ગુજરાત રાજ્યના વહીવટી વિભાગમાં સરકારે મહત્વપૂર્ણ ફેરબદલ કરતા ત્રણ વરિષ્ઠ IAS અધિકારીઓની અન્ય સ્થળે નિમણૂક કરી છે. વહીવટી કાર્યક્ષમતાને વધુ સુદ્રઢ બનાવવાના હેતુથી રાજ્ય સરકાર દ્વારા આ બદલીના આદેશો આપવામાં આવ્યા છે. આ ફેરફારોની સાથે જ રાજ્યના માર્ગ અને મકાન વિભાગના સચિવના કાર્યકાળમાં પણ વધારો કરવાનો મહત્વનો નિર્ણય લેવામાં આવ્યો છે.
નવા જિલ્લા કલેક્ટરોની નિમણૂક
રાજ્ય સરકારના તાજેતરના આદેશ મુજબ નડિયાદ મ્યુનિસિપલ કમિશનર તરીકે સેવા આપતા જી. એચ. સોલંકીને હવે સુરેન્દ્રનગર જિલ્લાના કલેક્ટર તરીકેની જવાબદારી સોંપવામાં આવી છે. તેવી જ રીતે અમરેલીમાં જિલ્લા વિકાસ અધિકારી તરીકે કાર્યરત પી. બી. પંડ્યાને બઢતી સાથે જામનગરના કલેક્ટર તરીકે નિયુક્ત કરાયા છે. આ ઉપરાંત મહેસાણા મ્યુનિસિપલ કમિશનર રવિન્દ્ર ખતાલેને રાજ્યના પાટનગર ગાંધીનગરના કલેક્ટર જેવી મહત્વની જવાબદારી સોંપવામાં આવી છે. આ તમામ અધિકારીઓ ટૂંક સમયમાં જ પોતાનો નવો કાર્યભાર સંભાળી લેશે.
સચિવ પી.આર. પટેલિયાના કાર્યકાળમાં વધારો
વહીવટી ફેરફારોની સાથે જ માર્ગ અને મકાન વિભાગના સચિવ પી.આર. પટેલિયાને પણ સરકારે મોટી રાહત આપી છે. તેમની ઉત્કૃષ્ટ કામગીરીને ધ્યાનમાં રાખીને સરકારે તેમના નિવૃત્તિના સમયગાળામાં 1 વર્ષનો વધારો કર્યો છે. પી.આર. પટેલિયા 31 March 2026 ના રોજ વયનિવૃત્ત થવાના હતા પરંતુ હવે તેઓ કરારબદ્ધ ધોરણે March 2027 સુધી પોતાની સેવાઓ ચાલુ રાખશે. સરકારના આ નિર્ણયથી વિભાગના મહત્વના પ્રોજેક્ટ્સમાં સાતત્ય જળવાઈ રહેશે તેવું માનવામાં આવી રહ્યું છે.
