ગુજરાતમાં ઉનાળાની ગરમી હવે વધુ ખતરનાક સ્તરે પહોંચી ગઈ છે. રાજ્યના અનેક જિલ્લાઓમાં તાપમાન 43 ડિગ્રી સેલ્સિયસને પાર જતા હીટવેવ જેવી પરિસ્થિતિ સર્જાઈ છે. ખાસ કરીને અમદાવાદ સહિતના મોટા શહેરોમાં ગરમીનો પ્રભાવ વધારે દેખાઈ રહ્યો છે જેના કારણે હવામાન વિભાગે ઓરેન્જ એલર્ટ જાહેર કર્યું છે. છેલ્લા કેટલાક દિવસોમાં તાપમાન સતત વધતા લોકો માટે દિવસ દરમિયાન બહાર નીકળવું મુશ્કેલ બની ગયું છે. બપોરના સમયે રસ્તાઓ સુમસામ જોવા મળી રહ્યાં છે. વધતી ગરમીને કારણે હીટસ્ટ્રોક અને ડિહાઇડ્રેશનના કેસોમાં પણ વધારો થવાની શક્યતા વ્યક્ત કરવામાં આવી રહી છે.
7 જિલ્લામાં 43°C પાર, ગરમીનો વ્યાપ વધ્યો
રાજ્યના ઓછામાં ઓછા સાત જિલ્લાઓમાં તાપમાન 43 ડિગ્રીથી વધુ નોંધાયું છે, જે આ સિઝનમાં અત્યાર સુધીનું ઊંચું સ્તર ગણાય છે. ઉત્તર અને મધ્ય ગુજરાતના વિસ્તારોમાં ગરમીનો પ્રભાવ સૌથી વધુ છે, જ્યારે કચ્છ અને સૌરાષ્ટ્રના કેટલાક વિસ્તારોમાં પણ તાપમાન ઊંચું રહેવાની નોંધ છે. અમદાવાદમાં ખાસ કરીને ગરમીની તીવ્રતા વધુ હોવાથી ઓરેન્જ એલર્ટ જાહેર કરવામાં આવ્યું છે. આ એલર્ટનો અર્થ એ છે કે આગામી દિવસોમાં તાપમાન વધુ વધવાની શક્યતા છે અને લોકો માટે આરોગ્ય સંબંધિત જોખમ વધી શકે છે. અન્ય 12 જિલ્લાઓમાં યલો એલર્ટ જાહેર કરીને ચેતવણી આપવામાં આવી છે.
આગ ઝરતી ગરમી પડશે
હવામાન વિભાગના પૂર્વાનુમાન મુજબ, આજે અમદાવાદમાં 43°C, અમરેલીમાં 44°C, વડોદરામાં 44°C, રાજકોટમાં 44°C, સુરતમાં 42°C, ભાવનગરમાં 42°C, ભુજમાં 43°C, દાહોદમાં 41°C, ગાંધીનગરમાં 43°C, કંડલામાં 41°C અને પોરબંદરમાં 40°C મહત્તમ તાપમાન રહેવાની સંભાવના છે.
આ પણ વાંચો: અમદાવાદમાં અંગ દઝાડતી ગરમી : AMCની કાંકરિયા ઝૂમાં પ્રાણીઓ માટે સમર શિલ્ડ યોજના
11થી 14 મે સુધી હીટવેવ
હીટવેવની ગંભીરતાને ધ્યાનમાં રાખીને 11થી 14 મે સુધી ખાસ ચેતવણી જાહેર કરવામાં આવી છે જેમાં કચ્છ અને સુરેન્દ્રનગર જિલ્લા માટે આગામી ત્રણ દિવસનું 'ઓરેન્જ એલર્ટ' જાહેર કરાયું છે. આ સિવાય સૌરાષ્ટ્રના દ્વારકા, રાજકોટ, બોટાદ, જૂનાગઢ, અમરેલી અને ગુજરાત પ્રદેશના બનાસકાંઠા, પાટણ, ગાંધીનગર, આણંદ, વડોદરા, સુરત અને અમદાવાદ જેવા વિસ્તારોમાં 'યલો એલર્ટ' આપવામાં આવ્યું છે. અમદાવાદમાં તાપમાન 44 ડિગ્રી સેલ્સિયસની આસપાસ રહેવાનું અનુમાન છે.
આગામી દિવસોમાં વધુ ગરમીની આગાહી
હવામાન વિભાગ મુજબ, આગામી 3 થી 4 દિવસ દરમિયાન તાપમાનમાં વધુ વધારો થવાની શક્યતા છે. ગરમ પવન અને સૂકા વાતાવરણના કારણે દિવસ દરમિયાન તાપમાન 44 ડિગ્રી સેલ્સિયસ સુધી પહોંચી શકે છે. ખાસ કરીને બપોરના 12થી 4 વાગ્યા દરમિયાન બહાર નીકળવાનું ટાળવા સૂચના આપવામાં આવી છે. હીટવેવ દરમિયાન શરીરમાં પાણીની અછત થવાથી ગંભીર સમસ્યાઓ ઊભી થઈ શકે છે. તેથી, લોકો વધુ પાણી પીવે, હળવો ખોરાક લે અને સીધા સૂર્યપ્રકાશથી દૂર રહે તે ખૂબ જ જરૂરી છે.
તંત્ર એલર્ટ મોડ પર
રાજ્ય સરકાર અને સ્થાનિક તંત્ર દ્વારા હીટવેવને ધ્યાનમાં રાખીને તૈયારીઓ તેજ કરવામાં આવી છે. હોસ્પિટલોમાં ખાસ વ્યવસ્થા રાખવામાં આવી છે અને લોકોને જાગૃત કરવા માટે અભિયાન પણ શરૂ કરવામાં આવ્યા છે. નગરપાલિકા અને જિલ્લા તંત્ર દ્વારા પાણીની વ્યવસ્થા, શેડ અને અન્ય સુવિધાઓ વધારવામાં આવી રહી છે. જાહેર સ્થળોએ પીવાના પાણીની સુવિધા ઉપલબ્ધ કરાવવામાં આવી રહી છે, જેથી લોકો ગરમીમાં તકલીફ ન અનુભવે. આ સ્થિતિમાં આગામી દિવસો વધુ પડકારજનક બની શકે છે, તેથી લોકોને સાવચેત રહેવું અને તંત્રની સૂચનાઓનું પાલન કરવું અત્યંત જરૂરી બની ગયું છે.
