Gandhinagar News: ગુજરાતમાં સતત વરસી રહેલા ભારે વરસાદ અને અનેક જિલ્લાઓમાં સર્જાયેલી પૂર જેવી પરિસ્થિતિને ધ્યાનમાં રાખીને મુખ્યમંત્રી ભૂપેન્દ્ર પટેલે ગાંધીનગર ખાતે ઉચ્ચસ્તરીય સમીક્ષા બેઠક યોજી હતી. બેઠક બાદ રાજ્યના રાહત કમિશનર ગૌરાંગ મકવાણાએ મીડિયા સાથે વાતચીતમાં રાજ્યભરની સ્થિતિ, બચાવ અને રાહત કામગીરી તેમજ આગામી દિવસોની તૈયારીઓ અંગે વિગતવાર માહિતી આપી હતી. રાહત કમિશનરે જણાવ્યું કે રાજ્ય સરકાર દ્વારા તમામ અસરગ્રસ્ત જિલ્લાઓ પર સતત નજર રાખવામાં આવી રહી છે. હવામાન વિભાગની આગાહીને ધ્યાનમાં રાખીને આગામી દિવસોમાં પણ ભારેથી અતિભારે વરસાદની સંભાવના ધરાવતા વિસ્તારોમાં તમામ સંબંધિત વિભાગોને એલર્ટ પર રાખવામાં આવ્યા છે.
અનેક જિલ્લાઓમાં રેડ અને ઓરેન્જ એલર્ટ
ગૌરાંગ મકવાણાના જણાવ્યા મુજબ હાલમાં મોરબી, સુરેન્દ્રનગર, અમદાવાદ અને ગાંધીનગર જિલ્લામાં રેડ એલર્ટ જાહેર કરવામાં આવ્યું છે. જ્યારે જામનગર, રાજકોટ, અરવલ્લી અને સાબરકાંઠા જિલ્લામાં ઓરેન્જ એલર્ટ અમલમાં છે. હવામાન વિભાગે આવતીકાલે પણ રાજ્યના કેટલાક વિસ્તારોમાં ભારેથી અતિભારે વરસાદની આગાહી કરી છે. તેમણે જણાવ્યું કે જ્યાં વરસાદનું પ્રમાણ વધુ રહેવાની સંભાવના છે ત્યાં અગાઉથી જ બચાવ ટીમો અને જરૂરી સાધનો તૈનાત કરવામાં આવ્યા છે, જેથી કોઈપણ કટોકટીની સ્થિતિમાં તાત્કાલિક કાર્યવાહી કરી શકાય.
SDRF, NDRF અને સેનાની ટીમો તૈનાત
રાજ્યમાં બચાવ કામગીરી માટે હાલ SDRFની 32 ટીમો અને NDRFની 17 ટીમો વિવિધ જિલ્લાઓમાં તૈનાત કરવામાં આવી છે. ઉપરાંત, જરૂરિયાત ઉભી થાય તો તાત્કાલિક મદદ માટે ભારતીય સેનાની ચાર કોલમ ગાંધીનગર અને અમદાવાદ ખાતે રિઝર્વ રાખવામાં આવી છે. રાહત કમિશનરે જણાવ્યું કે વરસાદનું પ્રમાણ ઘટતાં ગ્રામ્ય વિસ્તારોમાં રેસ્ક્યુ કામગીરીને વધુ વેગ મળ્યો છે. ખાસ કરીને અગરિયા વિસ્તારો અને જિંગા તળાવ પાસે કામ કરતા લોકોને સુરક્ષિત રીતે બહાર કાઢવાની કામગીરી સફળતાપૂર્વક પૂર્ણ કરવામાં આવી છે.
40,500 લોકોનું સ્થળાંતર, 2,637 લોકોનું રેસ્ક્યુ
રાજ્ય સરકાર દ્વારા જોખમગ્રસ્ત વિસ્તારોમાંથી અત્યાર સુધીમાં કુલ 40,500 લોકોને સુરક્ષિત સ્થળોએ સ્થળાંતર કરવામાં આવ્યા છે. ઉપરાંત, 2,637 લોકોને વિવિધ વિસ્તારોમાંથી રેસ્ક્યુ કરીને સલામત સ્થળે પહોંચાડવામાં આવ્યા છે. રાહત કેમ્પોમાં રહેતા લોકોને ભોજન, પીવાનું પાણી, આરોગ્ય સેવાઓ અને અન્ય જરૂરી સુવિધાઓ ઉપલબ્ધ કરાવવામાં આવી રહી છે. જિલ્લા વહીવટી તંત્ર, સ્થાનિક સંસ્થાઓ અને વિવિધ બચાવ એજન્સીઓ વચ્ચે સતત સંકલન જાળવી કામગીરી કરવામાં આવી રહી છે.
માર્ગ અને જાહેર પરિવહન પર ભારે અસર
ભારે વરસાદના કારણે રાજ્યભરમાં આશરે 1,100 રસ્તાઓ કામચલાઉ ધોરણે બંધ કરવામાં આવ્યા છે. પાણી ભરાવા અને માર્ગો ધોવાઈ જવાની સ્થિતિને ધ્યાનમાં રાખીને આ નિર્ણય લેવામાં આવ્યો છે.
તે ઉપરાંત, મુસાફરોની સુરક્ષાને પ્રાથમિકતા આપતાં ગુજરાત રાજ્ય માર્ગ પરિવહન નિગમ (GSRTC)ની અંદાજે 1,600 બસ ટ્રિપો રદ કરવામાં આવી છે. તંત્ર દ્વારા લોકોને બિનજરૂરી મુસાફરી ટાળવાની અપીલ કરવામાં આવી છે.
શાળા-કોલેજો અને આંગણવાડીઓ બંધ
અસરગ્રસ્ત જિલ્લાઓમાં વિદ્યાર્થીઓની સુરક્ષાને ધ્યાનમાં રાખીને શાળા, કોલેજો અને આંગણવાડી કેન્દ્રો બંધ રાખવાનો નિર્ણય લેવામાં આવ્યો છે. સ્થાનિક વહીવટી તંત્રને પરિસ્થિતિ મુજબ નિર્ણય લઈ જરૂરી જાહેરનામા બહાર પાડવાની સૂચના આપવામાં આવી છે. સરકારે જણાવ્યું કે જ્યાં વરસાદ અને પાણી ભરાવાની સ્થિતિ વધુ ગંભીર છે ત્યાં વિદ્યાર્થીઓ અને શિક્ષકોની સુરક્ષાને પ્રથમ પ્રાથમિકતા આપવામાં આવી રહી છે.
પાંચ લોકોના મોત, સહાય માટે ₹40 કરોડ ફાળવાયા
રાહત કમિશનરના જણાવ્યા મુજબ વરસાદ સંબંધિત દુર્ઘટનાઓમાં અત્યાર સુધીમાં કુલ પાંચ લોકોના મૃત્યુ નોંધાયા છે. જેમાં એક તાપી જિલ્લામાં, એક વલસાડ જિલ્લામાં અને ત્રણ મૃત્યુ આણંદ, મહેસાણા તથા પંચમહાલ જિલ્લામાં નોંધાયા છે. અસરગ્રસ્ત પરિવારોને સહાય પહોંચાડવા માટે રાજ્ય સરકારે ₹40 કરોડની રકમ ફાળવી છે. તેમણે જણાવ્યું કે જ્યાં પાણી ઉતરી જશે ત્યાં તાત્કાલિક નુકસાનનું મૂલ્યાંકન કરીને કેશ ડોલ્સ (રાહત સહાય)નું વિતરણ શરૂ કરવામાં આવશે.
આ પણ વાંચો:
94 ગામોમાં વીજ પુરવઠો ખોરવાયો
ભારે વરસાદ અને પૂર જેવી પરિસ્થિતિના કારણે રાજ્યના 94 ગામોમાં વીજ પુરવઠો ખોરવાયો હોવાનું પણ રાહત કમિશનરે જણાવ્યું હતું. વીજ વિભાગની ટીમો સતત મેદાનમાં રહી વીજ પુરવઠો પુનઃસ્થાપિત કરવા કામગીરી કરી રહી છે. સરકારે લોકોને અફવાઓથી દૂર રહેવા, માત્ર અધિકૃત માહિતી પર વિશ્વાસ રાખવા અને જિલ્લા વહીવટી તંત્ર તથા હવામાન વિભાગ દ્વારા આપવામાં આવતી સૂચનાઓનું પાલન કરવાની અપીલ કરી છે.
