭.૮૦ મીટર પહોળો હશે. તેમાં ૩ મીટરનો સ્પેશિયલ સાઇકલ ટ્રેક, વોકવે અને રાત્રિના આકર્ષણ માટે આધુનિક LED લાઇટિંગની વ્યવસ્થા કરવામાં આવશે. વિશ્વામિત્રી નદીના મગરો સાથે વડોદરાના વર્ષો જૂના નાતાને જીવંત રાખતો આ પ્રોજેક્ટ પ્રવાસીઓ માટે નવું આકર્ષણનું કેન્દ્ર બનશે.

અંકલેશ્વર-હાંસોટમાં મેઘરાજાની ધમાકેદાર એન્ટ્રી: વહેલી સવારથી ધોધમાર વરસાદ, ખેડૂતો ખુશખુશાલ

ભરૂચ જિલ્લાના અંકલેશ્વર અને હાંસોટ પંથકમાં આજે વહેલી સવારથી જ હવામાનમાં પલટો આવ્યો છે અને વીજળીના કડાકા-ભડાકા સાથે ધોધમાર વરસાદ તૂટી પડ્યો છે. લાંબા સમયના અસહ્ય ઉકળાટ અને બફારા બાદ મેઘમહેર થતાં સમગ્ર પંથકના વાતાવરણમાં ગુલાબી ઠંડક પ્રસરી ગઈ છે અને લોકોને ગરમીથી મોટી રાહત મળી છે. આ વરસાદ ખાસ કરીને જગતના તાત માટે અમૃત સમાન સાબિત થયો છે. લાંબા સમયથી વરસાદની ચાતક નજરે રાહ જોતા સ્થાનિક ખેડૂતોમાં ચોમાસાના વિધિવત આગમનથી ભારે ખુશીનો માહોલ છે. આ વરસાદી ઇનિંગને કારણે હવે રોપણી સહિતના ખેતીકાર્યોને મોટો વેગ મળશે, જેથી ધરતીપુત્રો ઉત્સાહભેર સીમ ભણી વળ્યા છે.

મેઘરાજા આક્રમક મૂડમાં: ૩થી ૬ જુલાઈ વચ્ચે ચોમાસું રૌદ્ર સ્વરૂપ ધારણ કરશે, હવામાન વિભાગની આગાહી

સમગ્ર દેશ અને ખાસ કરીને ગુજરાતમાં ચોમાસું આગળ વધવા માટે સાનુકૂળ પરિસ્થિતિઓ સર્જાઈ છે. હવામાન વિભાગ (IMD)ના જણાવ્યા અનુસાર, આગામી બે દિવસમાં દક્ષિણ-પશ્ચિમ ચોમાસું ગુજરાતના વધુ ભાગોને અને ત્યારબાદના ૨-૩ દિવસમાં સમગ્ર રાજ્યને આવરી લેશે. આ દરમિયાન ૩ થી ૬ જુલાઈ વચ્ચે મેઘરાજા રૌદ્ર સ્વરૂપ ધારણ કરે તેવી આશંકા છે. વળી, ૨ જુલાઈથી નવું વેસ્ટર્ન ડિસ્ટર્બન્સ પણ સક્રિય થઈ રહ્યું છે. બીજી તરફ, રાજ્યમાં છેલ્લા ૨૪ કલાકમાં ૩૩ તાલુકાઓમાં વરસાદ નોંધાયો છે, જેમાં સુરતમાં સૌથી વધુ ૨.૬૦ ઇંચ વરસાદ ખાબક્યો છે. લાંબી રાહ જોયા બાદ સુરત, ઉના અને તાપીના વ્યારા સહિતના વિસ્તારોમાં મેઘમહેર થતાં બફારાથી રાહત મળી છે અને ખેડૂતોમાં આનંદની લાગણી છવાઈ ગઈ છે.

દક્ષિણ ગુજરાતમાં ભારે વરસાદની સંભાવના, આજે ડાંગ, નવસારી અને વલસાડમાં ભારે વરસાદની આગાહી

હવામાન વિભાગ દ્વારા દક્ષિણ ગુજરાતના સરહદી જિલ્લાઓ માટે આગામી ૨૪ કલાક દરમિયાન ભારેથી અતિભારે વરસાદની ચેતવણી (અલર્ટ) જાહેર કરવામાં આવી છે. ખાસ કરીને ડાંગ, નવસારી અને વલસાડ જિલ્લામાં આકાશી આફત વરસી શકે છે. આ વિસ્તારોમાં ૪૦ થી ૫૦ કિલોમીટર પ્રતિકલાકની ઝડપે ફૂંકાતા પવન અને ભારે ગાજવીજ સાથે વાવાઝોડા જેવો માહોલ સર્જાવાની સંભાવના છે.

તંત્ર દ્વારા સંભવિત પરિસ્થિતિને પહોંચી વળવા માટે વહીવટી તંત્રને સાબદું કરી દેવામાં આવ્યું છે. નીચાણવાળા વિસ્તારો અને નદી કિનારાના ગામોના લોકોને સાવધ રહેવા સૂચના અપાઈ છે. પહાડી વિસ્તારો જેમ કે સાપુતારા અને ડાંગના ઘાટ માર્ગો પર ભૂસ્ખલનની આશંકાને પગલે પ્રવાસીઓ અને વાહનચાલકોને સાવચેતીપૂર્વક મુસાફરી કરવા અપીલ કરવામાં આવી છે. માછીમારોને પણ દરિયો ન ખેડવા કડક તાકીદ કરાઈ છે.

સુરતમાં ધોધમાર વરસાદથી અનેક વિસ્તારોમાં ઘૂંટણસમા પાણી ભરાયા

હવામાન વિભાગની આગાહી વચ્ચે આજે સુરત શહેરમાં સવારથી જ મેઘરાજાએ રૌદ્ર સ્વરૂપ ધારણ કર્યું છે. ભારે ગાજવીજ સાથે તૂટી પડેલા ધોધમાર વરસાદને કારણે સમગ્ર ડાયમંડ સિટી પાણી-પાણી થઈ ગયું છે. શહેરના અનેક મુખ્ય માર્ગો અને નીચાણવાળા રહેણાંક વિસ્તારોમાં ઘૂંટણસમા પાણી ભરાઈ ગયા છે. વરસાદી પાણી ભરાવાને કારણે વાહનચાલકો ભારે મુશ્કેલીમાં મુકાયા હતા અને કલાકો સુધી ટ્રાફિક જામના દ્રશ્યો સર્જાયા હતા. કેટલીક જગ્યાએ વાહનો બંધ પડી જતાં લોકોને હાલાકી ભોગવવી પડી રહી છે. મ્યુનિસિપલ કોર્પોરેશનની પ્રી-મોન્સૂનની કામગીરીના દાવાઓની પોલ આ વરસાદે ખોલી નાખી છે. તંત્ર દ્વારા હાલ પાણીના નિકાલ માટે પંપિંગ સ્ટેશનો કાર્યરત કરી કામગીરી હાથ ધરવામાં આવી છે.

અમરેલી અને ઉનામાં મેઘમહેર: વહેલી સવારથી ધોધમાર વરસાદથી જળબંબોળ

રાજ્યમાં ચોમાસાની ધમાકેદાર ઇનિંગ શરૂ થઈ ચૂકી છે, જેના ભાગરૂપે આજે વહેલી સવારથી જ સૌરાષ્ટ્રના અમરેલી અને ગીર સોમનાથના ઉના પંથકમાં ધોધમાર વરસાદ તૂટી પડ્યો છે. લાંબા વિરામ બાદ મેઘરાજાની તોફાની એન્ટ્રી થતાં સ્થાનિક ખેડૂતોમાં ભારે આનંદની લાગણી છવાઈ ગઈ છે. વહેલી સવારથી શરૂ થયેલા અનરાધાર વરસાદને કારણે અમરેલી અને ઉનાના નીચાણવાળા વિસ્તારોમાં પાણી ભરાઈ ગયા છે. રસ્તાઓ પર પાણી ફરી વળતા વહેલી સવારના વાહનચાલકો અને મુસાફરોને થોડી મુશ્કેલીનો સામનો કરવો પડ્યો હતો. જો કે, આ વરસાદ વાવણી લાયક હોવાથી જગતના તાતમાં ખુશીનો માહોલ છે. હવામાન વિભાગના જણાવ્યા અનુસાર, આગામી ૨૪ કલાકમાં આ વિસ્તારોમાં હજુ પણ ભારે વરસાદ પડવાની સંભાવના છે.

નવસારી: સવારથી મેઘમહેર છતાં ખેડૂતોમાં ચિંતા, ડાંગરની રોપણી માટે વાવણીલાયક વરસાદની પ્રતીક્ષા

નવસારી શહેર અને જિલ્લાના વિવિધ વિસ્તારોમાં આજે સવારથી વાદળછાયા વાતાવરણ વચ્ચે વરસાદી માહોલ જામ્યો છે. લાંબા સમયથી રાહ જોવાઈ રહેલા વરસાદનું આગમન થતા વાતાવરણમાં ઠંડક પ્રસરી છે, પરંતુ ખેડૂતોની ચિંતા હજુ પણ યથાવત છે. જૂન મહિનો પૂર્ણતાના આરે હોવા છતાં, હજુ સુધી ખેતરોમાં વાવણીલાયક સંતોષકારક વરસાદ થયો નથી.

ખાસ કરીને ડાંગરની રોપણી માટે ખેડૂતો આતુરતાપૂર્વક સારા વરસાદની રાહ જોઈ રહ્યા છે. ખેતીકામ માટે પૂરતા પાણીની જરૂરિયાતને ધ્યાનમાં લેતા, હાલના વરસાદી ઝાપટાં ડાંગરના પાક માટે અપૂરતા જણાઈ રહ્યા છે. ખેડૂતો હવે મેઘરાજા મનમૂકીને વરસે તેવી આશા રાખી રહ્યા છે, જેથી તેઓ સમયસર પોતાની ખેતીની કામગીરી પૂર્ણ કરી શકે.